ନୂଆଦିଲ୍ଲୀ,୨୪।୮: କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରୀ ନିତିନ ଗଡକରୀଙ୍କ ଏକ ବୟାନକୁ ନେଇ ରାଜନୈତିକ ମହଲରେ ନୂଆ ଚର୍ଚ୍ଚା ଆରମ୍ଭ ହୋଇଛି । ନାଗପୁରର କାଟୋଲରେ ଆୟୋଜିତ ଏକ କାର୍ଯ୍ୟକ୍ରମରେ ଗଡକରୀ କହିଛନ୍ତି ଯେ, ଏବେ ତାଙ୍କୁ ଅଧିକ କାମ କରିବା ଉଚିତ ନୁହେଁ ଏବଂ ନୂଆ ପିଢ଼ିକୁ ମଧ୍ୟ କାମ କରିବାର ସୁଯୋଗ ମିଳିବା ଦରକାର।
ଗଡକରୀଙ୍କ ଏହି ବୟାନ ପରେ ସେ ସକ୍ରିୟ ରାଜନୀତିରୁ ଦୂରେଇବାକୁ ସଙ୍କେତ ଦେଉଛନ୍ତି କି ବୋଲି ପ୍ରଶ୍ନ ଉଠିଛି । ତେବେ ଗଡକରୀ ନିଜ ବୟାନରେ ରାଜନୀତି ଛାଡ଼ିବା କିମ୍ବା ମନ୍ତ୍ରୀ ପଦରୁ ଇସ୍ତଫା ଦେବା ନେଇ କୌଣସି ସିଧାସଳଖ ଘୋଷଣା କରିନାହାନ୍ତି।କାଟୋଲରେ ‘ଏକଲବ୍ୟ ଏକଲ ବିଦ୍ୟାଳୟ ଶିକ୍ଷକ-ପର୍ଯ୍ୟବେକ୍ଷକ ପ୍ରଶିକ୍ଷଣ ଶ୍ରେଣୀ’ କାର୍ଯ୍ୟକ୍ରମରେ ଯୋଗଦେଇ ଗଡକରୀ ତାଙ୍କ ପ୍ରାୟ ୩୦ ବର୍ଷର ସାର୍ବଜନୀନ ଜୀବନ ବିଷୟରେ କହିଥିଲେ। ସେ ଏହି ଦୀର୍ଘ ଯାତ୍ରାରେ ଅନେକ ଉତ୍ଥାନ-ପତନ ଦେଖିଥିବା ସହ ବହୁ ସମ୍ମାନ ଓ ପୁରସ୍କାର ପାଇଥିବା କହିଥିଲେ।
ଏହାପରେ ସେ କହିଥିଲେ ଯେ, “ଏବେ ମୋତେ ଅଧିକ କାମ କରିବା ଉଚିତ ନୁହେଁ। ନୂଆ ପିଢ଼ିକୁ ମଧ୍ୟ କାମ କରିବାର ସୁଯୋଗ ଦେବା ଉଚିତ।” ଏହି ମନ୍ତବ୍ୟକୁ ନେଇ ରାଜନୈତିକ ମହଲରେ ବିଭିନ୍ନ ଆଲୋଚନା ଆରମ୍ଭ ହୋଇଛି। ଗଡକରୀଙ୍କ ବୟାନକୁ ନେଇ ସୋସିଆଲ ମିଡିଆରେ ମଧ୍ୟ ଚର୍ଚ୍ଚା ଜୋର ଧରିଛି। କୋଭିଡ୍ ମହାମାରୀ ପରେ ନିଜ ଜୀବନଶୈଳୀରେ ପରିବର୍ତ୍ତନ ଆଣିଥିବା ଗଡକରୀ କହିଛନ୍ତି ଯେ, ସେ ଏବେ ନିୟମିତ ଯୋଗ କରୁଛନ୍ତି। ତାଙ୍କ ମତରେ, ଜଣେ ବ୍ୟକ୍ତି ସୁସ୍ଥ ନଥିଲେ କ୍ଷମତା କିମ୍ବା ପଦର କୌଣସି ମୂଲ୍ୟ ନାହିଁ।
ଗଡକରୀ କହିଥିଲେ ଯେ, ପୂର୍ବରୁ ଦଳ ପାଇଁ କାମ କରିବା ସମୟରେ ତାଙ୍କ ଜୀବନଶୈଳୀ ସମ୍ପୂର୍ଣ୍ଣ ଭିନ୍ନ ଥିଲା। ସେତେବେଳେ ଯେକୌଣସି ସମୟରେ ସିଙ୍ଗଡା ଖାଇଦେଉଥିଲେ ଏବଂ ଯେକୌଣସି ସ୍ଥାନରେ ଶୋଇ ପଡ଼ୁଥିଲେ। ଏବେ କିନ୍ତୁ ସେ ନିଜ ସ୍ୱାସ୍ଥ୍ୟକୁ ଅଧିକ ପ୍ରାଥମିକତା ଦେଉଛନ୍ତି।
