ମାଧପୁର, ୧୭ା୨(ଡି.ଏନ୍.ଏ): ପ୍ରାଥମିକ ବିଦ୍ୟାଳୟରେ ନାହିଁ ଉପଯୁକ୍ତ ଭିତ୍ତିଭୂମି। ଶିକ୍ଷାନୁଷ୍ଠାନରେ ଥିବା ୨ଟି କୋଠରି ମଧ୍ୟରୁ ଗୋଟିଏ ଜରାଜୀର୍ଣ୍ଣ ଅବସ୍ଥାରେ ରହିଛି। ଆଉ ଗୋଟିଏ କୋଠରିରେ ବସୁଛନ୍ତି ପ୍ରଥମରୁ ପଞ୍ଚମ ଶ୍ରେଣୀର ଛାତ୍ରୀଛାତ୍ର। ଅନୁଗୋଳ ଜିଲା ଆଠମଲ୍ଲିକ ବ୍ଲକ କିଆକଟା ପଞ୍ଚାୟତରେ ଥିବା କୁମ୍ଭିଆ ସରକାରୀ ପ୍ରାଥମିକ ବିଦ୍ୟାଳୟର ଏପରି ସମସ୍ୟା ସମ୍ପର୍କରେ ଅବଗତ ଅଛି ଜିଲା ଶିକ୍ଷା ପ୍ରଶାସନ। ବର୍ଷେ ତଳୁ ଏ ନେଇ ଅଭିଯୋଗପତ୍ର ମାଧ୍ୟମରେ ଦୃଷ୍ଟି ଆକର୍ଷଣ କରାଯାଇଛି। ପାଠପଢ଼ାରେ ହେଉଥିବା ଅସୁବିଧା ଦୂର କରିବାକୁ ଦାବି କରାଯାଇଛି। ହେଲେ ଏଯାଏ ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଇ ନ ଥିବାରୁ ପଞ୍ଚାୟତର ସମିତି ସଭ୍ୟ ଓ ଅଭିଭାବକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ଅଭିଭାବକଙ୍କ ଅଭିଯୋଗ ଅନୁଯାୟୀ, ପ୍ରଥମରୁ ୫ମ ଶ୍ରେଣୀ ଯାଏ ଥିବା କୁମ୍ଭଆ ସରକାରୀ ପ୍ରାଥମିକ ବିଦ୍ୟାଳୟରେ ଏବେ ଛାତ୍ରୀଛାତ୍ରଙ୍କ ସଂଖ୍ୟା ୩୩। ହେଲେ ଏହି ୫ଟି ଶ୍ରେଣୀର ପିଲାଙ୍କ ପାଠପଢ଼ା ପାଇଁ ଆବଶ୍ୟକ ଶ୍ରେଣୀଗୃହ ନାହିଁ। ଗୋଟିଏ କୋଠରି ଅତ୍ୟନ୍ତ ବିପଦସଙ୍କୁଳ ଅବସ୍ଥାରେ ରହିଛି। ଛାତରୁ ସିମେଣ୍ଟ ଖଣ୍ଡ ଖସୁଛି। ବର୍ଷା ହେଲେ ପାଣି ଗଳୁଛି। ତେଣୁ ତାହାକୁ ପାଠପଢ଼ାରେ ବ୍ୟବହାର କରାଯାଉ ନାହିଁ। ଫଳରେ ଆଉ ଗୋଟିଏ କୋଠରିରେ ୫ଟି ଶ୍ରେଣୀର ପିଲାଙ୍କୁ ବସାଯାଇ ଶିକ୍ଷାଦାନ କରାଯାଉଛି। ପୂର୍ବରୁ ଏଠାରେ ଜଣେ ଶିକ୍ଷକ ଶିକ୍ଷାଦାନ କରୁଥିଲେ। ହେଲେ ଗ୍ରାମବାସୀଙ୍କ ବାରମ୍ବାର ଦାବି ପରେ ଆଉ ଜଣେ ଶିକ୍ଷକଙ୍କୁ ନିଯୁକ୍ତି ଦିଆଯାଇଛି। କିନ୍ତୁ ଅଧିକ କୋଠରି ନିର୍ମାଣ କରାଯାଉ ନ ଥିବାରୁ ଗୋଟିଏ ଶ୍ରେଣୀଗୃହରେ ୫ଟି ଶ୍ରେଣୀର ପିଲାଙ୍କୁ ବସାଯାଇ ୨ ଜଣ ଶିକ୍ଷକ ପଢ଼ାଇବାକୁ ବାଧ୍ୟ ହେଉଛନ୍ତି। କେବଳ ଶ୍ରେଣୀଗୃହ ନୁହେଁ, ବିଦ୍ୟାଳୟ ଚାରିପାଖେ ପାଚେରି ନିର୍ମାଣ ହୋଇ ନ ଥିବାବେଳେ ବିଶୁଦ୍ଧ ପାନୀୟ ଜଳର ସେପରି ସୁବିଧା ନାହିଁ। ତେଣୁ ତୁରନ୍ତ ଜିଲା ଶିକ୍ଷା ଅଧିକାରୀ ଏହି ପ୍ରାଥମିକ ବିଦ୍ୟାଳୟର ଭିତ୍ତିଭୂମିରେ ସୁଧାର ଆଣିବାକୁ ଦାବି କରାଯାଇଛି।
ବର୍ଷେ ତଳୁ କରାଗଲାଣି ଅବଗତ
ବିଦ୍ୟାଳୟର ସମସ୍ୟା ସମ୍ପର୍କରେ ୩୦ ଅଗଷ୍ଟ ୨୦୨୨ରେ ଆଠମଲ୍ଲିକ ବିଡିଓଙ୍କୁ ଚିଠି (ନଂ. ୩୦/୨୦୨୨)ରେ ଅବଗତ କରାଯାଇଥିଲା। ବ୍ଲକ ଶିକ୍ଷା ଅଧିକାରୀ ମଧ୍ୟ ଏ ବିଷୟରେ ଅବଗତ ରହିଛନ୍ତି। ହେଲେ ପଦକ୍ଷେପ ନିଆଯାଉ ନ ଥିବାରୁ ଜିଲାପାଳଙ୍କୁ ଲିଖିତ ଭାବରେ ଜଣାଇଛି।
-ସୃଶ୍ରିତା କର୍ଣ୍ଣ, ସମିତି ସଭ୍ୟା, କିଆକଟା ପଞ୍ଚାୟତ
ନୂଆ ଶ୍ରେଣୀ ଗୃହ ନିର୍ମାଣ ହେଉ
ଗୋଟିଏ କୋଠରିରେ ୫ଟି ଶ୍ରେଣୀର ପିଲାଙ୍କୁ ବସାଯାଉଥିବାରୁ ପାଠପଢ଼ାରେ ଅସୁବିଧା ହେଉଛି। ଶିକ୍ଷକ ନିଯୁକ୍ତି ଦିଆଗଲେ ମଧ୍ୟ ନୂଆ ଶ୍ରେଣୀ ଗୃହ ନିର୍ମାଣ ଦିଗରେ ଦୃଷ୍ଟି ଦିଆଗଲା ନାହିଁ। ଫଳରେ ଏଠାରେ ପାଠପଢ଼ା ସୁଚାରୁ ରୂପେ ସମ୍ପାଦିତ ହୋଇପାରୁ ନାହିଁ।
-ମନୋରଞ୍ଜନ ମହାଖୁଡ, ଅଭିଭାବକ
ସମସ୍ୟାର ସମାଧାନ କରାଯାଉନି
ସ୍କୁଲ ପରିଚାଳନା କମିଟି କର୍ମକର୍ତ୍ତାମାନେ ବ୍ଲକ ଶିକ୍ଷା ଅଧିକାରୀଙ୍କୁ ଦେଖାକରି ବିଦ୍ୟାଳୟରେ ଥିବା ଅବ୍ୟବସ୍ଥା ବିଷୟରେ ଜଣାଇଥିଲେ। ହେଲେ ଆଜି ପର୍ଯ୍ୟନ୍ତ ସମସ୍ୟାର ସମାଧାନ ଦିଗରେ କୌଣସି ପଦକ୍ଷେପ ନିଆଗଲା ନାହିଁ l
ସଙ୍ଗମ କର୍ଣ୍ଣ, ୱାର୍ଡ ସଭ୍ୟ
ନୂଆ ଶ୍ରେଣୀଗୃହ ନିର୍ମାଣ କରାଯିବ
କୁମ୍ଭିଆ ସରକାରୀ ପ୍ରାଥମିକ ବିଦ୍ୟାଳୟରେ ଶ୍ରେଣୀ ଗୃହ ନିର୍ମାଣ ଅତି ଜରୁରୀ। ଏଠାରେ ଜିଲା ଖଣିଜ ପାଣ୍ଠି ଫଣ୍ଡରୁ ଗୋଟିଏ ଶ୍ରେଣୀଗୃହ ନିର୍ମାଣ କରିବାକୁ ବିଡିଓଙ୍କ କାର୍ଯ୍ୟାଳୟରୁ ଚିଠି ଆସିଛି। ଖୁବ୍ଶୀଘ୍ର ଏଠାରେ ନୂତନ ଶ୍ରେଣୀଗୃହ ନିର୍ମାଣ କରାଯିବ।
-ଦାଶରଥି ଶୁଣ୍ଢି, ବ୍ଲକ ଶିକ୍ଷା ଅଧିକାରୀ, ଆଠମଲ୍ଲିକ
