ବଇଣ୍ଡା,୪ା୯ (ପରିକ୍ଷିତ ସାହୁ): ସରକାରୀ ସ୍କୁଲ ପାଇଁ ଜମି ଦେଇଥିଲେ ମଧ୍ୟ ଜମି ମାଲିକଙ୍କ ସମ୍ପର୍କୀୟଙ୍କୁ ରୋଷେୟା ଭାବେ ନିଯୁକ୍ତି ମିଳିଲା ନାହିଁ। ଏଥିରେ ଖପ୍ପା ହୋଇ ଜମି ଉପରେ ମାଲିକାନା ଦାବି କରୁଥିବା ବ୍ୟକ୍ତି ଜଣକ ଜମି ବାବଦ କ୍ଷତିପୂରଣ ଦାବି କରି ଉକ୍ତ ସରକାରୀ ବିଦ୍ୟାଳୟରେ ମଙ୍ଗଳବାର ତାଲା ପକାଇ ଦେବାରୁ ରାସ୍ତା ଉପରେ ବସି ପାଠ ପଢ଼ିଛନ୍ତି ଛାତ୍ରୀଛାତ୍ର। ଏପରି ଏକ ଘଟଣା ଦେଖିବାକୁ ମିଳିଛି ଅନୁଗୋଳ ଜିଲା କିଶୋରନଗର ବ୍ଲକ କଦଳୀମୁଣ୍ଡା ପଞ୍ଚାୟତର ସାନରୋହିଲା ଗ୍ରାମରେ ଥିବା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ।
ଘଟଣାରୁ ପ୍ରକାଶ, ସାନରୋହିଲା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ଏକ ଘରୋଇ ଜମିରେ ସ୍ଥାପନ ହୋଇଛି। ଏଥିପାଇଁ ଦୀର୍ଘବର୍ଷ ତଳୁ ଗ୍ରାମର ଜଣେ ବ୍ୟକ୍ତି ଜମି ପ୍ରଦାନ କରିଥିଲେ। ଏବେ ମଧ୍ୟ ବିଦ୍ୟାଳୟ ଜମି ସମ୍ପୃକ୍ତ ଜମି ମାଲିକଙ୍କ ଉତ୍ତରାଧିକାରୀଙ୍କ ନାମରେ ରହିଛି। କିଛି ମାସ ପୂର୍ବେ ଉକ୍ତ ବିଦ୍ୟାଳୟରେ ରୋଷେୟା ନିଯୁକ୍ତି କରାଯାଇଥିଲା। ଏହି ପଦବୀରେ ତାଙ୍କର ଜଣେ ସମ୍ପର୍କୀୟଙ୍କୁ ନିଯୁକ୍ତି ଦେବାକୁ ଜମି ଉପରେ ମାଲିକାନା ଦାବି କରୁଥିବା ବ୍ୟକ୍ତି ଜଣକ କହିଥିଲେ। ବିଦ୍ୟାଳୟ ପକ୍ଷରୁ ଏହି ନିଯୁକ୍ତି ଦିଆଯିବ ବୋଲି କୁହାଯାଇଥିଲା। ହେଲେ ବିଦ୍ୟାଳୟ ପକ୍ଷରୁ ଆଉ ଜଣଙ୍କୁ ରୋଷେୟା ଭାବେ ନିଯୁକ୍ତ କରାଯାଇଥିଲା। ଏହାକୁ ନେଇ ଜମି ଉପରେ ମାଲିକାନା ଦାବି କରୁଥିବା ବ୍ୟକ୍ତି ଖପ୍ପା ହୋଇଥିଲେ। ସ୍କୁଲକୁ ଦିଆଯାଇଥିବା ଜମି ବଦଳରେ ଉପଯୁକ୍ତ କ୍ଷତିପୂରଣ ଯୋଗାଇ ଦେବାକୁ ଦାବିକରି ସେ ବିଦ୍ୟାଳୟ ଫାଟକରେ ତାଲା ପକାଇ ଆନ୍ଦୋଳନ କରିଥିଲେ। ଫଳରେ ସ୍କୁଲ ଭିତରକୁ ଯାଇ ନ ପାରି ଛାତ୍ରୀଛାତ୍ରମାନେ ପୂର୍ବାହ୍ନ ୧୦ଟାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ବିଦ୍ୟାଳୟ ସମ୍ମୁଖ ରଣିଆକଟା-କଦଳୀମୁଣ୍ଡା ରାସ୍ତା ଉପରେ ବସି ପାଠ ପଢ଼ିଥିଲେ। ଏଥିଯୋଗୁ ଉକ୍ତ ରାସ୍ତାରେ ୨ ଘଣ୍ଟା ଯାତାୟାତ ବାଧାପ୍ରାପ୍ତ ହୋଇଥିଲା। ଏ ସମ୍ପର୍କରେ ଗ୍ରାମବାସୀ ବ୍ଲକ ଶିକ୍ଷା ଅଧିକାରୀଙ୍କୁ ଜଣାଇଥିଲେ। ପରେ ସିଆର୍ସିସି ତ୍ରିଲୋଚନ ବେହେରା, ତହସିଲଦାର ମନୋଜ କୁମାର ପ୍ରଧାନ, କିଶୋରନଗର ଥାନା ଆଇଆଇସି ବିଭୁତି ପ୍ରଧାନ ଘଟଣାସ୍ଥଳରେ ପହଞ୍ଚି ଜମି ଉପରେ ମାଲିକାନା ଦାବି କରୁଥିବା ବ୍ୟକ୍ତିଙ୍କୁ ବୁଝାଶୁଝା କରିଥିଲେ। ଏହାପରେ ବିଦ୍ୟାଳୟ ଫାଟକରୁ ତାଲା ଖୋଲାଯାଇଥିଲା। ଛାତ୍ରୀଛାତ୍ରମାନେ ଭିତରେ ପାଠ ପଢିବା ସହ ମଧ୍ୟାହ୍ନ ଭୋଜନ ରୋଷେଇ ହୋଇଥିଲା। ଘଟଣା ସମ୍ପର୍କରେ କିଶୋରନଗର ତହସିଲଦାର ପ୍ରଧାନ କହିଛନ୍ତି, ଏହି ବିବାଦର ସ୍ଥାୟୀ ସମାଧାନ ପାଇଁ ବୈଠକ କରାଯିବ। ଆଗାମୀ ଦିନରେ କିଭଳି ସମସ୍ୟା ହେବନି ସେଥିପ୍ରତି ଦୃଷ୍ଟି ଦେବାକୁ ଶିକ୍ଷା ବିଭାଗକୁ ନିର୍ଦ୍ଦେଶ ଦିଆଯିବ।
