ନୂଆଦିଲ୍ଲୀ,୨୮।୮(ପି.ଟି.): ବ୍ୟାଡମିଣ୍ଟନ ତାରକା ସାତ୍ତ୍ୱିକସାଇରାଜ ରାଙ୍କିରେଡ୍ଡୀଙ୍କ ସମେତ ଜାତୀୟ କ୍ରୀଡ଼ା ପୁରସ୍କାର ପାଇବାକୁ ଥିବା ୩ଜଣ କ୍ରୀଡ଼ାବିତ୍ କୋଭିଡ୍-୧୯ ପଜିଟିଭ୍ ବୋଲି ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ତରଫରୁ କୁହାଯାଇଛି। ଶନିବାର ଅଗଷ୍ଟ ୨୯ରେ ଆୟୋଜନ ହେବାକୁଥିବା ଭର୍ଚୁଆଲ ସେରିମନିରେ ଯୋଗ ଦେବେନାହିଁ ବୋଲି ସାଇ ସୂଚନା ଦେଇଛି। କୋଭିଡ୍-୧୯ ମହାମାରୀ କାରଣରୁ ପ୍ରଥମଥର ପାଇଁ ଭର୍ଚୁଆଲ ଜାତୀୟ କ୍ରୀଡ଼ା ପୁରସ୍କାର ଉତ୍ସବ ଆୟୋଜନ ହେବ। ୭୪ଜଣ ବିଜେତାଙ୍କ ମଧ୍ୟରୁ ୬୫ ଜଣ ଏଥିରେ ଯୋଗ ଦେବେ। ୯ଜଣ ଖେଳାଳି ବିଭିନ୍ନ କାରଣରୁ ଏଥିରେ ଯୋଗ ଦେଇପାରିବେନି। ଏମାନଙ୍କ ମଧ୍ୟରୁ କେତେଜଣ କ୍ୱାରାଣ୍ଟାଇନ୍ରେ ଅଛନ୍ତି। ଆଉ କେତେଜଣ ସ୍ବାସ୍ଥ୍ୟଗତ ସମସ୍ୟା ଓ ବିଦେଶରେ ରହିବା କାରଣରୁ ଯୋଗ ଦେଇପାରିବେନି।
ସାତ୍ତିକ କୋଭିଡ୍-୧୯ ପଜିଟିଭ୍ ବୋଲି ପୂର୍ବରୁ ସୂଚାନ ଦେଇସାରିଛନ୍ତି। ଏହି ଉତ୍ସବରେ ୫ ଜଣ ଖେଳରତ୍ନ ଓ ୨୭ଜଣ ଅର୍ଜୁନ ପୁରସ୍କାର ବିଜେତାଙ୍କୁ ପୁରସ୍କୃତ କରାଯିବ। ଉତ୍ସବ ଆୟୋଜିତ ହେବାକୁ ଥିବା ଭେନ୍ୟୁରେ ସବୁ ହେଲ୍ଥ ପ୍ରୋଟୋକଲକୁ ଅନୁସରଣ କରାଯିବ। ରାଷ୍ଟ୍ରପତି ରାମ ନାଥ କୋଭିନ୍ଦ ଏହି ପୁରସ୍କାର ପ୍ରଦାନ କରିବେ।
