ବଇଣ୍ଡା, ୨୭ା୧୧ (ପରିକ୍ଷିତ ସାହୁ): ଦୁର୍ଘଟଣାରେ ଜଣେ ସଦସ୍ୟ ପ୍ରାଣ ହରାଇଥିବାରୁ ପରିବାର ଲୋକେ ଭାଙ୍ଗି ପଡ଼ିଥିଲେ। ଖବରପାଇ ଶୋକସନ୍ତପ୍ତ ପରିବାରକୁ ସାନ୍ତ୍ୱନା ଦେବାକୁ ବନ୍ଧୁବାନ୍ଧବ ମଧ୍ୟ ପହଞ୍ଚି ଯାଇଥିଲେ। ସମସ୍ତେ ଶୋକରେ ଡୁବି ମୃତଦେହକୁ ଅପେକ୍ଷା କରିଥିବା ବେଳେ ରାତିରେ ଖଣ୍ଡା, ବନ୍ଧୁକ ଧରି ହଠାତ୍ ପହଞ୍ଚିଥିଲେ ୧୦ ଜଣ ଦୁର୍ବୃତ୍ତ। ସମସ୍ତଙ୍କୁ ଭୟଭୀତ କରିବା ସହ ଘରେ ଥିବା ଲକ୍ଷାଧିକ ଟଙ୍କା ଓ ୩୫୦ ଗ୍ରାମର ସୁନାଗହଣା ନେଇ ଫେରାର ହୋଇଯାଇଥିଲେ। ଏପରି କି ମୃତକଙ୍କ ସ୍ତ୍ରୀ ଓ ବନ୍ଧୁବାନ୍ଧବ ପିନ୍ଧିଥିବା ଗହଣାକୁ ମଧ୍ୟ ଦୁର୍ବୃତ୍ତମାନେ ଝିଙ୍କି ନେଇଥିଲେ। ଅନୁଗୋଳ ଜିଲା କିଶୋରନଗର ବ୍ଲକ ହଣ୍ଡପା ଥାନା ଲକ୍ଷ୍ମୀପ୍ରିୟାପୁର ଗ୍ରାମରେ ସୋମବାର ରାତିରେ ହୋଇଥିବା ଏପରି ଏକ ଡକାୟତି ଜିଲାରେ ଚର୍ଚ୍ଚାର ବିଷୟ ହୋଇଛି। ସୂଚନା ଅନୁଯାୟୀ, ହଣ୍ଡପା ଥାନା ଲକ୍ଷ୍ମୀପ୍ରିୟାପୁର ଗ୍ରାମର ଟ୍ରାକ୍ଟର ଚାଳକ ବିଜୟ କୁମାର ସାହୁଙ୍କ ସୋମବାର ଗାଡ଼ିରୁ ଖସିପଡ଼ି ମୃତ୍ୟୁ ହୋଇଥିଲା। ସା ହୋଇଯିବାରୁ ମୃତଦେହ ବ୍ୟବଚ୍ଛେଦ ହୋଇପାରି ନ ଥିଲା। ହାଟରୁ ଘରକୁ ଫେରୁଥିବା ବିଜୟଙ୍କ ଏପରି ମୃତ୍ୟୁ ପରିବାରକୁ ସ୍ତବ୍ଧ କରିଦେଇଥିବା ବେଳେ ସମସ୍ତେ ମୃତଦେହକୁ ଅପେକ୍ଷା କରିଥିଲେ। ବନ୍ଧୁବାନ୍ଧବମାନେ ମଧ୍ୟ ବିଜୟଙ୍କ ଘରେ ପହଞ୍ଚି ଯାଇଥିଲେ। ହେଲେ ରାତିରେ ବୋଲେରୋରେ ଗଁାକୁ ଆସିଥିବା ୧୦ ଜଣ ଡକାୟତ ବିଜୟଙ୍କ ଘରେ ପଶିଯାଇଥିଲେ। ସେମାନେ ବିଜୟଙ୍କ ଭାଇ ଅଜୟ କୁମାର ସାହୁଙ୍କ ବେକରେ ଖଣ୍ଡା ଲଗାଇବା ସହ ମୁଣ୍ଡରେ ମାଉଜର ଲଗାଇ ସମସ୍ତଙ୍କୁ ଭୟଭୀତ କରାଇଥିଲେ। ଏଥିସହ ଘରେ ଥିବା ଆଲମାରି, କାଠବାକ୍ସ ଭାଙ୍ଗି ୧ ଲକ୍ଷ ୩୫ ହଜାର ଟଙ୍କା, ୫ ଭରି ସୁନା, ରୁପା ଗହଣା ନେଇଯାଇଥିଲେ। ମୃତ ବିଜୟଙ୍କ ସ୍ତ୍ରୀ ଚାରୁଲତା ସାହୁଙ୍କ ବେକରୁ ସୁନା ଚେନ୍ ଓ କାନରେ ପିନ୍ଧିଥିବା ଅଳଙ୍କାର, ବନ୍ଧୁବାନ୍ଧବ ଆଲିସା ବେହେରା, ପ୍ରେମଲତା ସାହୁ, ସୁଷମା ସାହୁ, ବିଳାସ ସାହୁ, ମିନତୀ ସାହୁଙ୍କ ସମେତ ୧୫ ଜଣ ମହିଳାଙ୍କ ବେକ ଓ କାନରୁ ମୋଟ ୩୫୦ ଗ୍ରାମ୍ର ଅଳଙ୍କାର ଲୁଟି ନେଇଥିଲେ। ସେମାନଙ୍କଠାରୁ ୧୧ଟି ମୋବାଇଲ ଛଡ଼ାଇ ନେବା ସହ ସମସ୍ତଙ୍କୁ ୨ଟି ଘରେ ପୂରାଇ ବାହାରୁ କବାଟଦେଇ ଫେରାର ହୋଇଯାଇଥିଲେ। ଘଟଣା ଜଣାପଡ଼ିବା ପରେ ଲକ୍ଷ୍ମୀପ୍ରିୟାପୁର ଗ୍ରାମରେ ଭୟର ବାତାବରଣ ଖେଳିଯାଇଛି। ଖବରପାଇ ମଙ୍ଗଳବାର ସକାଳେ ହଣ୍ଡପା ଥାନା ଆଇଆଇସି ନମିତା ନାୟକଙ୍କ ନେତୃତ୍ୱରେ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରୁଥିବା ଆଇଆଇସି ପ୍ରକାଶ କରିଛନ୍ତି। ସନ୍ଧ୍ୟାରେ ମୃତକଙ୍କ ଭାଇ ଅଜୟ ସାହୁ ଥାନାରେ ଅଭିଯୋଗ କରିବା ପରେ ପୋଲିସ ନଂ. ୪୦୧/୨୪ରେ ଏକ ମାମଲା ରୁଜୁ କରିଛି।
