ବମ୍ବେ: ଗୃହପାଳିତ ପଶୁମାନଙ୍କ ମଧ୍ୟରେ ଅଧିକାଂଶ ଲୋକ କୁକୁରଙ୍କୁ ଭଲପାଆନ୍ତି। ସ୍ବଭାବରେ ବିଶ୍ୱାସୀ ହୋଇଥିବା ହେତୁ ପୋଷା କୁକୁରଙ୍କ ସହ ଏକ ନିଆରା ମୋହ ଯୋଡ଼ି ହୋଇଥାଏ। ତେବେ ବମ୍ବେରୁ ଏଭଳି ଏକ ଘଟଣା ସାମ୍ନାକୁ ଆସିଛି ଯାହା ଶୁଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ।
କଥାଟି ଏପରି। ଦୀର୍ଘ ୧୮ ବର୍ଷର ବୈବାହିକ ଜୀବନ ପରେ ଏକ ଦମ୍ପତି ଅଲଗା ହେବାକୁ ନିଶ୍ଚିତ କରିଥିଲେ। ଡିସେମ୍ବର ୨୦୧୮ରୁ ଉଭୟ ଅଲଗା ରହୁଥିଲେ। ଉଭୟଙ୍କ ଅଭ୍ୟାସ, ବିଚାର, ଜୀବନଶୈଳୀ ପରସ୍ପର ସହ ମେଳ ଖାଉ ନ ଥିବାରୁ ଆପୋସ ବୁଝାମଣା କ୍ରମେ ଅଲଗା ହେବାକୁ ନିଷ୍ପତ୍ତି ନେଇଥିବା କୋର୍ଟ ସମ୍ମୁଖରେ କହିଥିଲେ। ମାତ୍ର ତାଙ୍କ ଘରେ ଥିବା ଦୁଇଟି ପୋଷା କୁକୁରଙ୍କୁ ଅଲଗା ଅଲଗା ରହିବାକୁ ପଡ଼ୁ ବୋଲି ସେମାନେ ଚାହୁଁ ନ ଥିବା ପ୍ରକାଶ କରିଥିଲେ।
ପ୍ରଥମେ କୋର୍ଟ ଉଭୟଙ୍କୁ ପୁର୍ନବିଚାର ପାଇଁ ୬ ମାସ ସମୟ ଦେଇଥିଲେ। ଏବେ ରାୟ ଶୁଣାଇଛନ୍ତି। ଉଭୟଙ୍କ ଛାଡ଼ପତ୍ରକୁ କୋର୍ଟ ମଞ୍ଜୁରୀ ଦେଇଥିବା ବେଳେ ପୋଷା କୁକୁରଙ୍କ କଷ୍ଟଡି ସ୍ବାମୀଙ୍କୁ ଦିଆଯାଇଥିଛି। ହେଲେ ଯେତେବେଳେ ଇଚ୍ଛା ସେତେବେଳେ ମହିଳା ପୋଷା କୁକୁରଙ୍କୁ ଭେଟିବାକୁ ଯାଇପାରନ୍ତି ବୋଲି କୋର୍ଟ ଅଧିକାର ମଧ୍ୟ ଦେଇଛନ୍ତି। ଏପରିକି ବର୍ଷକୁ ତିନି ଥର ଏକ ମାସ ଧରି କୁକୁରକୁ ନିଜ ପାଖରେ ରଖିପାରନ୍ତି ବୋଲି କୋର୍ଟ କହିଛନ୍ତି।
