ତେନ୍ତୁଳିଖୁଣ୍ଟି, ୨୧।୩(ଡି.ଏନ୍.ଏ.):ବରଡାଝୋଡି ଓ ଲଦିପଦର ଗ୍ରାମବାସୀ ନିଜର ମୌଳିକ ସମସ୍ୟା ସମାଧାନ ପାଇଁ ବାରମ୍ବାର ଦାବି କରିବା ସହ ଭୋଟ ବର୍ଜନ ଚେତାବନୀ ଦେଇଥିଲେ ମଧ୍ୟ ତାହାର ସୁଫଳ ମିଳିନାହିଁ। ଏହାର ବିରୋଧରେ ସେମାନେ ସୋମବାର ବିଡିଓ ଦୁର୍ଯୋଧନ ଭୋଇଙ୍କୁ ଭେଟି ନିଜ ରାଶନ ଓ ପେନସନ କାର୍ଡ ଫେରାଇ ଦେଇଥିଲେ। ସମସ୍ୟା ସମାଧାନ ନ ହେବା ଯାଏ କୌଣସି ସରକାରୀ ସାହାର୍ଯ୍ୟ ନେବେନାହିଁ ବୋଲି ଗ୍ରାମବାସୀ ଚେତାବନୀ ଦେଇଥିଲେ। ଅଳ୍ପ ଦିନ ମଧ୍ୟରେ ସମସ୍ତ ସମସ୍ୟା ସମାଧାନ କରାଯିବ ବୋଲି ବିଡିଓ ପ୍ରତିଶ୍ରୁତି ଦେଇଥିଲେ।
ସୂଚନାନୁଯାୟୀ, ବରଡାଝୋଡି ଓ ଲଦିପଦର ଗ୍ରାମରେ ମୌଳିକ ସମସ୍ୟା ରହିଛି। ପାନୀୟ ଜଳ ସମସ୍ୟା, ରାସ୍ତା, ବରଡାଝୋଡି ପ୍ରାଥମିକ ବିଦ୍ୟାଳୟ ପୁନଃ ଖୋଲିବାକୁ ସେମାନଙ୍କ ଦାବି ରହିଛି। ବାରମ୍ବାର ଦାବି ପୂରଣ ପାଇଁ ଜଣାଇବା ସତ୍ତ୍ୱେ କୌଣସି ସୁଫଳ ନ ମିଳିବାରୁ ସୋମବାର ଗ୍ରାମବାସୀ ବ୍ଲକ କାର୍ଯ୍ୟାଳୟ ଯାଇ ବିଡିଓଙ୍କୁ ଭେଟିଥିଲେ। ଲେଲି ଲହରା, ବିବନ ଜାନୀ, ମାଝି ଜାନୀ, ସମାରୁ ଜାନୀ, ରଥୀ ଜାନୀ, ସିନ୍ଧେଇ ଜାନୀ ପ୍ରମୁଖଙ୍କ ସହ ୧୦୦ରୁ ଊର୍ଦ୍ଧ୍ୱ ହିତାଧିକାରୀ ପେନଶନ, ରାସନ କାର୍ଡ ରଖି ଦାବି ପୂରଣ ନ ହେବା ପର୍ଯ୍ୟନ୍ତ କୌଣସି ସରକାରୀ ସାହାଯ୍ୟ ନେବେନାହିଁ ବୋଲି ଅଡ଼ି ବସିଥିଲେ। ବିଡିଓ ତୁରନ୍ତ ସହକାରୀ ଯନ୍ତ୍ରୀ ଆଶିଷ ପ୍ରଧାନ ଓ କନିଷ୍ଠ ଯନ୍ତ୍ରୀଙ୍କୁ ଡାକି ଏମ୍ଜିଏନ୍ଆର୍ଇଜିଏସ୍ରେ ଉକ୍ତ ଦୁଇଟି ଗ୍ରାମପାଇଁ ୨ଟିପ୍ରକଳ୍ପ ଅନୁମୋଦନ ପ୍ରକ୍ରିୟା କରାଇବା ସହ ସପ୍ତାହକ ମଧ୍ୟରେ ରାସ୍ତା କାମ ଆରମ୍ଭ ହେବ ବୋଲି କହିଥିଲେ। ଗାଁକୁ ଯାଇ ପାନୀୟ ଜଳ ର ସ୍ଥିତି ଯାଞ୍ଚ କରି ସମାଧାନ କରିବାକୁ ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ କନିଷ୍ଠ ଯନ୍ତ୍ରୀ କେ. ସନ୍ତୋଷଙ୍କୁ ପଠାଇ ଥିଲେ। ନଳକୂପ ଆଦିର ମରାମତି କରିବା ସହ ଆବଶ୍ୟକ ସ୍ଥଳେ ୭ ଦିନ ମଧ୍ୟରେ ନଳକୂପ ଖନନ କରିବାକୁ ନିର୍ଦ୍ଦେଶ ଦେଇଥିଲେ। ବିଇଓ ସୌମେନ୍ଦ୍ର ଭୋମିକଙ୍କୁ ୨୦୨୩ -୨୪ ଶିକ୍ଷା ବର୍ଷରୁ ବନ୍ଦ ଥିବା ବରଡାଝୋଡି ପ୍ରାଥମିକ ବିଦ୍ୟାଳୟ ଖୋଲିବାକୁ କହିଥିଲେ। ସେ ଏଥିରେ ସମ୍ମତି ପ୍ରକାଶ କରିଥିବା ଜଣାପଡ଼ିଛି। ସାତ ଦିନ ମଧ୍ୟରେ ସମସ୍ତ ଦାବି ପୂରଣ ପ୍ରତିଶ୍ରୁତି ପରେ ଗ୍ରାମବାସୀ ନିଜ ନିଜ କାର୍ଡ ନେଇ ଫେରିଥିଲେ। ବିଇଓ ଭୌମିକଙ୍କୁ ସ୍କୁଲ ଖୋଲିବା ସମ୍ପର୍କରେ ପଚାରିବାରୁ ପିଲା ସଂଖ୍ୟା କମ ଥିବାରୁ ସ୍କୁଲ ବନ୍ଦ କରାଯାଇଛି। ତାହାକୁ ଖୋଲିବା ପାଇଁ ସରକାରୀ ନିର୍ଦ୍ଦେଶ ଆସିନି ବୋଲି କହିଛନ୍ତି। ବଡିଓଙ୍କ ସହ ଭୀମସେନ ପାଣିଗ୍ରାହୀ, ଦିଲ୍ଲୀପ ପ୍ରଧାନୀ ଓ ପ୍ରହଲ୍ଲାଦ ହିଆଲ ଜନତାଙ୍କ ପାଇଁ ଆଲୋଚନାରେ ସହଯୋଗ କରିଥିଲେ।
