ଅମରପାଲି,୨୮।୮(ଡି.ଏନ.ଏ)-ସୁବର୍ଣ୍ଣପୁର ବନଖଣ୍ଡ ବୀରମହାରାଜପୁର ରେଞ୍ଜ ଅନ୍ତର୍ଗତ ହାତିଲିମୁଣ୍ଡା ବିଟର ଗୌଡଗାଡ ଗ୍ରାମରେ ହାତୀପଲ ପଶି ବ୍ୟାପକ ଧାନ ଫସଲ ନଷ୍ଟ କରିଛନ୍ତି । ବୁଧବାର ରାତିରେ ହାତୀପଲ ଆସି ଗ୍ରାମର ମାଗୁଣି ଦୀପ ଓ ରାତ୍ର ଦୀପଙ୍କର ପ୍ରାୟ ୩ ଏକର ଜମିର ଫସଲ ଦଳି ଚକଟି ନଷ୍ଟ କରିଛନ୍ତି । ଉକ୍ତ ହାତୀ ପଲରେ ପ୍ରାୟ ୫ରୁ ୬ଟି ହାତୀ ଥିବା ଜଣାପଡିଛି । ଚଳିତବର୍ଷ ବିଳମ୍ବରେ ହେଲେ ମଧ୍ୟ ଚାଷ ଭଲ ହୋଇଥିଲା । ମାତ୍ର ଏବେ ହାତୀପଲ ଗଁାକୁ ପଶି ଆସୁଥିବାରୁ ଚାଷୀ ଆତଙ୍କିତ ହୋଇ ପଡିଛନ୍ତି । ଏବେ ଧାନ ଗଛ ଖିର ଢୋକିବା ଆରମ୍ଭ କରୁଛି । ଏହି ସମୟରେ ହାତୀ ଉପଦ୍ରବ ଯୋଗୁ ଚାଷୀ ମହଲରେ ଭାଳେଣି ପଡିଯାଇଛି । ଏନେଇ ହାତିଲିମୁଣ୍ଡା ବନପାଳ ସୁନୀଲ ତରିଆଙ୍କୁ ପଚାରିବାରେ ଗତ ଦୁଇ ଦିନ ହେଲା ଗୌଡଗାଡ ସଂରକ୍ଷିତ ଜଙ୍ଗଲରୁ ହାତୀ ଆସି ଉକ୍ତ ଅଞ୍ଚଳରେ ଧାନଫସଲ ନଷ୍ଟ କରୁଛି । ଯଥାଶୀଘ୍ର ହାତୀ ଘଉଡାଇବା ସହିତ କ୍ଷୟକ୍ଷତିର ଆକଳନ କରାଯାଇ କ୍ଷତିପୂରଣ ପ୍ରଦାନ କରାଯିବ ବୋଲି କହିଥିଲେ ।
