ଗୁଣପୁର,୧୮।୮(ସୁଜାତା ପାଢ଼ୀ)- ରାୟଗଡ଼ା ଜିଲାରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ଜଣେ ପୋଲିସ କନଷ୍ଟେବଳଙ୍କ ପ୍ରାଣହାନି ହୋଇଛି। କୁମ୍ଭିକୋଟା ଫାଣ୍ଡିରେ କାର୍ଯ୍ୟରତ କନଷ୍ଟେବଳ କିଶୋର ପତି (୫୦) ଏକ ଦୁର୍ଘଟଣାର ଶିକାର ହୋଇ ପ୍ରାଣ ହରାଇଛନ୍ତି।
ମିଳିଥିବା ସୂଚନା ମୁତାବକ, କିଶୋର ରାୟଗଡ଼ାରେ ନିଜର ଡ୍ୟୁଟି ସାରି ସନ୍ଧ୍ୟା ସମୟରେ ବାଇକ୍ ଯୋଗେ ରାୟଗଡ଼ାରୁ ଗୁଣପୁର ଅଭିମୁଖେ ଫେରୁଥିଲେ। ସେହି ସମୟରେ ରାମନାଗୁଡା ବ୍ଲକ ଅନ୍ତର୍ଗତ ପେନେକାମ ଗ୍ରାମ ନିକଟରେ ତାଙ୍କ ବାଇକ୍ଟି ଏକ ଅଟୋ ସହ ମୁହାମୁହିଁ ଧକ୍କା ହୋଇଥିଲା। ଏହି ଭୟଙ୍କର ଦୁର୍ଘଟଣାରେ କିଶୋର ଗୁରୁତର ହୋଇଥିଲେ।
ଦୁର୍ଘଟଣା ପରେ ସ୍ଥାନୀୟ ଲୋକଙ୍କ ସହାୟତାରେ ତାଙ୍କୁ ଉଦ୍ଧାର କରାଯାଇ ତୁରନ୍ତ ଗୁଣପୁର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ମାତ୍ର ସେଠାରେ ଡାକ୍ତର ତାଙ୍କୁ ମୃତ ବୋଲି ଘୋଷଣା କରିଥିଲେ।
ମୃତ କନଷ୍ଟେବଳ କିଶୋର ପତି ଗୁଣପୁରଠାରେ ସପରିବାର ସହ ରହି ଆସୁଥିଲେ ଏବଂ ତାଙ୍କ ପରିବାରରେ ପତ୍ନୀ ଓ ଦୁଇ ଝିଅ ଅଛନ୍ତି। ଏହି ଅଘଟଣ ଖବର ପାଇବା ପରେ ଗୁଣପୁର ଆଦର୍ଶ ଥାନା ଆଇଆଇସି କେ.କେ.ବିକେ କଅଁରଙ୍କ ସମେତ ଅନ୍ୟାନ୍ୟ ପୋଲିସ କର୍ମଚାରୀ ତବ୍କ୍ଷଣାତ୍ ହସ୍ପିଟାଲରେ ପହଞ୍ଚିଥିଲେ। ବୁଧବାର ମୃତଦେହର ବ୍ୟବଚ୍ଛେଦ (ଅଟୋପ୍ସି) କରାଯିବ ବୋଲି ଜଣାପଡ଼ିଛି। ଜଣେ କର୍ତ୍ତବ୍ୟନିଷ୍ଠ ପୋଲିସ କର୍ମଚାରୀଙ୍କ ଏପରି ଅକାଳ ବିୟୋଗରେ ସ୍ଥାନୀୟ ଅଞ୍ଚଳରେ ଏବଂ ପୋଲିସ ବିଭାଗରେ ଶୋକର ଛାୟା ଖେଳିଯାଇଛି।
