ଜଳ ସଙ୍କଟ ଓ ପରିବେଶ ସୁରକ୍ଷା ପ୍ରତି ସଚେତନ ପୁଣେର ୨୭ ବର୍ଷୀୟ କେଦାର କୁଲକର୍ନି ପବ୍ଲିକ୍ ୟୁରିନାଲଗୁଡ଼ିକୁ ଦୁର୍ଗନ୍ଧମୁକ୍ତ କରିବା ସହ ପାଣି ଅପଚୟ ରୋକୁଛନ୍ତି। ସେ ଆବିଷ୍କାର କରିଥିବା ଓ୍ବାଟର୍ଲେସ ଟେକ୍ନୋଲୋଜି ମାଧ୍ୟମରେ ଏହା କରୁଛନ୍ତି। ‘ରୁତୁ ବାୟୋସିଷ୍ଟମ୍’ ଷ୍ଟାର୍ଟଅପ୍ ଦ୍ୱାରା ସେ ଏହି କାର୍ଯ୍ୟ ସଞ୍ଚାଳନ କରୁଛନ୍ତି। ଦିଲ୍ଲୀ ଆଇଆଇଟି ଦ୍ୱାରା କରାଯାଇଥିବା ଏକ ଗବେଷଣାରୁ ଜଣାପଡ଼ିଛି ଯେ, ଥରେ ୟୁରିନାଲ ଫ୍ଲସ୍ କରିବା ଲାଗି ୪ ରୁ୧୦ ଲିଟର ଯାଏ ପାଣି ଆବଶ୍ୟକ ହୁଏ। ଜଣେ ଦିନକୁ ୪ରୁ ୫ ଥର ପରିସ୍ରା କଲେ ଫ୍ଲସ୍ କରିବାକୁ ୨୦-୪୦ ଲିଟର ପାଣି ଲାଗିଥାଏ। କେଦାରଙ୍କ ନୂତନ ପଦ୍ଧତିରେ ଜଣେ ବ୍ୟକ୍ତି ୨୦ ଲିଟର ପାଣି ବଞ୍ଚାଇପାରୁଛି। ସେ ପ୍ରସ୍ତୁତ କରୁଥିବା ଉପତ୍ାଦଗୁଡ଼ିକରେ ଏକପ୍ରକାର ବ୍ୟାକ୍ଟେରିଆ ଓ ଏନ୍ଜାଇମ ରଖୁଛନ୍ତି, ଯାହାଦ୍ୱାରା ପରିସ୍ରାରେ ଥିବା ୟୁରିକ୍ ଏସିଡ୍ ପାଣି ସଂସ୍ପର୍ଶରେ ଆସିବା ପରେ ଆମୋନିଆ ବଦଳରେ ଯବକ୍ଷାରଜାନ ସୃଷ୍ଟି କରୁଛି। ଏହାଦ୍ୱାରା ଦୁର୍ଗନ୍ଧ ଦୂର ହୋଇପାରୁଛି। ଏବେସୁଦ୍ଧା ରୁତୁ ବାୟୋସିଷ୍ଟମ୍ ଦ୍ୱାରା ୭୦୦ ମେଟ୍ରିକ ଟନ୍ କାର୍ବନ ନିର୍ଗମନ ରୋକାଯାଇପାରିଛି; ଯାହା ୩୦,୦୦୦ ଗଛ ଲଗାଇବା ସହ ସମାନ। ଦେଶରେ ୧୫,୦୦୦ ପବ୍ଲିକ ଓ୍ବାଶ୍ରୁମ୍ରେ ବାୟୋବ୍ଲକ ଲଗାଇବା ଓ ଅନ୍ୟ ଉପତ୍ାଦ ବ୍ୟବହାର କରାଯାଇ ୫୫ କୋଟି ଲିଟରରୁ ଊର୍ଦ୍ଧ୍ୱ ପାଣି ବଞ୍ଚାଯାଇପାରିଛି। ୨୦୩୦ ଶେଷ ସୁଦ୍ଧା କେଦାର ୫୦,୦୦୦ରୁ ଅଧିକ ୟୁରିନାଲକୁ ଓ୍ବାଟର୍ଲେସ ୟୁରିନାଲ କରିବାକୁ ଯୋଜନା କରିଛନ୍ତି।
