ଚେନ୍ନାଇ,୧୩।୧୦: ଦକ୍ଷିଣ ଭାରତୀୟ ଚଳଚ୍ଚିତ୍ର ଜଗତର ଲୋକପ୍ରିୟ ଅଭିନେତା ବିଜୟ ଦେବରକୋଣ୍ଡା ନିକଟରେ ଅଭିନେତ୍ରୀ ରଶ୍ମିକା ମନ୍ଧାନାଙ୍କ ସହ ଅଭିନେତା ତଥା ମୁଖ୍ୟମନ୍ତ୍ରୀ ଥାଲାପତି ବିଜୟଙ୍କୁ ଭେଟିଛନ୍ତି। ଏହି ତିନି ତାରକାଙ୍କ ମଧ୍ୟରେ ହୋଇଥିବା ସାକ୍ଷାତ ବେଶ ସ୍ବତନ୍ତ୍ର ଥିଲା। ରଶ୍ମିକା ସୋସିଆଲ ମିଡିଆରେ ଏହି ସାକ୍ଷାତର ଫଟୋ ଶେୟାର କରିବା ସହ ଥାଲାପତି ବିଜୟଙ୍କ ପ୍ରଶଂସା କରି ଏକ ସ୍ବତନ୍ତ୍ର ବାର୍ତ୍ତା ମଧ୍ୟ ଲେଖିଛନ୍ତି।
ରଶ୍ମିକା ଇନଷ୍ଟାଗ୍ରାମରେ ଦୁଇଟି ଫଟୋ ଶେୟାର କରିଛନ୍ତି। ପ୍ରଥମ ଫଟୋରେ ତିନିଜଣ ହସମୁଖ ମୁଦ୍ରାରେ ନଜର ଆସୁଛନ୍ତି; ମଝିରେ ଛିଡ଼ା ହୋଇଥିବା ଥାଲାପତି ବିଜୟ ଉଭୟ ରଶ୍ମିକା ଏବଂ ବିଜୟ ଦେବରକୋଣ୍ଡାଙ୍କ କାନ୍ଧ ଉପରେ ହାତ ରଖିଛନ୍ତି। ଦ୍ୱିତୀୟ ଫଟୋରେ ବିଜୟ ଦେବରକୋଣ୍ଡା ଥାଲାପତି ବିଜୟଙ୍କୁ ଆଲିଙ୍ଗନ କରୁଥିବା ଦେଖିବାକୁ ମିଳୁଥିବା ବେଳେ ପଛପଟେ ରଶ୍ମିକା ହସୁଥିବାର ନଜର ଆସୁଛନ୍ତି।
ଏହି ଫଟୋଗୁଡ଼ିକ ଶେୟାର କରି ରଶ୍ମିକା କ୍ୟାପସନରେ ଲେଖିଛନ୍ତି, ‘ବହୁତ ଦିନ ପରେ ବିଜୟ ସାରଙ୍କୁ ଭେଟିବାକୁ ଯାଇଥିଲି। ଏହି ଯାତ୍ରା ବାସ୍ତବରେ ଅତୁଳନୀୟକେବେଠାରୁ ଯେ ତାଙ୍କୁ ପସନ୍ଦ କରିଆସୁଛି ତାହା ମୋର ମନେ ମଧ୍ୟ ନାହିଁ, ସେଠାରୁ ଆରମ୍ଭ କରି ତାଙ୍କ ସହ କାମ କରିବାର ସୁଯୋଗ ପାଇବା ଏବଂ ଆଜି ଜଣେ ମୁଖ୍ୟମନ୍ତ୍ରୀ ଭାବରେ ତାଙ୍କୁ ସମ୍ମାନ ଜଣାଇବା ପର୍ଯ୍ୟନ୍ତ। ତାଙ୍କର ଏହି ଯାତ୍ରା ପ୍ରକୃତରେ ଅସାଧାରଣ। ସାର୍, ଆପଣଙ୍କ ପାଇଁ ସର୍ବଦା ଅନେକ ଭଲପାଇବା ଓ ଶୁଭେଚ୍ଛା ରହିଲା।’
ବିଜୟ ଦେବରକୋଣ୍ଡା ମଧ୍ୟ ନିଜ ଇନଷ୍ଟାଗ୍ରାମ ଆକାଉଣ୍ଟରେ ଏହି ସାକ୍ଷାତର ଫଟୋ ଶେୟାର କରିଛନ୍ତି। ଥାଲାପତି ବିଜୟଙ୍କ ପ୍ରଶଂସା କରି ସେ ଲେଖିଛନ୍ତି, ‘ଥାଲାପତି ବିଜୟ ସାରଙ୍କ ସହ ସମୟ ବହୁତ ଭଲ କଟିଲା। ଦିନସାରା କାମର କ୍ଳାନ୍ତି ସତ୍ତ୍ୱେ ସେ ଆମକୁ ବହୁତ ଆପଣାର ଭାବେ ସ୍ବାଗତ କଲେ ଏବଂ ଜୀବନ, କାମ ତଥା ଦୁନିଆ ବିଷୟରେ ନିଜର ବ୍ୟକ୍ତିଗତ ଚିନ୍ତାଧାରା ବାଣ୍ଟିଲେ। ମାତ୍ର ଗୋଟିଏ ସାକ୍ଷାତରେ ହିଁ ସେ ମୋର ପ୍ରିୟ ବ୍ୟକ୍ତି ହୋଇଗଲେ। ପୁନର୍ବାର ଭେଟ ହେବା ପର୍ଯ୍ୟନ୍ତମୋର ଭଲପାଇବା ଓ ସମ୍ମାନ ରହିଲା।’
ରଶ୍ମିକା ମନ୍ଧାନାଙ୍କ ଲୁକ କଥା କହିଲେ, ସେ ଏକ ପାରମ୍ପାରିକ ପୋଷାକରେ ନଜର ଆସିଥିଲେ। ସେ ଏକ ବାଇଗଣୀ ରଙ୍ଗର ସାଟିନ ଶାଢ଼ୀ ପିନ୍ଧିଥିଲେ, ଯେଉଁଥିରେ ଥିବା ସୁନେଲି କାରୁକାର୍ଯ୍ୟ ତାଙ୍କ ରୂପକୁ ଏକ ରାଜକୀୟ ଛାପ ଦେଇଥିଲା। ସେ ଏହି ଶାଢ଼ୀ ସହିତ ମେଳ ଖାଉଥିବା ବ୍ଲାଉଜ ପିନ୍ଧିଥିଲେ। ଗଳାରେ ଚୋକର୍ ହାର, ଛୋଟ କାନଫୁଲ ଏବଂ ହାତରେ ଚୁଡ଼ି ତାଙ୍କ ସୌନ୍ଦର୍ଯ୍ୟକୁ ଆହୁରି ବଢ଼ାଇ ଦେଇଥିଲା। ତାଙ୍କର ଲମ୍ବା ଖୋଲା କେଶ, କପାଳରେ ଏକ ଛୋଟ ବିନ୍ଦି ଏବଂ ମୁହଁରେ ଥିବା ହସ ତାଙ୍କ ପାରମ୍ପାରିକ ପୋଷାକରେ ଏକ ସ୍ବତନ୍ତ୍ର ଆକର୍ଷଣ ଯୋଡ଼ିଥିଲା।
ଅନ୍ୟପକ୍ଷରେ, ବିଜୟ ଦେବରକୋଣ୍ଡା ଏକ ବେଜ (ହାଲୁକା ମାଟିଆ) ରଙ୍ଗର ବନ୍ଦଗଲା ଜ୍ୟାକେଟ ଏବଂ କଳା ରଙ୍ଗର ଟ୍ରାଉଜର୍ ପିନ୍ଧିଥିବାର ଦେଖିବାକୁ ମିଳିଥିଲା। ତାଙ୍କ ଜ୍ୟାକେଟର ଚମତ୍କାର ଡିଜାଇନ ଏବଂ କଳା ଟ୍ରାଉଜରର ମେଳ ତାଙ୍କୁ ଏକ ଆକର୍ଷଣୀୟ ଓ ସ୍ବତନ୍ତ୍ର ଲୁକ ଦେଇଥିଲା। ସେହିପରି, ଥାଲାପତି ବିଜୟ ଏକ ନେଭି ବ୍ଲୁ ରଙ୍ଗର ଫୁଲ-ସ୍ଲିଭ ସାର୍ଟ ସହିତ କଳା ଟ୍ରାଉଜର୍ ପିନ୍ଧିଥିଲେ; ତାଙ୍କର ଏହି ପୋଷାକ ବେଶ ସରଳ ହେଲେ ମଧ୍ୟ ବେଶ ଆକର୍ଷଣୀୟ ଥିଲା।
