ମାର୍ଗାଓ,୨୨।୨: ଚଳିତ ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ରେ ରବିବାର ଅନୁଷ୍ଠିତ ଗୁରୁତ୍ୱପୂର୍ଣ୍ଣ ମ୍ୟାଚ୍ରେ ଏଫ୍ସି ଗୋଆ ୨-୧ ଗୋଲରେ ବେଙ୍ଗାଲୁରୁ ଏଫ୍ସିକୁ ପରାସ୍ତ କରିଛି। ଗୋଆ ପକ୍ଷରୁ ଆଇଗର ଅଙ୍ଗୁଲୋ ୨୦ ଓ ରିଡିମ ଟିଲାଙ୍ଗ ୨୩ତମ ମିନିଟରେ ଗୋଲ ଦେଇଥିଲେ। ସେହିପରି ୩୩ତମ ମିନିଟ୍ରେ ବେଙ୍ଗାଲୁରୁ ତରଫରୁ ସୁରେଶ ସିଂ ଓ୍ବାଙ୍ଗ୍ଜାମ ଗୋଟିଏ ଗୋଲ ଦେଇ ପରାଜୟ ବ୍ୟବଧାନକୁ କମାଇଥିଲେ। ଏହି ବିଜୟ ସହ ଗୋଆ ପ୍ଲେ- ଅଫ୍ରେ ନିଜର ସ୍ଥାନ ନିଶ୍ଚିତ କରିଛି ଓ ଗତ ୧୨ଟି ମ୍ୟାଚ୍ରେ ଅପରାଜେୟ ରହିଛି। ଅନ୍ୟପଟେ ଏହି ପରାଜୟ ସହ ବେଙ୍ଗାଲୁରୁ ପ୍ଲେ- ଅଫ୍ ଆଶା ଧୂଳିସାତ୍ ହୋଇଛି। ସେହିପରି ରବିବାର ଅନୁଷ୍ଠିତ ଦ୍ୱିତୀୟ ମ୍ୟାଚ୍ରେ କେରଳ ବ୍ଲାଷ୍ଟର୍ସ ଓ ଚେନ୍ନାଇନ ଏଫ୍ସି ପରସ୍ପରକୁ ଭେଟିଥିଲେ ଓ ଏହି ମ୍ୟାଚ୍ ୧-୧ ଗୋଲରେ ଅମୀମାଂସିତ ରହିଛି। ଚେନ୍ନାଇନ୍ ତରଫରୁ ଫାଟଖୁଲୋ ଫାଟଖୁଲେଭ ଦଶମ ମିନିଟ୍ରେ ଗୋଲ ଦେଇଥିବା ବେଳେ କେରଳ ତରଫରୁ ୧୯ତମ ମିନିଟ୍ରେ ଗ୍ୟାରୀ ହୁପର ଗୋଲ ଦେଇଥିଲେ।
