ସିଡନୀ,୮।୧୨: ଏକଦିବସୀୟ ଏବଂ ଟି-୨୦ ପରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ୪ଟି ଟେଷ୍ଟ ମ୍ୟାଚ ଖେଳିବ। ଅଷ୍ଟ୍ରେଲିଆର ପୂର୍ବ ଗସ୍ତରେ ବିରାଟ କୋହଲିଙ୍କ ଅଧିନାୟକତ୍ୱରେ ଟେଷ୍ଟ ସିରିଜରେ ଐତିହାସିକ ବିଜୟ ହାସଲ କରିଥିଲା। କିନ୍ତୁ ଏଥର ଅଷ୍ଟ୍ରେଲିଆ ଭାରତ ଉପରେ ଭାରି ଥିବା ଜଣାପଡୁଛି। ଏହି ସମୟରେ, ୨୧ ବର୍ଷୀୟ ଅଷ୍ଟ୍ରେଲୀୟ ଅଲରାଉଣ୍ଡର କ୍ୟାମେରନ ଗ୍ରୀନ ଟେଷ୍ଟ ସିରିଜ ପୂର୍ବରୁ ଅଧିନାୟକ ବିରାଟ କୋହଲିଙ୍କ ଟେନସନ ବଢାଇ ଦେଇଛନ୍ତି। ଅଭ୍ୟାସ ମ୍ୟାଚରେ ଗ୍ରୀନ ଭାରତ ବିପକ୍ଷରେ ଏକ ଶତକ ଅର୍ଜନ କରିଛନ୍ତି। ଏହା ବ୍ୟତୀତ ସେ ଟିମ ଇଣ୍ଡିଆର ଦୁଇଟି ଗୁରୁତ୍ୱପୂର୍ଣ୍ଣ ଉଇକେଟ ମଧ୍ୟ ନେଇଥିଲେ। ତିନି ଦିନିଆ ଅଭ୍ୟାସ ମ୍ୟାଚର ଦ୍ୱିତୀୟ ଦିନରେ ଗ୍ରୀନ ୧୨୫ ରନର ଅପରାଜିତ ଇନିଂସ ଖେଳିଥିଲେ। ଏହି ସମୟ ମଧ୍ୟରେ ସେ ୧୨ ଚୌକା ଓ ଗୋଟିଏ ଛକା ମାରିଥିଲେ। ଏହା ପରେ ଗ୍ରୀନ ଦ୍ୱିତୀୟ ଇନିଂସରେ ଦୁଇଟି ଉଇକେଟ ନେଇଥିଲେ। ବିଶେଷ କଥା ହେଉଛି ସେ ଏହି ମ୍ୟାଚରେ ଉଭୟ ଭାରତର ଓପନର୍ ପୃଥ୍ବୀ ଶ’ ଏବଂ ଶୁଭମାନ ଗିଲଙ୍କୁ ଆଉଟ୍ କରିଛନ୍ତି। ସେ ପ୍ରଥମ ଇନିଂସରେ କୌଣସି ଉଇକେଟ ପାଇ ନ ଥିଲେ। ଭାରତ ବିପକ୍ଷ ଟେଷ୍ଟ ଦଳରେ ଗ୍ରୀନଙ୍କୁ ସାମିଲ କରାଯାଇଛି। ଏଭଳି ପରିସ୍ଥିତିରେ ସେ ଭାରତ ବିପକ୍ଷ ଚୂଡାନ୍ତ ଏକାଦଶରେ ମଧ୍ୟ ସେ ସ୍ଥାନ ପାଇପାରନ୍ତି ବୋଲି ଆଶା କରାଯାଉଛି। ଗତ ସପ୍ତାହରେ ଗ୍ରୀନ ଭାରତ ବିପକ୍ଷରେ ଏକଦିବସୀୟ ଡେବ୍ୟୁ କରିଥିଲେ। ନିକଟରେ ଅଷ୍ଟ୍ରେଲିଆର ପୂର୍ବତନ ଅଧିନାୟକ ତଥା ସମୀକ୍ଷକ ଇଆନ ଚାପେଲ ମଧ୍ୟ କ୍ୟାମେରନ ଗ୍ରୀନଙ୍କୁ ପ୍ରଶଂସା କରିଥିଲେ।
