ପୁରୁଷୋତ୍ତମପୁର, ୧।୧୨(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ଥାନା ଅନ୍ତର୍ଗତ ଚିଙ୍ଗୁଡିଘାଇ ଗ୍ରାମରେ ପୂର୍ବ ଶତ୍ରୁତାକୁ ନେଇ ଗୁଳିକାଣ୍ଡ ଘଟଣା ଘଟିଛି। ଏଥିରେ କେହି ଆହାତ ହୋଇ ନ ଥିଲେ ହେଁ ପୋଲିସ ଘଟଣସ୍ଥଳରୁ ଫୁଟିଥିବା ଗୁଳିର ଦୁଇଟି ଖୋକା ସହ ଗୋଟିଏ ଦେଶି ବନ୍ଧୁକ, ଗୋଟିଏ ଜୀବନ୍ତ ଗୁଳି, ଦୁଇ ଭୂଜାଲି, ଗୋଟିଏ ମୋବାଇଲ, ଦୁଇ ମୋଟର ସାଇକେଲକୁ ଜବତ କରିଛି। ଏଥିସହ ୫ଜଣ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତଙ୍କ ମାମଲା ନଂ ୩୨୯/୨୦ପ୍ରକାରେ ମଙ୍ଗଳବାର କୋର୍ଟ ଚାଲାଣ କରାଯାଇଛି। ତେବେ ଗିରଫ ଯୁବକ ହେଲେ ଧୋବା ପଲ୍ଲୀ ଗ୍ରାମର ହର୍ଷ ରାଉତ, ସୁରେଶ ରାଉତ,ଦଣ୍ଡପାଣି ନାୟକ, ବିକାଶ ରାଉତ ଓ ଲିପୁନ ରାଉତ। ଏକ ଖବରଦାତା ସମ୍ମିଳନୀରେ ଥାନା ଅଧିକାରୀ ଜଗନ୍ନାଥ ମଲ୍ଲିକ ଓ ଏସ୍ଆଇ ସୁନିଲ କୁମାର ପ୍ରଧାନ କହିଛନ୍ତି, ଚିଙ୍ଗୁଡିଘାଇ ଗ୍ରାମର ସୁଶାନ୍ତ ନାୟକ ଗତ ୨୭ ତାରିଖରେ କରିଥିବା ଅଭିଯୋଗ ପ୍ରକାରେ ୨୬ ତାରିଖ ରାତ୍ରରେ ୬ଜଣ ଯୁବକ ୩ ଗୋଟି ମୋଟର ସାଇକେଲରେ ବନ୍ଧୁକ ଓ ଭୂଜାଲି ଆଦି ମାରଣାସ୍ତ୍ର ଧରି ତାଙ୍କ ଘରକୁ ଆସି କବାଟ ବାଡାଇଥିଲେ। ସେ କବାଟ ଖୋଲିବା ମାତ୍ରକେ ଅଶ୍ଲୀଳ ଭାଷାରେ ଗାଳିଗୁଲଜ କରିବା ସହ ତାଙ୍କ ଭାଇ ପ୍ରଶାନ୍ତ ନାୟକଙ୍କୁ ଖୋଜିଥିଲେ। ମାତ୍ର ସେ ଘରେ ନ ଥିବା କହିବାରୁ ଅଭିଯୁକ୍ତ ମାନେ ଉତ୍ୟକ୍ତ ହୋଇ ଘର ଉପରକୁ ଦୁଇ ରାଉଣ୍ଡ ଗୁଳି ଚଲାଇଥିଲେ। ଏହା ଶୁଣି ଗ୍ରାମବାସୀ ଘଟଣାସ୍ଥଳକୁ ଆସିବା ଦେଖି ଅଭିଯୁକ୍ତମାନେ ଘଟଣା ସ୍ଥଳରୁ ଚମ୍ପଟ ମାରି ଥିଲେ। ହର୍ସ ରାଉତ ଓ ପ୍ରଶାନ୍ତ ନାୟକଙ୍କ ମଧ୍ୟରେ କିଛି ଦିନ ତଳେ ଗଣ୍ଡଗୋଳ ଘଟିଥିଲା। ଏଥିରେ ପ୍ରତିଶୋଧ ନେବା ଲାଗି ହର୍ସ ତାର ସହଯୋଗୀ ମାନଙ୍କୁ ନେଇ ଆସି ଏଭଳି କାଣ୍ଡ ଘଟାଇଥିବା ପୋଲିସ କହିଛି।
