ପ୍ୟାରିସ୍,୧୨।୧୦(ଏପି): କ୍ଲେ କୋର୍ଟର ରାଜା ବିବେଚିତ ହେଉଥିବା ସ୍ପେନ୍ ଅଭିଜ୍ଞ ଟେନିସ ତାରକା ରାଫାଲ ନାଡାଲ ଏଥର ମଧ୍ୟ ଫ୍ରେଞ୍ଚ୍ ଓପନ୍ ଟାଇଟଲ ହାସଲ କରିଛନ୍ତି। ରବିବାର ଅନୁଷ୍ଠିତ ପୁରୁଷ ସିଙ୍ଗଲ୍ସ ଫାଇନାଲ ମୁକାବିଲାରେ ଦ୍ୱିତୀୟ ସିଡ୍ ନାଡାଲ ଅତି ସହଜରେ ଟପ୍ ସିଡ୍ ତଥା ବିଶ୍ୱର ୧ ନମ୍ବର ଖେଳାଳି ସର୍ବିୟାର ନୋଭାକ ଜୋକୋଭିଚ୍ଙ୍କୁ ୬-୦, ୬-୨, ୭-୫ ସେଟ୍ରେ ପରାସ୍ତ କରି ବାଜି ମାରିଛନ୍ତି। ଏଥିସହିତ ନାଡାଲ କୌଣସି ସେଟ୍ ଡ୍ରପ୍ ନ କରି ରେକର୍ଡ ୧୩ଥର ପାଇଁ ଫ୍ରେଞ୍ଚ୍ ଓପନ୍ ଚାମ୍ପିୟନ ହେବାର ଗୌରବ ଅର୍ଜନ କରିଛନ୍ତି। ବିଶ୍ୱର ୨ ନମ୍ବର ଖେଳାଳି ନାଡାଲ ମୋଟ ଉପରେ କ୍ୟାରିୟରର ୨୦ତମ ଗ୍ରାଣ୍ଡସ୍ଲାମ ଟାଇଟଲ ହାସଲ କରି ସୁଇଜରଲାଣ୍ଡ ତାରାକା ରୋଜର ଫେଡରରଙ୍କ ସମକକ୍ଷ ହୋଇଛନ୍ତି। ଫେଡରର ପୂର୍ବରୁ ୨୦ଟି ଗ୍ରାଣ୍ଡସ୍ଲାମ ଟାଇଟଲ ଜିତି ବିଶ୍ୱର ସଫଳତମ ଖେଳାଳି ବିବେଚିତ ହୋଇଥିଲେ।
ରୋଲାଣ୍ଡ ଗ୍ୟାରୋସ୍ର ଫିଲିଫ୍ ଚାର୍ଟିଏର କୋର୍ଟରେ ଖେଳାଯାଇଥିବା ଏହି ମ୍ୟାଚ୍ରେ ପ୍ରଥମ ଦୁଇଟି ସେଟ୍ରେ ୩୪ ବର୍ଷୀୟ ନାଡାଲ ସମ୍ପୂର୍ଣ୍ଣ ଭାବେ ଆଧିପତ୍ୟ ବିସ୍ତାର କରି ଖେଳିଥିଲେ। ଜୋକୋଭିଚ୍ ଲୟ ପାଇବାକୁ ସଂଘର୍ଷ କରିଥିଲେ ମଧ୍ୟ ସଫଳ ହୋଇପାରି ନ ଥିଲେ। ତେବେ ତୃତୀୟ ସେଟ୍ରେ ନାଡାଲଙ୍କୁ ଜୋକୋଭିଚ୍ ସାମାନ୍ୟ ଟକ୍କର ଦେଇ ଆରମ୍ଭରୁ ଅଗ୍ରଣୀ ହାସଲ କରିଥିଲେ। ତେବେ ୨ ଘଣ୍ଟ ୩୦ ମିନିଟ୍ ମଧ୍ୟରେ ନାଡାଲ ଶେଷରେ ବିଜୟୀ ହୋଇଥିଲେ। ନାଡାଲଙ୍କ ଏହି ପ୍ରଦର୍ଶନ କ୍ଲେ କୋର୍ଟରେ ଅନ୍ୟତମ ସର୍ବକାଳୀନ ଶ୍ରେଷ୍ଠ ବୋଲି ବିବେଚିତ ହୋଇଛି। ସାରା ମ୍ୟାଚ୍ରେ ସେ ଜୋକୋଭିଚ୍ଙ୍କୁ କୌଣସି ସୁଯୋଗ େ ଦଇ ନ ଥିଲେ। ଏଥିସହ ନାଡାଲ ଫ୍ରେଞ୍ଚ୍ ଓପନରେ ୧୦୦ତମ ବିଜୟ ହାସଲ କରିଛନ୍ତି। ଏହି ଟୁର୍ନାମେଣ୍ଟରେ ସେ ମାତ୍ର ୨ଟି ମ୍ୟାଚ୍ରେ ପରାସ୍ତ ହୋଇଛନ୍ତି। ୧୯୭୨ରେ ଆନ୍ଦ୍ରେସ ଜିମେନୋଙ୍କ ପରେ ନାଡାଲ ଫ୍ରେଞ୍ଚ୍ ଓପନ୍ରେ ବୟୋଜ୍ୟେଷ୍ଠ ଚାମ୍ପିୟନ ବିବେଚିତ ହୋଇଛନ୍ତି। ୨୦୦୫ରେ ନାଡାଲ ପ୍ରଥମ ଫ୍ରେଞ୍ଚ୍ ଓପନ ଟାଇଟଲ ଜିତିଥିଲେ। ୧୩ଟି ଫ୍ରେଞ୍ଚ୍ ଓପନ ଟାଇଟଲକୁ ବାଦ୍ ଦେଲେ ନାଡାଲ ଥରେ ଅଷ୍ଟ୍ରେଲିଆନ ଓପନ, ୨ଥର ଓ୍ବିମ୍ବେଲଡନ ଓ ୪ଥର ୟୁଏସ୍ ଓପନ ଟାଇଟଲ ମଧ୍ୟ ହାସଲ କରିଛନ୍ତି। ନିଜ ପ୍ରଦର୍ଶନରେ ନାଡାଲ ଖୁସି ଜାହିର କରିଛନ୍ତି। ରୋମ୍ରେ ଡିଏଗୋ ସ୍ବାର୍ଜମ୍ୟାନଙ୍କଠାରୁ ପରାସ୍ତ ହୋଇ ସେ ଶିକ୍ଷା ପାଇଥିଲେ ବୋଲି ନାଡାଲ କହିଛନ୍ତି।
