କୋକସରା,୧୩ା୪(ଡି.ଏନ୍.ଏ.): ଜେସିବି ଚୋରି କରି ଜନୈକ କବାଡ଼ି ବ୍ୟବସାୟୀ ନିକଟରେ ବିକ୍ରି କରିବା ଘଟଣା କୋକସରା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି। କୋକସରା ପୋଲିସ ଘଟଣାର ତଦନ୍ତ କରି ଦୁଇ ଅଭିଯୁକ୍ତଙ୍କୁ ବୁଧବାର କୋର୍ଟ ଚାଲାଣ କରିଛି।
ସୂଚନାଯୋଗ୍ୟ, ଏକ ଠିକାସଂସ୍ଥାରେ ବିହାର ରାଜ୍ୟର ଜଣେ ଗାଡ଼ି ମାଲିକ ଶ୍ୟାମ ସୁନ୍ଦର ସିଂ ନିଜର ପ୍ରୋକୋଲିନ୍ ଗାଡ଼ିକୁ ଦେଇଥିଲେ। କଳାହାଣ୍ଡି ଜିଲା କୋକସରା ବ୍ଲକ ଗମ୍ଭାରୀଗୁଡ଼ା ନିକଟରେ ଠିକାସଂସ୍ଥାର କ୍ୟାମ୍ପ୍ରେ ରହିଥିଲା। କ୍ୟାମ୍ପ୍ ଉଠିଯିବା ପରେ ଗମ୍ଭାରୀଗୁଡ଼ା ଗ୍ରାମର ଜଣେ ଯୁବକ କପିଳେଶ୍ୱର ଭାଟିକୁ ଗାଡ଼ି ଦେଖାରେଖା କରିବା ପାଇଁ ନିୟୋଜିତ କରାଯାଇଥିଲା। ଗତ ୮ ତାରିଖ ଶୁକ୍ରବାର ଗାଡ଼ି କ୍ୟାମ୍ପ୍ରେ ନ ଥିବା ଦେଖି ଏ ନେଇ କପିଳେଶ୍ୱର ଭାଟି ଗାଡ଼ି ମାଲିକଙ୍କୁ ଫୋନ୍ କରିବାରୁ ସେ ଗାଡ଼ି ଆଣି ନ ଥିବା କହିଥିଲେ। ପରେ ସ୍ଥାନୀୟ କିଛି ପ୍ରତ୍ୟକ୍ଷଦର୍ଶୀ ଚିକିଳି ଗ୍ରାମର ଶୈଳେନ୍ଦ୍ର ସାହୁ ଦୁଇଟି ଜେସିବିକୁ ଟ୍ରେଲରରେ ଲଦି ନେଇଥିବା ଜାଣିବାକୁ ପାଇଥିଲେ। ମାଲିକ ଶ୍ୟାମ ସୁନ୍ଦର ସିଂଙ୍କୁ ଜଣାଇବା ପରେ ଏ ନେଇ ଗତ ଶନିବାର ୯ ତାରିଖରେ କୋକସରା ଥାନାରେ ଗାଡ଼ି ମାଲିକ ଲିଖିତ ଅଭିଯୋଗ କରିଥିଲେ। ପୋଲିସ ଘଟଣାର ତଦନ୍ତ କରି ଶୈଳେନ୍ଦ୍ର ସାହୁ (୫୫)କୁ ଥାନାରେ ଆଣି ଅଟକ ରଖିବା ସହ ପଚରାଉଚରା ପରେ ସେ ଗାଡ଼ି ଚୋରି କରି ନେଇଥିବା ମାନିଥିଲେ। ଧର୍ମଗଡ଼ର ଜଣେ କବାଡ଼ି ବ୍ୟବସାୟୀ ତରୁଣ କୁମାର ଅଗ୍ରଓ୍ବାଲ(୩୫)ଙ୍କ ନିକଟରେ ବିକ୍ରି କରିଥିବା କହିଥିଲେ। ପୋଲିସ ଧର୍ମଗଡ଼ରୁ ତରୁଣ ଅଗ୍ରଓ୍ବାଲଙ୍କୁ ମଧ୍ୟ ଗିରଫ କରି ବୁଧବାର ଦୁଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ଦୁଇ ଅଭିଯୁକ୍ତଙ୍କୁ ଜେଲ୍ ହାଜତକୁ ପଠାଇ ଦିଆଯାଇଥିବା ଜଣାପଡ଼ିଛି। ଏ ନେଇ କୋକସରା ଥାନା କେସ୍ ନମ୍ବର ୮୫/୨୨ ରେ ଏକ ମାମଲା ରୁଜୁ ହୋଇଥିବା ଓ ପ୍ରୋକୋଲିନ୍କୁ ନେବାରେ ବ୍ୟବହୃତ ହୋଇଥିବା ଓଡି ୦୮ ଜି ୩୬୯୨, ଓଡି ୦୮ ଜେ ୨୫୯୨ ନମ୍ବରର ଦୁଇଟି ହାଇଡ୍ରା ଓ ଓଆର୍ ୦୮ ଡି ୩୧୯୨ ନମ୍ବରର ଟ୍ରେଲର ଏଭଳି ତିନୋଟି ଗାଡ଼ିକୁ ଜବତ କରିଥିବା କୋକସରା ଥାନାଧିକାରୀ ପ୍ରସନ୍ନ କୁମାର ବେହେରା ଗଣମାଧ୍ୟମକୁ ସୂଚନା ଦେଇଛନ୍ତି।
