ବାରିପଦା ଅଫିସ,୨ ।୪ ମୟୂରଭଞ୍ଜ ଜିଲାରେ ଲଘୁ ଖଣିଜ ଦ୍ରବ୍ୟର ଚୋରା ଚାଲାଣ ଓ ନିୟମ ଉଲ୍ଲଂଘନକୁ ନେଇ ନ୍ୟାସନାଲ ଗ୍ରୀନ ଟ୍ରିବ୍ୟୁନାଲ(ଏନ୍ଜିଟ)ରେ ମାମଲା ରୁଜୁ ହୋଇଛି। ଏହା ସତ୍ତ୍ୱେ ଜିଲା ପ୍ରଶାସନର ଚେତା ପଶୁନି। ବେଆଇନ ପୋଲ ନିର୍ମାଣ କରି ବାଲି ଚାଲାଣ କରାଯାଉଛି। ପ୍ରଶାସନ ବାଲି ସଇରାତକୁ ସିଲ୍ କରିବା ପରିବର୍ତ୍ତେ ନୀରବ ରହୁଥିବା ଅଭିଯୋଗ ହୋଇଛି। ଏପରି ଘଟଣା ଦେଖିବାକୁ ମିଳିଛି ବଡ଼ସାହି ତହସିଲ ଅଧୀନ ଆରପଟା ବାଲି ସଇରାତ କ୍ଷେତ୍ରରେ। ଏ ସଂକ୍ରାନ୍ତରେ ବଡ଼ସାହି ବିଧାୟକ ସନାତନ ବିଜୁଳି ଶୁକ୍ରବାର ବିଧାନସଭାର ଶୂନ୍ୟକାଳରେ ପ୍ରଶ୍ନ ଉଠାଇ ଥିବା ସୂଚନା ମିଳିଛି।
ଅନୁଯାୟୀ, ବୁଢାବଳଙ୍ଗ ନଦୀର ଦୁଇଟି ବାଲି ସଇରାତରୁ ଲଘୁ ଖଣିଜ ଉତ୍ତୋଳନ ଓ ପରିବହନ କ୍ଷେତ୍ରରେ ଶହେ କୋଟି ଟଙ୍କାର ରାଜସ୍ବ କ୍ଷତି ହୋଇଥିବା ନେଇ ଅଭିଯୋଗ ହୋଇଛି। ଏହାକୁ ନେଇ ଏନ୍ଜିଟି ପକ୍ଷରୁ କେନ୍ଦ୍ର ଓ ରାଜ୍ୟ ପ୍ରଶାସନିକ ଅଧିକାରୀଙ୍କଠାରୁ ଏକ ମାସ ମଧ୍ୟରେ ଜବାବ ତଲବ କରିବାକୁ ନିର୍ଦ୍ଦେଶ ଦେଇଛନ୍ତି। କୋର୍ଟଙ୍କ ଆଦେଶ ଅନୁଯାୟୀ ଆସନ୍ତା ୬ତାରିଖରେ ଏକ ୪ଜଣିଆ ବିଶେଷଜ୍ଞ କମିଟି ତଦନ୍ତ କରିବାକୁ ଆସୁଥିବା ବେଳେ ଉଭୟ ସଇରାତରୁ ପରିବହନ ବନ୍ଦ ରହିଛି। ତେବେ ଅସାଧୁ ବାଲି ମାଫିଆମାନେ ବେଆଇନ ଭାବେ ନିର୍ମାଣ କରାଯାଇଥିବା ଆରପଟା ସଇରାତର ଅସ୍ଥାୟୀ ପୋଲ ଦେଇ ବାଲି ଚୋରା ଚାଲାଣ କରୁଛନ୍ତି। ଉକ୍ତ ପୋଲକୁ ଉଦ୍ଦେଶ୍ୟ ମୂଳକ ଭାବେ ଭଙ୍ଗା ନ ଯାଇ ଅଧିକାରୀମାନେ ଲୁଟରେ ସାମିଲ ହୋଇଛନ୍ତି ବୋଲି ଅଭିଯୋଗରେ ଦର୍ଶାଯାଇଛି। ତେବେ ଉକ୍ତ ଘାଟରୁ ପ୍ରତିଦିନ ୧୦ ସିୟୁଏମ୍ ବାଲି ଉତ୍ତୋଳନ ପାଇଁ ନିମନ୍ତେ ୩୧ମାର୍ଚ୍ଚ ୨୦୨୧ପର୍ଯ୍ୟନ୍ତ ପରିବେଶ ମଞ୍ଜୁରୀ ପ୍ରଦାନ କରାଯାଇଛି। ଅବଧି ଶେଷ ହେବା ପରେ ମଧ୍ୟ ଏହାକୁ ବିସ୍ତାର କରା ନ ଯାଇ ବାଲି ଖନନ ଜାରି ରହିଥିବାରୁ ବାର୍ଷିକ ୨୨ଶହ ସିୟୁଏମ୍ ପରିବର୍ତ୍ତେ ୬.୨୩ଲକ୍ଷ ସିୟୁଏମ୍ ବାଲି ଉତ୍ତୋଳନ କରାଯାଇଛି ବୋଲି ଅଭିଯୋଗ ହୋଇଛି। ତେବେ ଅନୁମତି ସୀମାର ୨୪୦ଗୁଣ ବାଲି ଉତ୍ତୋଳନ କରାଯାଇଥିବାରୁ ବାର୍ଷିକ ୫୩.୨୬କୋଟି ଟଙ୍କାର ରାଜସ୍ବ ହାନି ହୋଇଥିବା ଜଣାପଡ଼ିଛି। ଏହାକୁ ନେଇ ତଦନ୍ତ ଆରମ୍ଭ ହେବାକୁ ଥିବା ବେଳେ ଅଧିକାରୀଙ୍କଠାରୁ ଆରମ୍ଭ କରି ଲିଜ୍ଧାରୀ ଓ ସହଯୋଗୀମାନଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି। ଅଧିକାରୀମାନେ ନିଜକୁ ବଞ୍ଚାଇବାକୁ ପ୍ରାଣମୂର୍ଚ୍ଛା ଉଦ୍ୟମ ଜାରି ରଖିଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି। ତେବେ ଏହାକୁ ନେଇ ଅଧିକାରୀମାନେ ପ୍ରତିକ୍ରିୟା ଦେବାକୁ ମନା କରିଦେଇଛନ୍ତି ା
