ବରଗଡ଼,୬।୫(ପ୍ରେମାନନ୍ଦ ଖମାରୀ):ବରଗଡ଼ ଜିଲା ଚାଷୀଙ୍କୁ ସମସ୍ୟା ପିଛା ଛାଡୁ ନାହିଁ। ଜିଲାର ଉଭୟ ଜଳସେଚିତ, ଅଣଜଳସେଚିତ ଅଞ୍ଚଳର ଜମିରେ ବର୍ତ୍ତମାନ ରବିଧାନ ଅମଳକ୍ଷମ ଅବସ୍ଥାରେ ରହିଛି। ବିଭିନ୍ନ ଅଞ୍ଚଳରେ ଚାଷୀମାନେ ଧାନ ଅମଳ କାର୍ଯ୍ୟକୁ ଆରମ୍ଭ ମଧ୍ୟ କରି ଦେଇଛନ୍ତି। କିନ୍ତୁ ଗତ ସପ୍ତାହରେ କାଳବୈଶାଖୀ ପ୍ରଭାବରେ ୨ଥର ଝଡ଼ବର୍ଷା ସହିତ କରାମାଡ଼ ହେବା ଯୋଗୁ ଜିଲାର ବିଭିନ୍ନ ଅଞ୍ଚଳରେ ଧାନ ଫସଲ ଉଜୁଡ଼ି ଯାଇଛି। ଧାନକେଣ୍ଡାରୁ ଧାନ ଝଡ଼ିଯାଇ ଥିବାବେଳେ କେଣ୍ଡାରେ ରହିଥିବା ବଳକା ଧାନ ଅଗାଡ଼ି ହୋଇଯିବା ଆଶଙ୍କା ରହିଛି। ସେହିପରି କ୍ଷେତ, ଖଳାରେ ରହିଥିବା ଅମଳ ଧାନ ମଧ୍ୟ ବର୍ଷା, କରାମାଡ଼ରେ ପ୍ରଭାବିତ ରହିଛି। ଧାନ ଅମଳ ସମୟରେ କାଳବୈଶାଖୀର ଏଭଳି କରାଳ ରୂପ ଚାଷୀଙ୍କ ଚିନ୍ତା ବଢ଼ାଇ ଦେଇଛି।
ଏହି କ୍ରମରେ ସୋମବାର ପୂର୍ବାହ୍ନରେ ବିଭିନ୍ନ ସଂଗଠନ ନେତୃତ୍ୱରେ ଚାଷୀମାନେ ଜିଲାପାଳଙ୍କୁ ଫେରାଦ ହୋଇଥିଲେ। ବରଗଡ଼ ପଞ୍ଚାୟତ ସମିତି ସଭାକକ୍ଷରେ ମିଳିତ ଜନ ଅଭିଯୋଗ ଶୁଣାଣି ଶିବିର ଚାଲିଥିବାବେଳେ ସେଠାକୁ ସଂଯୁକ୍ତ କୃଷକ ସଂଗଠନ ଏବଂ ଆମ୍ ଆଦମୀ ପାର୍ଟି(ଏଏପି) ନେତୃତ୍ୱରେ ଚାଷୀମାନେ ପହଞ୍ଚିଥିଲେ। ଉଭୟ ସଙ୍ଗଠନ ପୃଥକ୍ ଭାବେ ଜିଲାପାଳ ଆଦିତ୍ୟ ଗୋୟଲଙ୍କୁ ସ୍ମାରକପତ୍ର ପ୍ରଦାନ ସହିତ କରାମାଡ଼ରେ କ୍ଷତିଗ୍ରସ୍ତ ଚାଷୀଙ୍କୁ ଇନପୁଟ୍ ସବସିଡ଼ି(କ୍ଷତିପୂରଣ ସହାୟତା) ଏବଂ ବୀମା କ୍ଷତିପୂରଣ ପ୍ରଦାନ ଦିଗରେ ବିହିତ ପଦକ୍ଷେପ ନେବାକୁ ଦାବି କରିଛନ୍ତି।
ସଂଯୁ୍କ୍ତ କୃଷକ ସଂଗଠନର ଉପଦେଷ୍ଟା ରମେଶ ମହାପାତ୍ର, ନିରଞ୍ଜନ ପ୍ରଧାନ, ସୁରେଶ ନେକାଣ୍ଟି, ସୁଦାମ ପାତ୍ରଙ୍କ ସମେତ ଅନେକ କ୍ଷତିଗ୍ରସ୍ତ ଚାଷୀ ସ୍ମାରକପତ୍ର ପ୍ରଦାନ ସମୟରେ ଉପସ୍ଥିତ ଥିଲେ।
ସେହିପରି ଆମ ଆଦମୀ ପାର୍ଟି, ବରଗଡ଼ ଜିଲା ଶାଖା ମଧ୍ୟ ଅନୁରୂପ ଦାବି କରିଛି। ଅଦିନିଆଁ ବର୍ଷା ଏବଂ କରାମାଡ଼ ପ୍ରଭାବରେ ଜିଲାର ବିଭିନ୍ନ ବ୍ଲକରେ ବ୍ୟାପକ ଫସଲ ନଷ୍ଟ ହୋଇଥିବା ଯୋଗୁ କ୍ଷତିଗ୍ରସ୍ତ ଚାଷୀମାନଙ୍କୁ ତୁରନ୍ତ କ୍ଷତିପୂରଣ ପ୍ରଦାନ ଦିଗରେ ବିହିତ ପଦକ୍ଷେପ ନେବା ପାଇଁ ଆମ ଆଦମୀ ପାର୍ଟି ଦାବି କରିଛି। ଦଳର ରାଜ୍ୟ ସମ୍ପାଦକ ଭବାନୀ ସାହୁ, ଜିଲା ସମ୍ପାଦକ ସ୍ବରୂପ ଭୋଇ, ନାରୀନେତ୍ରୀ ମାରିୟମ ବାର୍ଲା, ଅସିତ୍ ସାହୁ ପ୍ରମୁଖ ସ୍ମାରକପତ୍ର ପ୍ରଦାନବେଳେ ଉପସ୍ଥିତ ଥିଲେ। ସୂଚନା ଯୋଗ୍ୟ, ଗତମାସ ୨୯ତାରିଖରୁ ଜିଲାରେ କ୍ରମାଗତ ବ୍ୟବଧାନରେ କାଳବୈଶାଖୀର ପ୍ରଭାବ ବଢ଼ି ଚାଲିଛି। ଗତ ୧ତାରିଖ ଓ ୩ତାରିଖ ଜିଲାରେ ଝଡ଼ବର୍ଷା ହୋଇଥିଲା। ଏହା ସହିତ କରାମାଡ଼ ହେବା ଯୋଗୁ ଭଟଲି ବ୍ଲକର ହଲଦିପାଲି ଏବଂ ନାରଙ୍ଗପୁର ପଞ୍ଚାୟତରେ ଧାନ ଫସଲ କ୍ଷତିଗ୍ରସ୍ତ ହୋଇଛି। ଏହା ସହିତ ଜିଲାର ଭେଡ଼େନ, ଅତାବିରା ଆଦି ବ୍ଲକରେ ମଧ୍ୟ ଧାନ ଫସଲ ଉଜୁଡ଼ି ଯାଇଥିବା ଯୋଗୁ ଚାଷୀଙ୍କ ମାନସିକ ସ୍ଥିତି ଦୋହଲି ପଡ଼ିଛି।
