ବ୍ରହ୍ମପୁର ଅଫିସ,୧୨ା୮:ବ୍ରହ୍ମପୁର ଦେଶୀବେହେରା ସାହିସ୍ଥିତ ପ୍ରେମିକଙ୍କ ଘର ଆଗରେ ଜଣେ ଯୁବତୀ ତାଙ୍କ ଦେଢ଼ ବର୍ଷର ଶିଶୁପୁତ୍ରକୁ ଧରି ବର୍ଷା କାକରରେ ୧୦ ଦିନ ହେଲା ନ୍ୟାୟ ଦାବିରେ ଧାରଣାରେ ବସିଛନ୍ତି। ପ୍ରେମିକ ତାଙ୍କୁ ବିବାହ କରି ପୁଅକୁ ବାପାଙ୍କ ପରିଚୟ ଦେବା ନେଇ ଧାରଣା ଜାରି ରହିଛି। କିନ୍ତୁ ୧୦ଦିନ ହୋଇଥିଲେ ମଧ୍ୟ ସମାଧାନର ବାଟ ଫିଟୁନି।
ପ୍ରକାଶ ଯେ, ଯୁବତୀ ଜଣକ ତାଙ୍କ ପ୍ରେମିକ ଦିନେଶ ସାହୁଙ୍କୁ ବିବାହ କରିବାକୁ ଜିଦ୍କରି ଏଭଳି ଧାରଣା ଦେଇଛନ୍ତି। ଗୁରୁବାର ଅପରାହ୍ନରେ ଦିନେଶଙ୍କ ପରିବାର ଲୋକଙ୍କ ସହ କୌଣସି କଥାକୁ ନେଇ ସାମାଜିକକର୍ମୀ ପ୍ରମିଳା ତ୍ରିପାଠୀଙ୍କର କଥା କଟାକଟି ହୋଇଥିଲା। ଫଳରେ ସାହିବାସିନ୍ଦା ସେଠାରେ ରୁଣ୍ଡ ହେବାରୁ ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇଥିଲା। ଖବର ପାଇ ବଡବଜାର ଥାନା ପୋଲିସ ପହଞ୍ଚି ଉଭୟ ପକ୍ଷଙ୍କୁ ବୁଝାଶୁଝା କରିଥିଲା। ପରେ ଉଭୟ ପକ୍ଷ ଥାନାକୁ ଯାଇଥିଲେ। ବର୍ତ୍ତମାନ ଉକ୍ତ ମାମଲାଟି କୋର୍ଟରେ ବିଚାରାଧୀନ ଥିବାରୁ ପୋଲିସ ଏ ସମ୍ପର୍କରେ ଅଧିକ ତଥ୍ୟ ଦେବାକୁ ମନା କରିଦେଇଛି। ଅନ୍ୟପଟେ ଉଭୟ ପକ୍ଷଙ୍କୁ ସେଠାରେ ଝଗଡା ନ କରି ଶାନ୍ତି ବଜାୟ ରଖିବାକୁ କହିଛି। ପରେ ସାମାଜିକକର୍ମୀ ପ୍ରମିଳା ଦେଶୀବେହେରା ସାହିକୁ ଫେରି ଯୁବତୀଙ୍କ ସହ ଧାରଣାରେ ବସିଛନ୍ତି। ବ୍ରହ୍ମପୁର ବଡ଼ବଜାର ଥାନା ପକ୍ଷରୁ ସେଠାରେ ପୋଲିସ ନିୟୋଜିତ କରାଯାଇଛି।
ପ୍ରକାଶଯେ, ଯୁବତୀଙ୍କ ଅଭିଯୋଗକ୍ରମେ, ପ୍ରାୟ ୨ ବର୍ଷ ତଳେ ଦିନେଶଙ୍କ ସହ ତାଙ୍କର ପ୍ରେମସମ୍ପର୍କ ଗଢ଼ି ଉଠିଥିଲା। ସେ ବିବାହ ପ୍ରଲୋଭନ ଦେଖାଇ ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ଯୁବତୀ ଜଣଙ୍କ ଗର୍ଭବତୀ ହେବା ଜାଣିବା ପରେ ବିବାହ କରିବାକୁ କହିବାରୁ ସେ ରାଜି ହୋଇ ନ ଥିଲେ। ଏନେଇ ପୀଡ଼ିତା ଟାଉନ୍ ଥାନାରେ ଅଭିଯୋଗ କରିଥିଲେ। ଦିନେଶଙ୍କୁ ପୋଲିସ ଗିରଫ କରି କୋର୍ଟଚାଲାଣ କରିଥିଲା। ମାମଲା କୋର୍ଟରେ ବିଚାରାଧୀନ ଥିବା ବେଳେ ଦିନେଶ ସର୍ତ୍ତମୂଳକ ଜାମିନରେ ମୁକୁଳିଛନ୍ତି। ଏହାମଧ୍ୟରେ ପୀଡିତାଙ୍କର ଏକ ପୁତ୍ର ସନ୍ତାନ ଜନ୍ମ ହୋଇଥିଲା। ତା’ର ଡିଏନ୍ଏ ପରୀକ୍ଷା ମଧ୍ୟ କରାଯାଇଥିବା ସୂଚନା ମିଳିଛି। ତେବେ ଦିନେଶ ଆଉ ଜଣଙ୍କୁ ବିବାହ କରିବାକୁ ଯାଉଥିବା ଖବର ପାଇ ପୀଡ଼ିତା ଆଜକୁ ୧୦ ଦିନ ତଳେ ତାଙ୍କ ଘରେ ପହଞ୍ଚି ଶିଶୁପୁତ୍ରକୁ ନ୍ୟାୟ ଦେବାକୁ ଦାବି କରିଥିଲେ। କିନ୍ତୁ ଦିନେଶଙ୍କ ପରିବାର ଲୋକେ ତାଙ୍କୁ ଘରୁ ବାହାର କରି ଦେଇଥିଲେ। ତେଣୁ ସେ ନ୍ୟାୟ ଦାବିରେ ସେହିଦିନଠାରୁ ତାଙ୍କ ଘର ସମ୍ମୁଖରେ ଧାରଣାରେ ବସିଛନ୍ତି।
