ଭଞ୍ଜନଗର,୧୧।୬(ବାବୁଲା ପ୍ରଧାନ)- ଗଞ୍ଜାମ ଜିଲା ଭଞ୍ଜନଗର ଉପଖଣ୍ଡ ହସ୍ପିଟାଲରେ ନିଶ୍ଚେତକ ବିଶେଷଜ୍ଞ ଏବଂ ସର୍ଜରୀ ବିଶେଷଜ୍ଞ ପଦବୀ ବହୁ ବର୍ଷ ହେବ ଖାଲି ପଡ଼ିଛି। ଫଳରେ ଏଠାକୁ ଚିକିତ୍ସିତ ହେବାକୁ ଆସୁଥିବା ରୋଗୀମାନେ ଉକ୍ତ ସେବା ପାଇ ନ ପାରି ଘୋର ଅସୁବିଧାର ସମ୍ମୁଖୀନ ହେଉଛନ୍ତି। ଏଥିସହ ଅଧିକାଂଶ ସମୟ ରୋଗୀଙ୍କୁ ୮୦ କିମି ଦୁର ବ୍ରହ୍ମପୁର ଯାଇ ଚିକିତ୍ସିତ ହେବାକୁ ପଡୁଛି। ଏହିଭଳି ପରିସ୍ଥିତିରେ ଗତ ମାର୍ଚ୍ଚ ମାସ ୨୭ ତାରିଖରେ ବେଲଗୁଣ୍ଠା ବ୍ଲକ ଉଢୁରା ଗ୍ରାମର ଗର୍ଭବତୀ ମହିଳା ଟିକିନା ସାମଲ ଭଞ୍ଜନଗର ମେଡ଼ିକାଲରେ ଚିକିତ୍ସା ପାଇଁ ଭର୍ତ୍ତି ହୋଇଥିଲେ। ୨୯ ତାରିଖରେ ସେ ମୃତ୍ୟୁବରଣ କରିଥିଲେ। ଉପଯୁକ୍ତ ରୋଗୀ ସେବା ନିର୍ଦ୍ଧାରିତ ସମୟରେ ନ ମିଳିବାରୁ ଚିକିତ୍ସା ଅବହେଳାରୁ ତାଙ୍କର ମୃତ୍ୟୁ ଘଟିଥିବା ପରିବାର ଲୋକେ ଅଭିଯୋଗ କରିଥିଲେ। ଏଥିସହ ଏହି ଘଟଣାକୁ ନେଇ ମେଡ଼ିକାଲରେ ଉକ୍ତ ଦିନ ପ୍ରବଳ ଉତ୍ତେଜନା ଦେଖା ଦେଇଥିଲା। ଏଥିସହ ଘଟଣା ସମ୍ପର୍କରେ ପରିବାର ଲୋକେ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କରିଥିଲେ।
ଅଭିଯୋଗର ୭୪ ଦିନ ପରେ ଗଞ୍ଜାମ ଜିଲା ସାସ୍ଥ୍ୟ ବିଭାଗର ନିଦ ଭାଙ୍ଗିଛି। ଜିଲା ସାସ୍ଥ୍ୟ ଅଧିକାରୀଙ୍କ ନିର୍ଦ୍ଦେଶକ୍ରମେ ତଦନ୍ତକାରୀ ଟିମ ରେ ଏଡିପିଏଚ୍ଓ ଡ଼ା ସରୋଜିନୀ ଦେବୀ ଓ ଜିଲା ମୁଖ୍ୟ ଚିକିତ୍ସାଳୟର ସ୍ତ୍ରୀ ଓ ପ୍ରସୁତି ରୋଗ ବିଶେଷଜ୍ଞ ଡ. ସୁଚିତ୍ରା ସାହୁ ବୁଧବାର ଭଞ୍ଜନଗର ମେଡ଼ିକାଲରେ ପହଞ୍ଚି ଘଟଣାର ତଦନ୍ତ କରି ଫେରିଯାଇଛନ୍ତି। ଟିମ ଜିଲା ସାସ୍ଥ୍ୟ ଅଧିକାରୀଙ୍କୁ ତାଙ୍କ ରିପୋର୍ଟ ପ୍ରଦାନ କରିବେ। ଏହାପରେ ଯଦି କିଏ ଅବହେଳା କରିଥିବାର ପ୍ରମାଣ ମିଳେ ତେବେ ସଂମ୍ପୃକ୍ତ କର୍ମଚାରୀଙ୍କ ବିରୁଦ୍ଧରେ କାର୍ଯ୍ୟନୁଷ୍ଠାନ ନିଆଯିବା ସମ୍ଭାବନା ରହିଛି। ଅପରପକ୍ଷେ ଗର୍ଭବତୀ ମହିଳା ଏବଂ ଶିଶୁ ମୃତ୍ୟୁହାର ରୋକିବା ପାଇଁ ସରକାର ଅନେକ ପଦକ୍ଷେପ ନେଉଛନ୍ତି। ତଥାପି କେଉଁଠି ଅବହେଳା ଯୋଗୁ ଯୋଜନା ବାଟବଣା ହୋଇଯାଉଛି। ଯାହାକି ଚିନ୍ତାଜନକ ବିଷୟ।
