ସିଲଭରଷ୍ଟୋନ, ୧୦।୮-ରେଡବୁଲ ଡ୍ରାଇଭର ନେଦରଲାଣ୍ଡ୍ସର ମ୍ୟାକ୍ସ ଭର୍ଷ୍ଟାପେନ ରବିବାର ଏଠାରେ ଅନୁଷ୍ଠିତ ଫର୍ମୁଲାଓ୍ବାନର ୭୦ତମ ଆନିଭର୍ସାରି ଗ୍ରାଁ ପ୍ରି ରେସ୍ରେ ପ୍ରଥମସ୍ଥାନ ଅଧିକାର କରିଛନ୍ତି। ଚାମ୍ପିୟନଶିପ୍ ଲିଡର ମର୍ସିଡିଜ୍ର ଲୁଇସ ହାମିଲଟନ ଦ୍ୱିତୀୟ ଏବଂ ତାଙ୍କ ଟିମ୍ମେଟ୍ ଭାଲଟେରି ବୋଟ୍ଟାସ ତୃତୀୟ ସ୍ଥାନ ଅଧିକାର କରିଛନ୍ତି। ଅନ୍ୟମାନଙ୍କ ମଧ୍ୟରେ ଫେରାରୀର ଚାଲର୍ସ ଲେକ୍ରେକ୍, ରେଡ୍ବୁଲ୍ର ଆଲେକଜାଣ୍ଡର ଆଲବନ୍, ରେସିଂ ପଏଣ୍ଟର ଲାନ୍ସ ଷ୍ଟ୍ରୋଲ, ନିକୋ ହକେନବର୍ଗ, ରେନଲ୍ଟର ଏଟେବନ ଓକନ, ମ୍ୟାକଲରେନର ଲାନ୍ଡୋ ନରିସ ଓ ଆଲ୍ଫା ଟୌରୀର ଡାନିଏଲ କ୍ୟାଟ୍ ଯଥାକ୍ରମେ ୪ର୍ଥରୁ ୧୦ମ ସ୍ଥାନ ଅଧିକାର କରିଛନ୍ତି। ଟପ୍-୧୦ ଫିନିଶ୍ କରିଥିବା ଡ୍ରାଇଭର ମାନଙ୍କୁ ଯଥାକ୍ରମେ ୨୫, ୧୯, ୧୫, ୧୨, ୧୦, ୮, ୬, ୪, ୨ ଓ ୧ ପଏଣ୍ଟ ମିଳିଛି। ଭର୍ଷ୍ଟାପେନଙ୍କ ପାଇଁ ୮ ରେସ୍ରୁ ଏହାଥିଲା ୭ମ ପୋଡିୟମ ଫିନିଶ୍। ଏହା ପୂର୍ବରୁ ସେ ଶେଷଥରପାଇଁ ୨୦୧୯ରେ ବ୍ରାଜିଲ ଗ୍ରାଁ ପ୍ରି ଜିତିଥିଲେ। ଫେରାରୀର ସେବାଷ୍ଟିଆନ ଭେଟେଲ, ମ୍ୟାକଲରେନର କାର୍ଲୋସ ସିଞ୍ଜ ଜୁନିୟର, ରେନଲ୍ଟର ଡାନିଏଲ ରିକୋର୍ଡୋ, ଆଲ୍ଫା ରୋମିଓର କିମି ରାଇକୋନେନ, ହାସ୍ର ରୋମାଇନ ଗ୍ରସଜେନ ପ୍ରମୁଖ ଯଥାକ୍ରମେ ୧୨ରୁ ୧୬ତମ ସ୍ଥାନରେ ସନ୍ତୁଷ୍ଟ ରହିଥିଲେ। ଆନିଭର୍ସାରି ରେସ୍ ପରେ ଲୁଇସ ହାମିଲଟନ ୧୦୭ ପଏଣ୍ଟ ସହିତ ଡ୍ରାଇଭର୍ସ ଷ୍ଟାଣ୍ଡିଂରେ ଶୀର୍ଷସ୍ଥାନ ବଜାୟ ରଖିଛନ୍ତି। ଭର୍ଷ୍ଟାପେନ ୭୭ ଓ ବୋଟ୍ଟାସ ୭୩ ପଏଣ୍ଟ ସହିତ ପରବର୍ତ୍ତୀ ୨ ସ୍ଥାନରେ ରହିଛନ୍ତି। କନ୍ଷ୍ଟ୍ରକ୍ଟର୍ସ ଷ୍ଟାଣ୍ଡିଂରେ ମର୍ସିଡିଜ୍ ୧୮୦ ଓ ରେଡ୍ବୁଲ୍ ୧୧୩ ପଏଣ୍ଟ ପାଇ ପ୍ରଥମ ୨ ସ୍ଥାନ ଅଧିକାର କରିଛନ୍ତି।
