ଅନୁଗୋଳ ଅଫିସ୍, ୧୭।୭
ଅଳିଆ ପକାକୁ ନେଇ ପୁଣି ଉତ୍ତେଜନା ଦେଖାଦେଇଛି। ବିରୋଧ କରୁଥିବା ପଞ୍ଚମହଲା ବେଣିବଣିଆ ସାହି ମହିଳାମାନଙ୍କ ସହ ପୋଲିସର ଧସ୍ତାଧସ୍ତି ହୋଇଛି। ବୁଝାଶୁଝା ଉଦ୍ୟମ ବିଫଳ ହୋଇଥିବାରୁ ଅନୁଗୋଳ ପୌରପାଳିକା ପକ୍ଷରୁ ଅଳିଆ ପକାଯିବା କାର୍ଯ୍ୟ ବନ୍ଦ ରଖାଯାଇଛି। ପ୍ରଶାସନ ଉପସ୍ଥିତିରେ ଲୋକଙ୍କ ସହ ଆଲୋଚନା ପରେ ନିଷ୍ପତ୍ତି ନିଆଯିବ ବୋଲି ପୌରପାଳିକା ପକ୍ଷରୁ କୁହାଯାଇଛି।
ପ୍ରକାଶ ଯେ, ଅନୁଗୋଳ ସହରର ଅଳିଆ ପଞ୍ଚମହଲାର ବେଣିବଣିଆ ସାହି ନିକଟରେ ହୋଇଥିବା ଡମ୍ପିଂୟାର୍ଡରେ ପକାଯିବାକୁ ଅଞ୍ଚଳବାସୀ ବିରୋଧ କରିଥିଲେ। ଫଳରେ ଉପସ୍ଥିତ ସ୍ଥାନୀୟ ମହିଳାମାନଙ୍କ ସହ ପୋଲିସର ଧସ୍ତାଧସ୍ତି ହୋଇଥିଲା। ଅଧିକ ସଂଖ୍ୟାରେ ପୋଲିସ ପହଞ୍ଚତ୍ବା ପରେ ପରିସ୍ଥିତି ଶାନ୍ତ ପଡିଥିଲା। ତେବେ ଅଞ୍ଚଳବାସୀଙ୍କ ସହିତ ପ୍ରଶାସନ ଓ ପୋଲିସ କରିଥିବା ଆଲୋଚନା ବିଫଳ ହୋଇଛି। ସ୍ଥାନୀୟ ସରପଞ୍ଚଙ୍କ ସମେତ ଏକ ପ୍ରତିନିଧି ଦଳ, ପୌରପ୍ରଶାସନ ଓ ଜିଲା ପ୍ରଶାସନ ଆଲୋଚନା କରି ଚୂଡ଼ାନ୍ତ ନିଷ୍ପତ୍ତି ଗ୍ରହଣ କରାଯିବ ବୋଲି ସୂଚନା ମିଳିଛି। ଶୁକ୍ରବାରଠାରୁ ସହରର ଆବର୍ଜନା ଏହି ଡମ୍ପିଂୟାର୍ଡ ଅଞ୍ଚଳକୁ ଯିବ ନାହିଁ ବୋଲି ପୌରପାଳିକା ପକ୍ଷରୁ ସୂଚନା ମିଳିଛି। ସୂଚନାଯୋଗ୍ୟ, ବୁଧବାର ଅଞ୍ଚଳବାସୀ ଏହାକୁ ବିରୋଧ କରି ୮ଟି ଅଳିଆ ଗାଡ଼ିକୁ ଅଟକ ରଖିଥିଲେ। ଏପରି କି ପୌରପାଳିକାର ଫିକଲ ସ୍ଲଜ ଟ୍ରିଟ୍ମେଣ୍ଟ ପ୍ଲାଣ୍ଟ(ଏଫଏସ୍ଟିବି)ର ଦୁଇ ଜଣ କର୍ମଚାରୀଙ୍କୁ ମଧ୍ୟ ଅଟକ ରଖିଥିଲେ। ପୋଲିସ ଓ ପ୍ରଶାସନ ପ୍ରଥମ ଦିନ ଆଲୋଚନା କରିଥିଲେ ହେଁ ତାହା ବିଫଳ ହୋଇଥିଲା। ଗୁରୁବାର ୬ଟି ଅଳିଆଗାଡ଼ି ଡମ୍ପିଂୟାର୍ଡକୁ ନେବା ସମୟରେ ବିବାଦ ଦେଖାଦେଇଥିଲା। ତେଣୁ ଶୁକ୍ରବାରଠାରୁ ଅଳିଆ ପକାଯିବା ବନ୍ଦ କରାଯାଇଥିବା ପୌର ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା କହିଛନ୍ତି। ଘଟଣାସ୍ଥଳରେ ଫୋର୍ସ ସହ ଅନୁଗୋଳ ଏସ୍ଡିପିଓ ଅଶ୍ୱିନୀ ସାହୁ, ଥାନା ଅଧିକାରୀ ରମେଶ ବିଶୋଇ ଓ ଅନ୍ୟ ଅଧିକାରୀମାନେ ଉପସ୍ଥିତ ଥିଲେ।
