ଫୁଲବାଣୀ,୮ା୧(ରାକେଶ କୁମାର ରାଉତ): ଜଣେ ନାବାଳିକାଙ୍କୁ ଗଣବଳାତ୍କାର କରିବା ଘଟଣାର ରାୟ ବୁଧବାର ପ୍ରକାଶ ପାଇଛି। ଏହି ମାମଲାର ବିଚାର କରି ଫୁଲବାଣୀ ସ୍ବତନ୍ତ୍ର ପୋକ୍ସୋ କୋର୍ଟ ବିଚାରପତି ରାଜେଶ ଦାସ ଅଭିଯୁକ୍ତଙ୍କୁ ୨୦ ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି। ଏଥିସହ ଜରିମାନା ୨୦ ହଜାର ଟଙ୍କା ଏବଂ ଅନାଦେୟ ଅଧିକ ୬ ମାସ ଜେଲ୍ ଭୋଗିବାକୁ ରାୟରେ ଉଲ୍ଲେଖ କରିଛନ୍ତି। ଅଭିଯୁକ୍ତ ଜଣକ ହେଲେ ଫୁଲବାଣୀ ଟାଉନ ଥାନା ଅଞ୍ଚଳର ସୁରଥ ବେହେରା। ଏହି ଘଟଣାରେ ଅନ୍ୟତମ ଅଭିଯୁକ୍ତ ଅଗସ୍ତି ବେହେରା ଫେରାର ଅଛନ୍ତି।
ମିଳିଥିବା ସୂଚନାନୁସାରେ, ୨୦୨୦ ନଭେମ୍ବର ୨୮ରେ ସମ୍ପୃକ୍ତ ନାବାଳିକା ଜଣକ ସ୍ଥାନୀୟ ଆଇଟିଆଇ ପାଖରେ ରହୁଥିବା ତାଙ୍କ ସାଙ୍ଗ ଘରକୁ ହୋମ୍ଓ୍ବାର୍କ କରିବାକୁ ଯାଉଥିଲେ। ଏହି ସମୟରେ ତାଙ୍କୁ ଚିହ୍ନିଥିବା ସୁରଥ ଏବଂ ଅଗସ୍ତି ଏକ ଗାଡ଼ିରେ ଆସି ଆମେ ଛାଡ଼ି ଦେବୁ କହି ଗାଡ଼ିରେ ବସାଇଥିଲେ। ସେମାନେ ଏକ ହୋଟେଲରେ ଖାଇବା ପରେ ଛାଡ଼ି ଦେବାକୁ କହି ପାଖ ଭେଟଖୋଲ ଘାଟିକୁ ନେଇ ଯାଇଥିଲେ। ନାବାଳିକା ଜଣକ ମୋତେ ଏଠାକୁ କାହିଁ ଆଣିଲ ବୋଲି କହିବାରୁ ତାଙ୍କୁ ଜବରଦସ୍ତ ପାଖ ଜଙ୍ଗଲକୁ ନେଇ ଯାଇଥିଲେ। ସେଠାରେ ଅଗସ୍ତି ନାବାଳିକାଙ୍କୁ ମାଡ଼ି ବସି ଧରିବା ପରେ ସୁରଥ ଜବରଦସ୍ତି ବଳାତ୍କାର କରିଥିଲେ। ଏ ନେଇ କାହାକୁ କହିଲେ ଜୀବନରୁ ମାରି ଦେବାକୁ ଧମକ ଦେବା ସହ ତାଙ୍କୁୁ ଆଣି ଆଇଟିଆଇ ପାଖରେ ଛାଡ଼ି ଚାଲି ଯାଇଥିଲେ। ଡିସେମ୍ବର ୨୪ରେ ନାବାଳିକା ଜଣକ ଏ ନେଇ ତାଙ୍କ ଆଈ ମା’ଙ୍କୁ କହିଥିଲେ। ଘଟଣା ଜାଣିବା ପରେ ନାବାଳିକାଙ୍କ ବାପା ଟାଉନ ଥାନାରେ ଏତଲା ଦେଇଥିଲେ। ପୋଲିସ ଏ ନେଇ ୧୬୬/୨୦ରେ ମାମଲା ରୁଜୁ କରି ଘଟଣା ତଦନ୍ତ ଆରମ୍ଭ କରିଥିଲା। ପରେ ଉଭୟଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ବେଲ୍ରେ ଆସିବା ପରେ ଅଗସ୍ତି ଫେରାର ହୋଇ ଯାଇଥିଲେ। ମୋଟ୍ ୧୧ ଜଣଙ୍କ ସାକ୍ଷ୍ୟ ପ୍ରମାଣ, ମେଡିକାଲ ରିପୋର୍ଟକୁ ଆଧାର କରି ବିଚାରପତି ଉପରୋକ୍ତ ଦଣ୍ଡାଦେଶ ଦେଇଛନ୍ତି।
ସେହିପରି ପୀଡ଼ିତାଙ୍କୁ କ୍ଷତିପୂରଣ ବାବଦରେ ୧୦ ଲକ୍ଷ ଟଙ୍କା ଦେବାକୁ ଜିଲା ଆଇନ ପ୍ରାଧିକରଣଙ୍କୁ ନିର୍ଦ୍ଦେଶ ଦେଇଛନ୍ତି। ସରକାରଙ୍କ ପକ୍ଷରୁ ସ୍ବତନ୍ତ୍ର ପିପି ଅସୀମ ପ୍ରହରାଜ ମାମଲା ପରିଚାଳନା କରୁଥିଲେ।
