ନୂଆଦିଲ୍ଲୀ, ୨୦।୧୧: ୨୦୨୭ରେ ଆୟୋଜିତ ହେବ ଦିନିକିଆ ବିଶ୍ୱକପ। ଏହି ବଡ଼ ଟୁର୍ନାମେଣ୍ଟରେ ରୋହିତ ଶର୍ମା ଓ ବିରାଟ କୋହଲି ଖେଳିବାକୁ ନେଇ ଦୀର୍ଘଦିନ ଧରି ସସ୍ପେନ୍ସ ଲାଗି ରହିଛି। ଉଭୟ ଖେଳାଳି ପ୍ରାୟ ପ୍ରତ୍ୟେକ ସିରିଜର ଭଲ ପ୍ରଦର୍ଶନ କରି ଦଳରେ ନିଜ ସ୍ଥାନ ବଜାୟ ରଖିବାକୁ ଉଦ୍ୟମ କରିଆସୁଛନ୍ତି। ତେବେ ନ୍ୟୁଜିଲାଣ୍ଡ ବିପକ୍ଷ ସଦ୍ୟସମାପ୍ତ ସିରିଜରେ ନିରାଶାଜନକ ପ୍ରଦର୍ଶନ ପରେ ପୁଣି ଥରେ ଉଭୟଙ୍କ ସ୍ଥାନକୁ ନେଇ ପ୍ରଶ୍ନ ଉଠିଥିଲା। ଏହାରି ଭିତରେ BCCIର ଜଣେ ଅଧିକାରୀ ସ୍ପଷ୍ଟ କରିଛନ୍ତି ଯେ, ଏହି ଦୁଇ ମହାନ ଖେଳାଳି ୨୦୨୭ ବିଶ୍ୱକପ ଖେଳିବାର ସମ୍ଭାବନା ରହିଛି।
ନ୍ୟୁଜିଲାଣ୍ଡ ବିପକ୍ଷ ସଦ୍ୟସମାପ୍ତ ଦିନିକିଆ ସିରିଜର ୪ଟି ପାଳିରେ ରୋହିତ ଶର୍ମା ମାତ୍ର ୩୦ ରନ ସଂଗ୍ରହ କରିଥିବା ବେଳେ ବିରାଟ କୋହଲି ୮୬ ରନ କରିଥିଲେ। ଉଭୟଙ୍କ ପ୍ରଦର୍ଶନକୁ ନେଇ ନିରାଶା ପ୍ରକାଶ ପାଇଥିଲା। ତେବେ ଦୈନିକ ଜାଗରଣର ଏକ ରିପୋର୍ଟ ଅନୁଯାୟୀ, BCCI ଅଧିକାରୀମାନେ ରୋହିତ ଓ ବିରାଟଙ୍କ ଉପରେ ଭରସା ରଖିଛନ୍ତି। ଯଦି ଉଭୟ ୨୦୨୭ ବିଶ୍ୱକପ ଖେଳିବାକୁ ଚାହାନ୍ତି ଏବଂ ସେମାନଙ୍କ ଫିଟନେସ୍କୁ ନେଇ କୌଣସି ସମସ୍ୟା ନଥାଏ, ତେବେ ଦକ୍ଷିଣ ଆଫ୍ରିକା ଯାଇ ଏହି ମହାକୁମ୍ଭରେ ଖେଳିପାରିବେ।
BCCIର ଜଣେ ପଦାଧିକାରୀ କହିଛନ୍ତି ଯେ, ଦକ୍ଷିଣ ଆଫ୍ରିକାର ପରିସ୍ଥିତିରେ ଟିମ ଇଣ୍ଡିଆକୁ ରୋହିତ ଶର୍ମା ଓ ବିରାଟ କୋହଲିଙ୍କ ଭଳି ଅଭିଜ୍ଞ ବ୍ୟାଟରଙ୍କ ଆବଶ୍ୟକତା ରହିଛି। ଏହି ଦୁଇ ଖେଳାଳିଙ୍କ ବିନା ଭାରତ ପାଇଁ ବିଶ୍ୱକପ ଜିତିବା କଷ୍ଟକର ହୋଇପାରେ।
BCCI ସୂତ୍ରରୁ କୁହାଯାଇଛି, ଏହି ଦୁଇ ଜଣ ମହାନ ଖେଳାଳି। ସେମାନେ କେତେ ଦିନ ପର୍ଯ୍ୟନ୍ତ କ୍ରିକେଟ ଖେଳିବେ, ତାହା ସେମାନେ ନିଜେ ନିଷ୍ପତ୍ତି ନେବେ। ତେବେ ବିଶ୍ୱକପ ଅଭିଯାନ କଥା ଯଦି କହିବା, ତେବେ ମୋ ମତରେ ୨୦୨୭ରେ ଆମକୁ ସେମାନଙ୍କର ଆବଶ୍ୟକତା ପଡ଼ିବ। ଦକ୍ଷିଣ ଆଫ୍ରିକାର କଠିନ ପିଚ୍ରେ ସେମାନେ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହେବେ। ସେମାନଙ୍କ ଅଭିଜ୍ଞତା ଦଳ ପାଇଁ କାମରେ ଆସିବ।
ରିପୋର୍ଟ ଅନୁଯାୟୀ, ଅଜିତ ଅଗରକରଙ୍କ ହଠାତ୍ ବିଦାୟ ପରେ ଟିମ ମ୍ୟାନେଜମେଣ୍ଟର କୌଣସି ସଦସ୍ୟ ଏହି ପ୍ରସଙ୍ଗରେ ବିପଦ ମୁଣ୍ଡାଇବାକୁ ଚାହୁଁନାହାନ୍ତି। ରୋହିତ ଓ ବିରାଟଙ୍କ ଭବିଷ୍ୟତକୁ ନେଇ ନିଷ୍ପତ୍ତି ଏବେ ଚୟନକର୍ତ୍ତା କିମ୍ବା ଟିମ ମ୍ୟାନେଜମେଣ୍ଟ ହାତରେ ନାହିଁ ବୋଲି ଜଣେ ସୂତ୍ର ଦାବି କରିଛନ୍ତି।
ସୂତ୍ରର କହିବା ଅନୁଯାୟୀ, ଆମେ BCCIକୁ ଯାହା ବାର୍ତ୍ତା ଦେବାର ଥିଲା, ତାହା ପୂର୍ବରୁ ଦେଇସାରିଛୁ। BCCI ପକ୍ଷରୁ ଆମକୁ ଯେଉଁ ବାର୍ତ୍ତା ମିଳିବାର ଥିଲା, ତାହା ମଧ୍ୟ ମିଳିସାରିଛି। ଆମେ ଭାବୁନାହୁଁ ଯେ, ଏହି ମାମଲା ଏବେ ଚୟନକର୍ତ୍ତା କିମ୍ବା ଟିମ ମ୍ୟାନେଜମେଣ୍ଟ ହାତରେ ରହିଛି।
ଏହି ସମସ୍ତ ତଥ୍ୟରୁ ସଙ୍କେତ ମିଳୁଛି ଯେ, ୨୦୨୭ ଦିନିକିଆ ବିଶ୍ୱକପରେ ରୋହିତ ଶର୍ମା ଓ ବିରାଟ କୋହଲିଙ୍କ ଅଭିଜ୍ଞତା ଟିମ ଇଣ୍ଡିଆ ପାଇଁ ବେଶ ଗୁରୁତ୍ୱପୂର୍ଣ୍ଣ ହୋଇପାରେ। ତେବେ ବିଶ୍ୱକପ ଦଳରେ ସେମାନଙ୍କ ସ୍ଥାନ ନିଶ୍ଚିତ କି ନାହିଁ, ତାହା ଆନୁଷ୍ଠାନିକ ଘୋଷଣା ପରେ ହିଁ ସ୍ପଷ୍ଟ ହେବ।
Dharitri – Odisha’s No.1 Odia Daily

