ନୂଆଦିଲ୍ଲୀ/ଚଣ୍ଡିଗଡ଼,୨୧।୫(ପି.ଟି.): କିମ୍ବଦନ୍ତୀ ଭାରତୀୟ ଧାବକ ମିଲ୍ଖା ସିଂ କରୋନା ସଂକ୍ରମଣର ଶିକାର ହୋଇଛନ୍ତି। ସେ କୋଭିଡ୍-୧୯ ଟେଷ୍ଟରେ ପଜିଟିଭ ବୋଲି ଜଣାପଡିଛି। ଫଳରେ ଚଣ୍ଡିଗଡ଼ସ୍ଥିତ ତାଙ୍କ ବାସଭବନରେ ସେ ଆଇସୋଲେଶନରେ ରହିଛନ୍ତି।
ଫ୍ଲାଇଙ୍ଗ୍ ଶିଖ୍ ନାମରେ ଜଣାଥିବା ୯୧ ବର୍ଷୀୟ ମିଲ୍ଖାଙ୍କଠାରେ କୌଣସି ଲକ୍ଷଣ ଦେଖିବାକୁ ମିଳିନାହିଁ। ତେବେ ସେ ଆଦୌ ବିଚଳିତ ନୁହନ୍ତି ବୋଲି କୁହାଯାଇଛି। ଘରେ କାର୍ଯ୍ୟକରୁଥିତ୍ବା କେତେଜଣ ବ୍ୟକ୍ତି ପଜିଟିଭ ବୋଲି ଜଣାପଡିବା ପରେ ମିଲଖାଙ୍କ ସମେତ ପରିବାରର ଅନ୍ୟ ସଦସ୍ୟମାନେ ଟେଷ୍ଟ କରାଇଥିଲେ। ତେବେ କେବଳ ମୋ ରିପୋର୍ଟ ପଜିଟିଭ ଆସିଥିଲା ବୋଲି ବୁଧବାର ମିଲ୍ଖା କହିଛନ୍ତି। ମୁଁ ସୁସ୍ଥ ଅଛି। ମୋର ଜ୍ୱର କିମ୍ବା କଫ ନାହିଁ। ଆଉ ୩-୪ ଦିନ ମଧ୍ୟରେ ସୁସ୍ଥ ହୋଇଯିବି ବୋଲି ମୋ ଡାକ୍ତର କହିଛନ୍ତି। ଗତକାଲି ଜଗିଂ କରିଛି। ନିୟମିତ ବ୍ୟାୟାମ କରୁଛି ବୋଲି ସେ କହିଛନ୍ତି। ତେବେ ପରିବାର ଅନ୍ୟ ସଦସ୍ୟମାନେ ସଂକ୍ରମିତ ହୋଇନାହାନ୍ତି ବୋଲି ସ୍ପଷ୍ଟ କରାଯାଇଛି। ମିଲ୍ଖାଙ୍କ ପୁଅ ତଥା ଜଣାଶୁଣା ଗଲ୍ଫର ଜୀଭ ମିଲ୍ଖା ସିଂ ଦୁବାଇରେ ଅଛନ୍ତି ଓ ଚଳିତ ସପ୍ତାହରେ ସେ ଭାରତ ଫେରିବେ ବୋଲି କହିଛନ୍ତି।
ମିଲ୍ଖା କ୍ୟାରିୟରର ୪ଥର ଏସିଆନ ଗେମ୍ସ ସ୍ବର୍ଣ୍ଣ ପଦକ ହାସଲ କରିଛନ୍ତି। ସେ ମଧ୍ୟ ୧୯୫୮ ରାଜ୍ୟଗୋଷ୍ଠୀ କ୍ରୀଡ଼ାରେ ସ୍ବର୍ଣ୍ଣ ପଦକ ହାସଲ କରିଥିଲେ। ୧୯୬୦ ରୋମ ଅଲିମ୍ପିକ୍ସରେ ସେ ୪୦୦ ମିଟର ଫାଇନାଲରେ ଚତୁର୍ଥ ସ୍ଥାନ ଅଧିକାର କରିଥିଲେ। ଏହା ତାଙ୍କ କ୍ୟାରିୟରର ଶ୍ରେଷ୍ଠ ପ୍ରଦର୍ଶନ ଥିଲା। ରୋମ ଅଲିମ୍ପିକ୍ସରେ ତାଙ୍କର ଟାଇମିଂ ୩୮ ବର୍ଷଧରି ଜାତୀୟ ରେକର୍ଡ ଭାବେ କାଏମ ରହିଥିଲା। ୧୯୯୮ରେ ପରମଜିତ ସିଂ ତାଙ୍କ ରେକର୍ଡ ଭାଙ୍ଗିଥିଲେ। ସେ ୧୯୫୬ ଓ ୧୯୬୪ ଅଲିମ୍ପିକ୍ସରେ ଭାରତ ପାଇଁ ପ୍ରତିନିଧିତ୍ୱ କରିଥିଲେ। ମିଲ୍ଖାଙ୍କୁ ୧୯୫୯ରେ ପଦ୍ମଶ୍ରୀ ସମ୍ମାନରେ ସମ୍ମାନିତ କରାଯାଇଥିଲା।
