ଭଞ୍ଜନଗର,୯ା୮(ବାବୁଲା ପ୍ରଧାନ): ଦୀର୍ଘ ୨୨ ବର୍ଷ ଧରି ଶିକ୍ଷାଦାନ କରିବା ପରେ ଅବସର ନେଉଥିବା ଏନ୍ପିଏସ୍ ଶିକ୍ଷକଙ୍କୁ ମିଳୁଛି ମାତ୍ର ୩ ହଜାରରୁ ଅଧିକ ଟଙ୍କାର ପେନସନ। ଅବସର ପରେ ଶିକ୍ଷକମାନଙ୍କ ଆର୍ଥିକ ସୁରକ୍ଷାକୁ ନେଇ ଏଭଳି ଉଦ୍ବେଗ ପ୍ରକାଶ କରିଛି ଏନ୍ପିଏସ୍ ଶିକ୍ଷକ ସଂଘ ।
ଗଞ୍ଜାମ ଜିଲା ଭଞ୍ଜନଗର ନିୟନ୍ତ୍ରିତ ବଜାର କମିଟି ସମ୍ମିଳନୀ କକ୍ଷରେ ରବିବାର ଏନ୍ପିଏସ୍ ଶିକ୍ଷକ ସଂଘ ପକ୍ଷରୁ ଅବସରକାଳୀନ ସମ୍ବର୍ଦ୍ଧନା ଉତ୍ସବ ଅନୁଷ୍ଠିତ ହୋଇଥିଲା। ବ୍ଲକ ସଭାପତି ଜଗଦିଶ ନାଇକଙ୍କ ଅଧ୍ୟକ୍ଷତାରେ ଆୟୋଜିତ ଏହି ସଭାରେ ଶିକ୍ଷକମାନେ ବିଭିନ୍ନ ସମସ୍ୟା ନେଇ ଆଲୋଚନା କରିଥିଲେ। ଆଲୋଚନାରେ ଶିକ୍ଷକମାନେ କହିଥିଲେ ଯେ, ଅନ୍ୟ ରାଜ୍ୟ ତୁଳନାରେ ଓଡ଼ିଶାରେ ଶିକ୍ଷକମାନେ ଅଧିକ ଅବହେଳିତ ଅବସ୍ଥାରେ ଅଛନ୍ତି। ଅନ୍ୟ ରାଜ୍ୟରେ ଶିକ୍ଷକମାନଙ୍କୁ ୪୨୦୦ ଟଙ୍କା ଗ୍ରେଡ୍ ପେ’ ମିଳୁଥିବା ବେଳେ ଓଡ଼ିଶାରେ ୨୨୦୦ ଟଙ୍କା ଦିଆଯାଉଥିବା ସେମାନେ ଅଭିଯୋଗ କରିଥିଲେ।
ଏଥିସହ ଏନ୍ପିଏସ୍ ଅଧୀନରେ ଥିବା ଶିକ୍ଷକମାନେ ଅବସର ପରେ ପୂର୍ଣ୍ଣ ପେନସନ ପାଉନଥିବା ନେଇ ମଧ୍ୟ ଉଦ୍ବେଗ ପ୍ରକାଶ ପାଇଥିଲା। ଚାକିରି ସମୟରେ ଦରମାରୁ କଟାଯାଇ ସଞ୍ଚିତ ହେଉଥିବା ୪୦ ପ୍ରତିଶତ ଅର୍ଥ ଉପରେ ମିଳୁଥିବା ସୁଧ ଆଧାରରେ ପେନସନ ଭଳି ଅର୍ଥ ମିଳୁଥିବାରୁ ଅବସର ପରେ ଶିକ୍ଷକମାନେ ଆର୍ଥିକ ସଙ୍କଟରେ ପଡ଼ୁଥିବା ସେମାନେ କହିଥିଲେ। ଦୀର୍ଘ ବର୍ଷ ଚାକିରି କରିବା ପରେ ଅବସର ନେଇ ହଠାତ୍ ରୋଜଗାରର ଅବସର ଶୂନ୍ୟ ହୋଇଯିବା ଚିନ୍ତାଜନକ ବୋଲି ଶିକ୍ଷକମାନେ ମତ ଦେଇଥିଲେ।
ତେଣୁ ରାଜ୍ୟ ସରକାର ଏନ୍ପିଏସ୍ ଅଧୀନରେ ଥିବା ଶିକ୍ଷକମାନଙ୍କ ସ୍ୱାର୍ଥକୁ ଦୃଷ୍ଟିରେ ରଖି ପୁରୁଣା ପେନସନ ଯୋଜନା ଲାଗୁ କରିବା ସହ ଶିକ୍ଷକମାନଙ୍କୁ ଉପଯୁକ୍ତ ଆର୍ଥିକ ସୁରକ୍ଷା ପ୍ରଦାନ କରିବାକୁ ସଂଘ ପକ୍ଷରୁ ଦାବି କରାଯାଇଥିଲା। ଏହି ଅବସରରେ ଅବସର ଗ୍ରହଣ କରିଥିବା ଶିକ୍ଷକ ସୁଶାନ୍ତ କୁମାର ସାମନ୍ତରା, ଶିକ୍ଷୟିତ୍ରୀ ସୁଷମା ରାୟଗୁରୁ, ସବିତା ପତି, ଲୁଲୁ ପଟ୍ଟନାୟକଙ୍କୁ ସଂଘ ପକ୍ଷରୁ ଅବସରକାଳୀନ ବିଦାୟ ସମ୍ବର୍ଦ୍ଧନା ଦିଆଯାଇଥିଲା। ସେମାନେ ପେନସନ ବାବଦକୁ ୩ ହଜାରରୁ ଊର୍ଦ୍ଧ୍ୱ ଟଙ୍କା ପାଇବେ ବୋଲି ଜଣାପଡ଼ିଛି।
ଉତ୍ସବରେ ଭଞ୍ଜନଗର ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀ ସୂର୍ଯ୍ୟ ନାୟକ, ଉପେନ୍ଦ୍ର ଭଞ୍ଜ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ମଦନ ମୋହନ ରଥ, ଅବସରପ୍ରାପ୍ତ ଶିକ୍ଷକ ସରୋଜକାନ୍ତ ଶତପଥି, ଶିକ୍ଷକ ନେତା ସିଦ୍ଧାର୍ଥ ଶତପଥି ଓ ସଞ୍ଜୟ ପ୍ରଧାନ ପ୍ରମୁଖ ଅତିଥି ଭାବେ ଯୋଗଦେଇଥିଲେ। ଶିକ୍ଷୟିତ୍ରୀ ପ୍ରଭାତୀ ମଞ୍ଜରୀ ବେହେରା ସଭା ସଂଯୋଜନା କରିଥିବାବେଳେ ଜଣେ ଶିକ୍ଷକ ମୋହନ ସାହୁ ଧନ୍ୟବାଦ ଅର୍ପଣ କରିଥିଲେ । ଶିକ୍ଷକ ମନୋଜ ବେହେରା, ଆଶାଲତା ବେହେରା, ଶିଶିର କାନ୍ତ ପତି, ଶିବାଶିଷ ବେହେରା, ଭକ୍ତବନ୍ଧୁ ବିଷୋୟୀ, କାଳୀ ଚରଣ ସେଠୀ, ଅବିନାଶ ପଣ୍ଡା, ଗଙ୍ଗାଧର ପଣ୍ତା ପ୍ରମୁଖ କାର୍ଯ୍ୟକ୍ରମକୁ ପରିଚାଳନା କରିବାରେ ସହଯୋଗ କରିଥିଲେ।
