ନୂଆଦିଲ୍ଲୀ,୧୬।୩: ଗଲ୍ଫ ଅଞ୍ଚଳରେ ଜାରି ରହିଥିବା ଯୁଦ୍ଧ ମଧ୍ୟରେ ଭାରତୀୟ ଜାହାଜଗୁଡ଼ିକର ସୁରକ୍ଷିତ ଯାତାୟାତ ପାଇଁ କୂଟନୈତିକ ସ୍ତରରେ ବଡ଼ ଧରଣର ଆଲୋଚନା ଆରମ୍ଭ ହୋଇଛି। ହର୍ମୁଜ ପ୍ରଣାଳୀ ଦେଇ ଭାରତୀୟ ପତାକାଧାରୀ ଜାହାଜଗୁଡ଼ିକର ସୁରକ୍ଷିତ ପ୍ରବେଶ ପାଇଁ ଭାରତ ଚେଷ୍ଟା କରୁଥିବାବେଳେ, ଏହାର ପ୍ରତିବଦଳରେ ଇରାନ ଏକ ବଡ଼ ସର୍ତ୍ତ ରଖିଛି। ଭାରତୀୟ ଜଳସୀମା ନିକଟରୁ ଜବତ କରାଯାଇଥିବା ୩ଟି ତୈଳ ଟ୍ୟାଙ୍କରକୁ ମୁକ୍ତ କରିବା ପାଇଁ ତେହେରାନ ଦାବି କରିଥିବା ଜଣାପଡ଼ିଛି।
ରଏଟର୍ସର ରିପୋର୍ଟ ଅନୁଯାୟୀ, ଗତ ଫେବୃଆରୀ ମାସରେ ଭାରତୀୟ କୋଷ୍ଟଗାର୍ଡ ଦ୍ୱାରା ଜବତ ହୋଇଥିବା ‘ଆସଫାଲ୍ଟ ଷ୍ଟାର’, ‘ଅଲ୍ ଜାଫଜିଆ’ ଏବଂ ‘ଷ୍ଟେଲାର ରୁବି’ ନାମକ ୩ଟି ଟ୍ୟାଙ୍କରର ମୁକ୍ତି ଚାହୁଁଛି ଇରାନ। ଏହି ଜାହାଜଗୁଡ଼ିକ ପରିଚୟ ବଦଳାଇ ସମୁଦ୍ର ମଧ୍ୟରେ ବେଆଇନ କାରବାର କରୁଥିବା ଅଭିଯୋଗରେ ମୁମ୍ବାଇ ନିକଟରେ ଅଟକ ରଖାଯାଇଛି।
ଜାହାଜ ମୁକ୍ତି ସହ ଇରାନ କେତେକ ଜରୁରୀକାଳୀନ ଔଷଧ ଏବଂ ଚିକିତ୍ସା ଉପକରଣ ମଧ୍ୟ ଭାରତରୁ ମାଗିଥିବା ଜଣାପଡ଼ିଛି। ସୋମବାର ଇରାନର ରାଷ୍ଟ୍ରଦୂତ ଏହି ପ୍ରସଙ୍ଗରେ ଭାରତର ବିଦେଶ ମନ୍ତ୍ରଣାଳୟର ଅଧିକାରୀଙ୍କୁ ଭେଟିଛନ୍ତି।
ବର୍ତ୍ତମାନ ଗଲ୍ଫ ଅଞ୍ଚଳରେ ୨୨ଟି ଭାରତୀୟ ଜାହାଜ ଏବଂ ୬୧୧ ଜଣ ନାବିକ ଫସି ରହିଛନ୍ତି। ସେଥିମଧ୍ୟରୁ ୬ଟି ଜାହାଜରେ ଏଲ୍ପିଜି (LPG) ରହିଛି। ଭାରତ ନିଜର ୯୦ ପ୍ରତିଶତ ଏଲ୍ପିଜି ଆମଦାନୀ ପାଇଁ ଗଲ୍ଫ ଉପରେ ନିର୍ଭର କରୁଥିବାରୁ, ଏହି ଜାହାଜଗୁଡ଼ିକର ସୁରକ୍ଷିତ ପ୍ରତ୍ୟାବର୍ତ୍ତନ ଅତ୍ୟନ୍ତ ଜରୁରୀ।
ଇରାନ ନିକଟରେ ଦୁଇଟି ଭାରତୀୟ ଏଲ୍ପିଜି ଟ୍ୟାଙ୍କରକୁ ହର୍ମୁଜ ପ୍ରଣାଳୀ ଦେଇ ଯିବାକୁ ଅନୁମତି ଦେଇଛି, ଯାହା ମଧ୍ୟରୁ ଗୋଟିଏ ସୋମବାର ପଶ୍ଚିମ ଭାରତରେ ପହଞ୍ଚିଛି।
ବିଦେଶ ମନ୍ତ୍ରଣାଳୟ ମୁଖପାତ୍ର ରଣଧୀର ଜୈସୱାଲ କହିଛନ୍ତି ଯେ, ଏହା କୌଣସି ଦେଣନେଣ ନୁହେଁ ବରଂ ପାରମ୍ପରିକ ଦ୍ୱିପାକ୍ଷିକ ସମ୍ପର୍କର ଏକ ପ୍ରକ୍ରିୟା। ତେବେ ଉତ୍ତେଜନାପୂର୍ଣ୍ଣ ସ୍ଥିତି ମଧ୍ୟରେ ଭାରତ ନିଜର ନାବିକ ଏବଂ ଜାହାଜକୁ ସୁରକ୍ଷିତ ଫେରାଇ ଆଣିବାକୁ ପ୍ରାଥମିକତା ଦେଉଛି।
