ସୋହେଲା,୧୦ା୧୦ (ଅଶ୍ୱିନୀ କୁମାର ପାତ୍ର): ବରଗଡ଼ ଜିଲା ସୋହେଲା ଥାନା ଅନ୍ତର୍ଗତ ପାଣ୍ଡକିପାଲି ଗ୍ରାମରେ ଜଣେ ଶ୍ରମିକଙ୍କ ମୃତ୍ୟୁର ଠିକ୍ ଏକ ମାସ ପରେ ଏକ ସାଂଘାତିକ ହତ୍ୟାକାଣ୍ଡର ପର୍ଦ୍ଦାଫାଶ ହୋଇଛି। ସ୍ୱାମୀଙ୍କୁ ହତ୍ୟା କରାଯାଇଥିବା ନେଇ ପତ୍ନୀ ଥାନାରେ ଏତଲା ଦେବା ପରେ ସୋହେଲା ପୋଲିସ ମାଟିତଳୁ ଗଳିତ ମୃତଦେହ ଉଦ୍ଧାର କରିବା ସହ ୩ ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ ରଜନୀ ସାହୁ, ଦିନେଶ ସାହୁ ଓ ବୁଲୁ ସାହୁ।
ପ୍ରକାଶ ଯେ, ଗତ ସେପ୍ଟେମ୍ବର ୮ ତାରିଖ ସକାଳେ ପାଣ୍ଡକିପାଲିର ଶ୍ରମିକ ଅମୃତ ବର୍ଗେଙ୍କୁ କିଛି କାମ ଅଛି କହି ଅଭିଯୁକ୍ତମାନେ ଘରୁ ଡାକି ନେଇଥିଲେ। ଏହାର କିଛି ସମୟ ପରେ ରଜନୀ ସାହୁ ଅମୃତଙ୍କ ପତ୍ନୀ ବିଦେଶିନୀ ବର୍ଗେଙ୍କୁ ସ୍ୱାମୀଙ୍କ ଦେହ ଖରାପ ଅଛି ବୋଲି କହି କ୍ଷେତକୁ ନେଇଥିଲେ। ସେଠାରେ ଅମୃତ ମୃତବତ୍ ବେହୋସ ହୋଇ ପଡ଼ିଥିବା ଦେଖିବାକୁ ମିଳିଥିଲା। ତାଙ୍କୁ ପ୍ରଥମେ ପାଣ୍ଡକିପାଲି ଓ ପରେ ସୋହେଲା ଡାକ୍ତରଖାନାକୁ ନିଆଯାଇଥିଲେ ହେଁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ଏହାପରେ ଅଭିଯୁକ୍ତ ରଜନୀ ସାହୁ ବିଦେଶିନୀଙ୍କୁ ଧମକଚମକ ଦେଇ ମୃତଦେହକୁ ଘରକୁ ଫେରାଇ ଆଣିବା ସହ ତରବରିଆ ଭାବେ ମାଟିତଳେ ପୋତିବାର ବ୍ୟବସ୍ଥା କରିଥିଲେ। ପୂର୍ବରୁ ପ୍ରତିଶ୍ରୁତି ମୁତାବକ ଆର୍ଥିକ ସହାୟତା ନ ପାଇବାରୁ ଏବଂ ନିରନ୍ତର ଧମକ ଯୋଗୁ ହତାଶ ହୋଇ ବିଦେଶିନୀ ସମସ୍ତ ପୂର୍ବ ଘଟଣା ନିଜ ଝିଅକୁ ଜଣାଇଥିଲେ। ଝିଅଙ୍କ ସହ ଆଲୋଚନା ପରେ ଗତକାଲି (ଅକ୍ଟୋବର ୯) ବିଦେଶିନୀ ସୋହେଲା ଥାନାରେ ଏତଲା ଦେଇଥିଲେ।
ଏତଲା ପାଇବା କ୍ଷଣି ସୋହେଲା ପୋଲିସ ତୁରନ୍ତ ମୃତଦେହପୋତାଯାଇଥିବା ସ୍ଥାନକୁ ଜଗି ରହିବା ସହ ଅଭିଯୁକ୍ତମାନଙ୍କୁ ଗିରଫ କରିଥିଲା। ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି ପଦ୍ମପୁର SDPO ସୋହେଲା ଥାନାରେ ପହଞ୍ଚି ତଦନ୍ତର ନିରୀକ୍ଷଣ କରିଥିଲେ। ଆଜି ସକାଳେ ପୋଲିସ ଓ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ମାଟିତଳୁ ଗଳିତ ମୃତଦେହ ଉଦ୍ଧାର କରି ପୋଷ୍ଟମର୍ଟମ ପାଇଁ ପଠାଇଛନ୍ତି।
ଏହି ଘଟଣାରେ ସୋହେଲା ପୋଲିସ ଭାରତୀୟ ନ୍ୟାୟ ସଂହିତା (BNS) ଏବଂ SC/ST ଆକ୍ଟର ବିଭିନ୍ନ ଧାରା ୧୦୩(୧),୨୩୮(a ),୩(୫),୩(୧)r, ୩ (୧)(s)୩(୨)VA ରେ ମାମଲା ରୁଜୁ କରିଛି। ଇନ୍ସପେକ୍ଟର ଶ୍ୟାମାନନ୍ଦ ନାୟକଙ୍କୁ ଏହି ମାମଲାର ତଦନ୍ତକାରୀ ଅଫିସର ଭାବେ ନିଯୁକ୍ତ କରାଯାଇଥିବା ନେଇ IIC ହରିଶଙ୍କର ଭୋଇ ସୂଚନା ଦେଇଛନ୍ତି।
