‘ସାଝେ ସ୍ବପ୍ନ’-ନାଁଟି ଶୁଣିବାକୁ ଯେମିତି କାମ ବି ସେମିତି। ଏହା ହେଉଛି ସେହି ଏନ୍ଜିଓ, ଯାହା ହିମାଚଳପ୍ରଦେଶ ଗ୍ରାମୀଣ ମହିଳାମାନଙ୍କ ନିଯୁକ୍ତି ସ୍ବପ୍ନ ପୂରଣ କରିବାରେ ଲାଗିଛି। ଏହାର ପ୍ରତିଷ୍ଠାତା ସୁରଭି ଯାଦବ। ସୁରଭି ଉକ୍ତ ଏନ୍ଜିଓ ମାଧ୍ୟମରେ ମହିଳାମାନଙ୍କୁ ମାର୍କେଟ ଜବ୍ ଯୋଗାଇ ଦେଉଛନ୍ତି। ସେ ଦିଲ୍ଲୀ ଆଇଆଇଟିରୁ ଶିକ୍ଷା ଶେଷ କରିବା ପରେ ମହିଳାମାନଙ୍କ ମଧ୍ୟରେ ନିଯୁକ୍ତିର ନୈରାଶ୍ୟଜନକ ସ୍ଥିତି ଦେଖି ଉକ୍ତ କାର୍ଯ୍ୟ ଆରମ୍ଭ କରିଥିଲେ। କୋଭିଡ୍ ମହାମାରୀ ସମୟରେ ଲୋକମାନଙ୍କୁ ସାହାଯ୍ୟ କରିବା ବେଳେ ମହିଳାମାନଙ୍କ ଶିକ୍ଷାର ଆବଶ୍ୟକତା ରହିଥିବା ଅନୁଭବ କରିଥିଲେ। ସେମାନଙ୍କ ନିକଟରେ ଇଣ୍ଟରନେଟ୍ ସବୁଧା ବି ନ ଥିଲା, ଯେଉଁଥିପାଇଁ ସେ ୨୦୨୦ରେ ପ୍ରଥମେ ୫ ଜଣ ଝିଅଙ୍କୁ ପଢ଼ାଇବା ଆରମ୍ଭ କରିବା ପରେ ‘ସାଝେ ସ୍ବପ୍ନ’ ସଂସ୍ଥା ଗଢ଼ିଥିଲେ। ଏବେ ଝିଅମାନଙ୍କୁ କୁହାଯାଉଛି ‘ସ୍ବପ୍ନଓ୍ବାଲି’ ବା ଡ୍ରିମର୍ସ ଏବଂ ସେମାନେ ଯେଉଁଠି ପଢୁଛନ୍ତି ତାହାକୁ କୁହାଯାଉଛି ‘ସ୍ବପ୍ନ ସେଣ୍ଟର’(ଡ୍ରିମ୍ ସେଣ୍ଟର)। ହିମାଚଳପ୍ରଦେଶ ବ୍ୟତୀତ ଦେଶର ବିଭିନ୍ନ ରାଜ୍ୟରେ ଏଭଳି ସେଣ୍ଟର ଖୋଲିବାକୁ ସୁରଭି ଯୋଜନା କରିଛନ୍ତି।
