ଯାଜପୁର ରୋଡ,୧୧ା୧(ଡି.ଏନ.ଏ.): ପ୍ରଶାସନିକ ଉଦାସୀନତା ଯୋଗୁ ଏବେ ବ୍ୟାସନଗର ପୌର ପରିଷଦର ପ୍ରାୟ ପ୍ରତ୍ୟେକ ଗଳିକନ୍ଦି ସମସ୍ୟା ଜର୍ଜରିତ ଜନାକୀର୍ଣ୍ଣ ସହର ଭାବେ ପରିଗଣିତ ହେଉଛି। ଏହି ସହରର ୧୭ନଂ.ୱାର୍ଡ ଅନ୍ତର୍ଗତ ସାପଗଡିଆ ମୁଖ୍ୟରାସ୍ତାରୁ ଷ୍ଟାଡିୟମ ଗେଟ ପର୍ଯ୍ୟନ୍ତ ୧ କିମି ରାସ୍ତା ରବିବାର ପିଚୁ ପକାଯାଇଥିଲା। ସୋମବାର ସକାଳେ ବିଭିନ୍ନ ସ୍ଥାନରେ ସେହି ପିଚୁ ଉଠିଯାଇଥିବା ଦେଖିବାକୁ ମିଳିଥିଲା। ଏଭଳି ନିମ୍ନମାନର କାମ କରି ଅନୁଦାନର ସିଂହଭାଗ ଅର୍ଥ ଠିକାଦାର ଓ ଯନ୍ତ୍ରୀ ମିଳିମିଶି ଆତ୍ମସାତ୍ କରୁଥିବାରୁ ସହରରେ ଏଭଳି ପରିସ୍ଥିତି ସୃଷ୍ଟି ହୋଇଥିବା ମତପ୍ରକାଶ ପାଇଛି।
ସୂଚନାଯୋଗ୍ୟ, ସହରର ପ୍ରମୁଖ ରାସ୍ତାଗୁଡ଼ିକର ମରାମତି ସହ ପ୍ରମୁଖ ଛକର ସୌନ୍ଦର୍ଯ୍ୟକରଣ କରାଯିବାକୁ ବିଭିନ୍ନ ଯୋଜନାରୁ ବାର୍ଷିକ ଅନେକ କୋଟି ଟଙ୍କା ଅନୁଦାନ ଆସୁଛି। କିନ୍ତୁ ସହରରେ ଏମିତି ୱାର୍ଡ ନାହିଁ ଯେଉଁଠି ରାସ୍ତା ଓ ଡ୍ରେନ ସମସ୍ୟା ନାହିଁ। ଜିଲା ବାହାରର ଆଗନ୍ତୁକ ତଥା ପର୍ଯ୍ୟଟକମାନେ କଳିଙ୍ଗନଗର ଶିଳ୍ପାଞ୍ଚଳର ମୁଖଶାଳା ଭାବେ ପରିଚିତ ଏହି ସହରର ଏପରି ଅବସ୍ଥାକୁ ଦେଖିଲେ ନକରାମତ୍କ ଚିନ୍ତାଧାରା ପୋଷଣ କରୁଛନ୍ତି। ଏପରି କି ସହରବାସୀ ଏଭଳି ଦୁର୍ନୀତି ଉପରେ ଅସନ୍ତୋଷ ପ୍ରକାଶ କରି ପ୍ରଶାସନିକ କଳକୁ ବାଃବାଃ କରୁଛନ୍ତି। ଦୀର୍ଘଦିନ ହେଲା ସାପଗଡ଼ିଆ-ଷ୍ଟାଡିୟମ ରାସ୍ତା ବିପର୍ଯ୍ୟସ୍ତ ହୋଇ ପଡିଥିଲା। ଏନେଇ ଅଞ୍ଚଳବାସୀ ଅଭିଯୋଗ କରିବାରୁ ପୂର୍ତ୍ତ ବିଭାଗ ଦ୍ୱାରା ୧୦ ଲକ୍ଷ ଟଙ୍କାର ଅନୁଦାନ ଆବଣ୍ଟିତ ହୋଇ କାର୍ଯ୍ୟ ଚାଲିଥିଲା। ହେଲେ ଠିକାଦାର ଅଧିକ ଲାଭ କରିବା ଆଶାରେ ଆବଶ୍ୟକ ପିଚୁ ବ୍ୟବହାର କରି ନ ଥିଲେ। ଏପରି କି ଏଷ୍ଟିମେଟ ଅନୁଯାୟୀ ଅତି ପତଳା ପିଚୁ ପକାଯାଇଥିବାରୁ ତାହା ୨୪ ଘଣ୍ଟା ମଧ୍ୟ ତିଷ୍ଠି ପାରି ନ ଥିଲା। ଏହି କାମରେ ଅର୍ଦ୍ଧାଧିକ ଟଙ୍କା ହରିଲୁଟ ମସୁଧା ହୋଇଥିଲା। ତେବେ ଅଞ୍ଚଳବାସୀ ଅଭିଯୋଗ କରିବାରୁ ସୋମବାର ବିଭାଗୀୟ ଯନ୍ତ୍ରୀଙ୍କ ଉପସ୍ଥିତିରେ ସେହି ରାସ୍ତାର ପୁଣି ମରାମତି ହୋଇଛି। ଏ ସଂକ୍ରାନ୍ତରେ ଏସ୍ଡିଓ ପ୍ରଶାନ୍ତ ଦାସଙ୍କୁ ପଚାରିବାରେ ସେ କହିଛନ୍ତି, ରାସ୍ତା କାମ ହେବା ପରେ ବହୁ ଗାଡି ଚଳାଚଳ ଯୋଗୁ ପିଚୁ ଉଠିଯାଇଥିଲା। ଖବର ପାଇ ପୁଣି ସେହି ରାସ୍ତା କାମ ଭଲଭାବେ ସମ୍ପନ୍ନ ହୋଇଛି।
