ରିଷିଡ଼ା, ୯।୮ (ସୁଶାନ୍ତ ମଲ୍ଲିକ): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ପୌରକେଲା ପଞ୍ଚାୟତ ଅଧୀନ ହାଇସ୍କୁଲ ବଜାର ପଡ଼ିଆରେ ବିନା ସୂଚନା ଫଳକରେ ପିଣ୍ଡି ନିର୍ମାଣ କାମ ଚାଲିଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ସହ ଅନିଶ୍ଚିତତା ପ୍ରକାଶ ପାଇଛି। କାମଟି କେଉଁ ଯୋଜନାରେ, କେତେ ଅର୍ଥ ବ୍ୟୟରେ ଏବଂ କେଉଁ ବିଭାଗ ଦ୍ୱାରା କରାଯାଉଛି, ସେ ସମ୍ପର୍କରେ କୌଣସି ସୂଚନା ସାର୍ବଜନୀନ ଭାବେ ପ୍ରଦର୍ଶିତ ହୋଇ ନ ଥିବାରୁ ଗ୍ରାମବାସୀ ପ୍ରଶ୍ନ ଉଠାଇଛନ୍ତି।
ଗ୍ରାମବାସୀଙ୍କ କହିବା ଅନୁଯାୟୀ, ୨୦୨୫-୨୬ ଆର୍ଥିକ ବର୍ଷରେ ମନରେଗା ଯୋଜନା ଅଧୀନରେ ପ୍ରାୟ ୧୦ ଲକ୍ଷ ଟଙ୍କା ବ୍ୟୟରେ ପୌରକେଲା ବଜାର ପଡ଼ିଆର ଉନ୍ନତିକରଣ ପାଇଁ ୪ଟି ପିଣ୍ଡି ନିର୍ମାଣକୁ ଅନୁମୋଦନ ମିଳିଥିଲା। ତେବେ ନିର୍ମାଣ କାମ ଅତି ନିମ୍ନମାନର ହେଉଥିବା ଅଭିଯୋଗ ହୋଇଛି।
ପିଣ୍ଡିର କାନ୍ଥ ଇଟା ଯୋଡ଼େଇ କରିବା ସହ ବାଲିରେ ଖାଲ ଭର୍ତ୍ତି କରିବା ପରେ କଂକ୍ରିଟ୍ କରିବାର ନିୟମ ଥିବା ବେଳେ ତାହା ନକରି ମାଟି ଉପରେ ବାଲି ପକାଇ ଦିଆଯାଇଥିବା ଅଭିଯୋଗ ହୋଇଛି। ଫଳରେ ନିର୍ମାଣ କାମର ଗୁଣବତ୍ତାକୁ ନେଇ ସ୍ଥାନୀୟ ଲୋକେ ସନ୍ଦେହ ପ୍ରକାଶ କରିଛନ୍ତି।
ସାଧାରଣତଃ ସରକାରୀ ନିର୍ମାଣ କାର୍ଯ୍ୟସ୍ଥଳରେ କାମର ନାମ, ଯୋଜନା, ପ୍ରକଳ୍ପ ମୂଲ୍ୟ, କାର୍ଯ୍ୟ ଅବଧି ଓ କାର୍ଯ୍ୟନିର୍ବାହୀ ସଂସ୍ଥା ସମ୍ପର୍କିତ ବିବରଣୀ ସହ ସୂଚନା ଫଳକ ପ୍ରଦର୍ଶନ କରାଯାଇଥାଏ। କିନ୍ତୁ ଏଠାରେ କାର୍ଯ୍ୟସ୍ଥଳରେ ସେଭଳି କୌଣସି ସୂଚନା ଫଳକ ନ ଥିବାରୁ କାମର ସ୍ୱଚ୍ଛତାକୁ ନେଇ ସନ୍ଦେହ ସୃଷ୍ଟି ହୋଇଛି।
କେତେକ ସଚେତନ ସାମାଜିକ କର୍ମୀ ଦାବି କରିଛନ୍ତି ଯେ, ସମ୍ପୃକ୍ତ ବିଭାଗ ତୁରନ୍ତ କାମର ସମସ୍ତ ତଥ୍ୟ ସାର୍ବଜନୀନ କରିବା ସହ ୨୦୨୩-୨୪ ମସିହାରେ ମନରେଗା ଅଧୀନରେ ଅନୁମୋଦିତ ବଜାର ପିଣ୍ଡି ନିର୍ମାଣର ଅଗ୍ରଗତି ଓ ବ୍ୟୟ ସମ୍ପର୍କରେ ତଦନ୍ତ କରାଯାଉ। ଯଦି ନିର୍ମାଣ କାମରେ ନିମ୍ନମାନର କାର୍ଯ୍ୟ କିମ୍ବା କୌଣସି ଅନିୟମିତତା ହୋଇଥାଏ, ତେବେ ତାହାର ନିରପେକ୍ଷ ତଦନ୍ତ କରି ଆବଶ୍ୟକ ପଦକ୍ଷେପ ନେବାକୁ ସେମାନେ ଦାବି କରିଛନ୍ତି।
ଏ ସମ୍ପର୍କରେ ବିଭାଗୀୟ ଅଧିକାରୀ ତଥା ଦାୟିତ୍ୱରେ ଥିବା କନିଷ୍ଠ ଯନ୍ତ୍ରୀ ଶିଶିର ଶବରଙ୍କୁ ପଚାରିବାରୁ, କାମ ଶେଷ ହେବା ପୂର୍ବରୁ ସୂଚନା ଫଳକ ଲଗାଇ ଦିଆଯିବ ବୋଲି ସେ କହିଥିଲେ। ବାଲି ଭରିବା ସ୍ଥାନରେ ମାଟି ଓ ବାଲି ମିଶ୍ରିତ କରି ଭରାଯାଇଥିବା ନେଇ ସେ ଅବଗତ ନଥିବା ପ୍ରକାଶ କରିବା ସହ ଉକ୍ତ ମାଟିକୁ କାଢ଼ି ପୁନର୍ବାର ବାଲି ଭରାଯିବ ବୋଲି ପ୍ରତିଶ୍ରୁତି ଦେଇଥିଲେ।
ତେବେ କନିଷ୍ଠ ଯନ୍ତ୍ରୀଙ୍କ ଅନୁପସ୍ଥିତିରେ ଏଭଳି ନିମ୍ନମାନର କାମ କିପରି ଚାଲିଥିଲା, ଏବଂ ଏଥିରେ ସ୍ଥାନୀୟ ସରପଞ୍ଚଙ୍କ ଭୂମିକା କ’ଣ, ତାହାକୁ ନେଇ କେତେକ ବୁଦ୍ଧିଜୀବୀ ଓ ସ୍ଥାନୀୟ ଲୋକଙ୍କ ମଧ୍ୟରେ ଆଲୋଚନା ହେଉଥିବା ଶୁଣିବାକୁ ମିଳିଛି। ଏହି ଅଭିଯୋଗର ସତ୍ୟତା ସମ୍ପର୍କରେ ବିଭାଗୀୟ ତଦନ୍ତ ପରେ ସ୍ପଷ୍ଟ ହେବ ବୋଲି ସାଧାରଣରେ ମତ ପ୍ରକାଶ ପାଇଛି।
