ଦେବଗଡ଼,୮।୪:(ଶଶାଙ୍କ ଶେଖର ଝାଙ୍କର): ବାରକୋଟ ଥାନା ଆମ୍ବକଟା ନିକଟସ୍ଥ ୪୯ ନମ୍ବର ଜାତୀୟ ରାଜପଥ ଉପରେ ଠିଆ ହୋଇଥିବା ଏକ ଧାନ ଅମଳ ମେଶିନ ବୋଝେଇ ଟ୍ରାକ୍ଟରକୁ ଏକ ହାଇୱା ଧକ୍କା ଦେବା ଫଳରେ ଧାନ ଅମଳ ମେଶିନ ଅପରେଟରଙ୍କ ମୃତ୍ୟୁ ଘଟିଛି । ମୃତ ଅପରେଟର ସମ୍ବଲପୁର ଜିଲା ଜମନକିରା ଥାନା ପଡିଆବାହାଳ ଗ୍ରାମର ଲାଲାଜୀ ପାତ୍ର ବୋଲି ଜଣାପଡିଛି । ସୂଚନା ଅନୁଯାୟୀ ଗତକାଲି ବିଳମ୍ବିତ ରାତିରେ ପଡିଆବାହାଳରୁ ଏକ ଧାନ ଅମଳ ମେଶିନକୁ ଏକ ଟ୍ରାକ୍ଟର ଯୋଗେ ଜଳେଶ୍ୱରକୁ ସ୍ଥାନାନ୍ତର କରାଯାଉଥିଲା । ରାତି ପ୍ରାୟ ୧ ଟାରେ କୌଣସି କାରଣରୁ ୪୯ ନମ୍ବର ଜାତୀୟ ରାଜପଥ ଆମ୍ବକଟା ନିକଟ ପୋଲ ଉପରେ ଉକ୍ତ ଧାନ ଅମଳ ମେଶିନ ବୋଝେଇ ଟ୍ରାକ୍ଟର ଅଟକି ଥିବା ବେଳେ ଦୃତ ଗତିରେ ଯାଉଥିବା ଏକ ହାଇୱା (ଓଡି-୦୯-ପି-୯୧୦୧) ଉକ୍ତ ଟ୍ରାକ୍ଟର ପଛପଟେ ଧକ୍କା ଦେଇଥିଲା । ଫଳରେ ଟ୍ରାକ୍ଟର ଓ ଟ୍ରାକ୍ଟରରେ ବସିଥିବା ଅପରେଟର ଲାଲାଜୀ ପୋଲ ତଳକୁ ଖସି ପଡି ଗୁରୁତର ଆହତ ହୋଇଥିଲେ । ଏଣେ ଦୁର୍ଘଟଣା ପରେ ହାଇୱା ଚାଳକ ଫେରାର ହୋଇଥିବା ବେଳେ ଲାଲାଜୀଙ୍କୁ ଉଦ୍ଧାର କରି ଦେବଗଡ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ମାତ୍ର ଅବସ୍ଥା ଗୁରୁତର ହେବାରୁ ଅଧିକ ଚିକିତ୍ସା ପାଇଁ ବୁର୍ଲା ଡାକ୍ତରଖାନା ସ୍ଥାନାନ୍ତର କରାଯାଉଥିଲା। ମାତ୍ର ସେଠାକୁ ନେବା ପୂର୍ବରୁ ଚିକିତ୍ସାଧିନ ଅବସ୍ଥାରେ ଲାଲାଜୀଙ୍କର ମୃତ୍ୟୂ ଘଟିଥିଲା । ଏନେଇ ବାରକୋଟ ଥାନା ପୋଲିସ ଏକ ମାମଲା ରୁଜୁ କରିବା ସହ ଦୁର୍ଘଟଣାଗ୍ରସ୍ତ ଧାନ ଅମଳ ମେଶିନ ବୋଝେଇ ଟ୍ରାକ୍ଟରକୁ ଜବତ କରି ଘଟଣାର ଅଧିକ ତଦନ୍ତ ଚଳାଇଛି।
