ଭୁବନେଶ୍ୱର,୨୪।୬(ବ୍ୟୁରୋ): ବରିଷ୍ଠ ଅଭିନେତା ରାଇମୋହନ ପରିଡ଼ାଙ୍କ ପରଲୋକ ହୋଇଛି। ଶୁକ୍ରବାର ମଧ୍ୟାହ୍ନରେ ଭୁବନେଶ୍ୱର ପ୍ରାଚୀ ବିହାରସ୍ଥିତ ଘରୁ ତାଙ୍କର ଝୁଲନ୍ତା ମୃତଦେହ ପୋଲିସ ଜବତ କରିଛି। ରାଇମୋହନ ଆତ୍ମହତ୍ୟା କରିଥିବା ବେଳେ କେଉଁ କାରଣ ପାଇଁ ସେ ଏଭଳି ପଦକ୍ଷେପ ନେଲେ ତାହା ସ୍ପଷ୍ଟ ହୋଇନାହିଁ। ତେବେ ତାଙ୍କ ଯେଉଁ ଦୁଇ ଆଖିକୁ ଦେଖି ଦର୍ଶକ ଡରୁଥିଲେ ସେହି ଆଖି ଦୁଇକୁ ଅନ୍ୟ ପାଇଁ ସେ ଉତ୍ସର୍ଗ କରିଦେଇଛନ୍ତି । ରାଇମୋହନ ଚକ୍ଷୁ ଦାନ କରିଥିବା ନେଇ ବରିଷ୍ଠ କଳାକାର ଅଶ୍ରୁମୋଚନ ମହାନ୍ତି ସୂଚନା ଦେଇଛନ୍ତି । ତାଙ୍କ ବିୟୋଗ ଖବର ରାଜ୍ୟବାସୀଙ୍କୁ ମର୍ମାହତ କରିଛି । ସମସ୍ତଙ୍କୁ ଶୋକରେ ସ୍ତମ୍ଭୀଭୁତ କରିଛି ।
