ବଇଣ୍ଡା, ୧୭।୪(ଡି.ଏନ୍.ଏ.): ଚୁକ୍ତି ଅବଧି ସରିଲାଣି। ହେଲେ କାମ ସରୁନି। ଯେତିକି କାମ ହୋଇଛି, ତାହା ବି ଅତି ନିମ୍ନମାନର। ପୁରୁଣା ପିଚୁ ରାସ୍ତାକୁ ନ ଭାଙ୍ଗି ତା’ ଉପରେ ପୁଣିଥରେ ଢଳେଇ କରାଯାଉଛି। ଅନୁଗୋଳ ଜିଲା ଆଠମଲ୍ଲିକଠାରୁ ଦରୁହା ପର୍ଯ୍ୟନ୍ତ ନିର୍ମାଣାଧୀନ ରାସ୍ତା କାମକୁ ନେଇ ଏଭଳି ପୁଳା ପୁଳା ଅଭିଯୋଗ ଉଠିଛି। ଏ ନେଇ ୪ ପଞ୍ଚାୟତର ବାସିନ୍ଦା ପତ୍ର ମାଧ୍ୟମରେ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିବା ସହିତ ଏହାର ନକଲ ୫-ଟି ସଚିବ, ପୂର୍ତ୍ତ ମନ୍ତ୍ରୀ, ସମ୍ବଲପୁର ଏମ୍ପି, ପୂର୍ତ୍ତ ସଚିବ, ଅନୁଗୋଳ ଜିଲାପାଳଙ୍କୁ ପ୍ରଦାନ କରିଛନ୍ତି।
ଅନୁଗୋଳ ଜିଲା ଅନୁଗୋଳ ଜିଲା ଆଠମଲ୍ଲିକ ବ୍ଲକର ନୂଆଗଁା, ଅଏଡ଼ା, ଲୁହାସିଂହା, ଜାମୁଡୁଲି ପଞ୍ଚାୟତବାସୀଙ୍କ ଜୀବନରେଖା ହେଉଛି ଆଠମଲ୍ଲିକ-ଦରୁହା ପୂର୍ତ୍ତ ବିଭାଗ ରାସ୍ତା। ମରାମତି ଅଭାବରୁ ଶୋଚନୀୟ ହୋଇପଡ଼ିଥିବା ୧୭ କିଲୋମିଟର ଦୀର୍ଘ ଉକ୍ତ ରାସ୍ତାର ଉନ୍ନତୀକରଣ ନାବାର୍ଡ ସହାୟତାରେ ଠିକାସଂସ୍ଥା ମାଧ୍ୟମରେ କରାଯାଉଛି। ଏଥିଲାଗି ଅଟକଳ ରହିଛି ୧୬.୫୪ କୋଟି ଟଙ୍କା। ଏହି ପିଚୁ ସଡ଼କ କାମ ୨୦୨୦ ନଭେମ୍ବର ୨ରେ ଆରମ୍ଭ ହୋଇଥିବାବେଳେ ୨୦୨୨ ଜାନୁଆରୀ ୧ ସୁଦ୍ଧା କାର୍ଯ୍ୟ ପୂର୍ଣ୍ଣାଙ୍ଗ କରିବା ଲାଗି ଠିକାସଂସ୍ଥ ଚୁକ୍ତି କରିଥିଲା। ତେବେ ଅବଧି ପୂରଣ ହୋଇ ୩ ମାସ ବିତିଯାଇଥିବାବେଳେ ମାତ୍ର ୪୦% କାମ ସରିଛି। ଅପରପକ୍ଷେ କାର୍ଯ୍ୟ ଅତ୍ୟନ୍ତ ନିମ୍ନମାନର ହେଉଥିବା ଅଭିଯୋଗ ହୋଇଛି।
ନିୟମ ଅନୁଯାୟୀ ନୂତନ ପିଚୁ ଢଳେଇ ପୂର୍ବରୁ ପୁରୁଣା ପିଚୁ ବାହାର କରାଯିବା କଥା। ହେଲେ ପୁରୁଣା ରାସ୍ତାର ମେଟାଲ ବାହାର ନ କରି ତାହାରି ଉପରେ ପୁଣି ରାସ୍ତା ନିର୍ମାଣ କରାଯାଉଛି। ଫଳରେ ଏହାର ସ୍ଥାୟୀତ୍ୱ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଅନ୍ୟପଟେ ରାସ୍ତା ନିର୍ମାଣ ସମୟରେ ଠିକ୍ ଭାବେ ପାଣି ସିଞ୍ଚନ କରାଯାଉନାହିଁ। ଆବଶ୍ୟକତା ଅନୁଯାୟୀ ରୋଲିଂ କିମ୍ବା ଭାଇବ୍ରେଟିଂ ମଧ୍ୟ ହେଉନାହିଁ। କେଉଁଠି ଦେଢ଼ ଇଞ୍ଚ ତ ଅନ୍ୟ କେଉଁଠି ଦୁଇ ଇଞ୍ଚର ମେଟାଲ ବିଛାଯାଇଛି। ମୋରମ ବିଛାଇବା ସମୟରେ ବଡ଼ ମେଟାଲ ଗୁଡ଼ିକ ଉପରକୁ ଉଠି ରହି ଦୁର୍ଘଟଣାର କାରଣ ସାଜୁଛି। ରାସ୍ତାର ଉଭୟ ପାର୍ଶ୍ୱରେ ମୋରମ କିମ୍ବା କ୍ରଶର ଗୁଣ୍ଡ ପକାଇବା ପରିବର୍ତ୍ତେ ଅଳ୍ପ ଖୋଳି ପୁରୁଣା ପିଚୁ ଖଣ୍ଡ ଫିଲିଂ କରାଯାଇଛି। କାମ ବେଳେ ବିଭାଗୀୟ ଅଧିକାରୀ ଉପସ୍ଥିତ ରହୁ ନ ଥିବାରୁ ଠିକାସଂସ୍ଥା ମନଇଚ୍ଛା ନିମ୍ନମାନର କାର୍ଯ୍ୟ କରୁଥିବା କୁଟେଶ୍ୱର ଗ୍ରାମର କପିଳ ଦେହୁରୀ, ଚପେଶ୍ୱର ପ୍ରଧାନ, ବାହାଲି ଗ୍ରାମର ଶରତ ଚନ୍ଦ୍ର କର୍ଣ୍ଣ, ବସନ୍ତ ପ୍ରଧାନ, ନଅଗଁା ଗ୍ରାମର ବ୍ରଜମୋହନ ବେହେରା, ରବିନାରାୟଣ ମହାନ୍ତି, ପତାକା ଗ୍ରାମର ଜୟ ସିଂ, ଶତ୍ରୁଘ୍ନ ସାହୁ, ଲୁହାସିଂହା ଗ୍ରାମର ସଞ୍ଜୟ ପ୍ରଧାନ ପ୍ରମୁଖ ଅଭିଯୋଗ କରିଛନ୍ତି। ରାସ୍ତା କାମରେ ବ୍ୟାପକ ଦୁର୍ନୀତି ହୋଇଛି। ତେଣୁ ତୁରନ୍ତ ଏହାର ଭିଜିଲାନ୍ସ ତଦନ୍ତ କରାଇ ଦୁର୍ନୀତିଗ୍ରସ୍ତ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେମାନେ ଦାବି କରିଛନ୍ତି।
ଅପରପକ୍ଷେ ପଞ୍ଚାୟତବାସୀଙ୍କ ଅଭିଯୋଗକୁ ଖଣ୍ଡନ କରିଛନ୍ତି ବଇଣ୍ଡା ପୂର୍ତ୍ତ ବିଭାଗ ଏସ୍ଡିଓ ଫକୀର ମୋହନ ସାହୁ। ସେ ନିଜ ପ୍ରତିକ୍ରିୟାରେ କହିଛନ୍ତି, ରାସ୍ତା କାର୍ଯ୍ୟ ଠିକ୍ ଭାବେ ହେଉଛି। କୌଣସି ନିମ୍ନମାନର କାର୍ଯ୍ୟ ହେଉନାହିଁ।
