ଭଞ୍ଜନଗର,୧୦ା୧୦(ବାବୁଲା ପ୍ରଧାନ): ଗଞ୍ଜାମ ଓ କନ୍ଧମାଳ ଜିଲାକୁ ସଂଯୋଗ କରୁଥିବା କଳିଙ୍ଗା ଘାଟିରେ ଭୂସ୍ଖଳନ ଯୋଗୁ ଯାତାୟାତ ବନ୍ଦ ରହିଛି। ଫଳରେ ଗଞ୍ଜାମରୁ କନ୍ଧମାଳ ଏବଂ କନ୍ଧମାଳରୁ ଗଞ୍ଜାମ ଆସୁଥିବା ଯାନବାହନ ଚକାପାଦ, ବଦାଙ୍ଗି ଓ ଗାଲେରୀ ଦେଇ ଯାତାୟାତ କରୁଛନ୍ତି। ଏହି ବିକଳ୍ପ ରାସ୍ତାରେ ଯାନବାହନ ସଂଖ୍ୟା ବଢ଼ୁଥିବାରୁ ଭାରୀଯାନ ଚଳାଚଳରେ ବିଭିନ୍ନ ସମସ୍ୟା ଦେଖାଦେଉଛି।
ଗତ ଦୁଇବର୍ଷ ଧରି ବର୍ଷା ଋତୁରେ କଳିଙ୍ଗା ଘାଟିରେ ବାରମ୍ବାର ଭୂସ୍ଖଳନ ହେଉଥିବାରୁ ଏହି ରାସ୍ତାରେ ଯାତାୟାତ ପ୍ରଭାବିତ ହେଉଛି। ଘାଟି ରାସ୍ତା ବନ୍ଦ ରହିବା ଯୋଗୁ ବିକଳ୍ପ ରାସ୍ତା ଉପରେ ଯାନବାହନର ଚାପ ବୃଦ୍ଧି ପାଇଛି। ଏଭଳି ସ୍ଥିତିରେ ରାସ୍ତାରେ ଥିବା ଜବରଦଖଲ ଯାତାୟାତରେ ବାଧା ସୃଷ୍ଟି କରୁଥିବାରୁ ତାହା ହଟାଇବାକୁ ଭଞ୍ଜନଗର ତହସିଲ ପକ୍ଷରୁ ପଦକ୍ଷେପ ନିଆଯାଇଛି।
ଭଞ୍ଜନଗରର ଭାରପ୍ରାପ୍ତ ତହସିଲଦାର ଅବିନାଶ ମହାର ଶୁକ୍ରବାର ଗାଲେରୀରେ ପହଞ୍ଚି ଜବରଦଖଲ ଉଚ୍ଛେଦ ହେବାକୁ ଥିବା ସ୍ଥାନଗୁଡ଼ିକ ଚିହ୍ନଟ କରିଥିଲେ। ଗାଲେରୀ ସମେତ ଉକ୍ତ ରାସ୍ତାର ଅନ୍ୟାନ୍ୟ ସ୍ଥାନରେ ମଧ୍ୟ ଜବରଦଖଲ ଉଚ୍ଛେଦ କରାଯିବା ନେଇ ସୂଚନା ମିଳିଛି। ପ୍ରଶାସନର ଏହି କଡ଼ା ପଦକ୍ଷେପ ଦ୍ୱାରା ବିକଳ୍ପ ରାସ୍ତାରେ ଯାନବାହନ ଚଳାଚଳ ସୁଗମ ଓ ସ୍ବାଭାବିକ ହୋଇପାରିବ ବୋଲି ଆଶା କରାଯାଉଛି।
