ଅବସର ପରେ ସେବାରେ ଲାଗିଛନ୍ତି ମହାରାଷ୍ଟ୍ରର ପ୍ରାଧ୍ୟାପକ ଅଶୋକ ସୋନାଓ୍ବାନେ। ନାସିକର ଏକ ଘରୋଇ କଲେଜ କେଟିଏଚ୍ଏମ୍ରୁ ୨୦୧୭ରେ ଅବସର ନେବା ପରେ ସେ ସୁନ୍ନାର ବ୍ଲକ୍ ଦେଶଓ୍ବାଣ୍ଡି ଗାଁକୁ ମରୁଡିମୁକ୍ତ କରିପାରିଛନ୍ତି। ଏହି ଗାଁରେ ବର୍ଷାଦିନ ପରେ ଜଳାଭାବ ଦେଖାଯାଏ ଓ ଲୋକମାନେ ଟ୍ୟାଙ୍କର ଉପରେ ନିର୍ଭର କରନ୍ତି। କିନ୍ତୁ ଅଶୋକଙ୍କ ଉଦ୍ୟମରେ ଏହି ଗାଁରୁ ଜଳାଭାବ ସମ୍ପୂର୍ଣ୍ଣ ଦୂର ହୋଇଛି। କଲେଜରେ ଅଧ୍ୟାପନା ସମୟରେ ସେ ଏନ୍ଏସ୍ଏସ୍ର ପ୍ରୋଗ୍ରାମ ଅଫିସର ଭାବେ କାର୍ଯ୍ୟ କରୁଥିଲେ। ଏଣୁ ଓ୍ବାର୍ଟର ହାର୍ଭେଷ୍ଟିଂ ଉପରେ ଥିତ୍ବା ତାଙ୍କ ଅଭିଜ୍ଞତାକୁ ଆଧାର କରି ପାହାଡ଼ରୁ ଗଡିଯାଉଥିବା ବର୍ଷାଜଳକୁ ଅଟକାଇବା ପାଇଁ ଗାଁ ଚାରିପାଖରେ ଖାଇ ଖୋଳିଛନ୍ତି। ଗାଁର ଯୁବକମାନେ ଏଥିରେ ପୂର୍ଣ୍ଣ ସହଯୋଗ କରିଛନ୍ତି। ଅଶୋକ ଏହି କାମ ୨୦୧୮ରେ ଆରମ୍ଭ କରି ୨ବର୍ଷ ମଧ୍ୟରେ ଶେଷ କରିଛନ୍ତିି। ମୋଟରେ ୧୦୦ ହେକ୍ଟର ଜମିରେ ଖାଇ ଖୋଳାଯାଇ ଜଳ ସଂରକ୍ଷଣ କରାଯାଉଛିି। ସ୍ଥାନୀୟ ପଞ୍ଚାୟତ ଖାଇ ଲାଗି ଏହି ଜମି ଦେଇଛି। ଖାଇ ଖୋଳାରେ ୮୦ ହଜାର ଟଙ୍କା ଖର୍ଚ୍ଚ ହୋଇଛି। କିଛି ଟଙ୍କା ଲୋକଙ୍କଠାରୁ ମିଳିଛି ଓ ଆଉ ସବୁ ଅଶୋକ ତାଙ୍କ ପକେଟରୁ ଖର୍ଚ୍ଚ କରିଛନ୍ତି। ଦେଢ଼ ହଜାର ଜନସଂଖ୍ୟା ବିଶିଷ୍ଟ ଦେଶଓ୍ବାଣ୍ଡିକୁ ଏବେ ମରୁଡିମୁକ୍ତ ଅଞ୍ଚଳ ଘୋଷଣା କରାଯାଇଛି। ଗୋଟିଏ ଖାଇରେ ହଜାର ହଜାର ଲିଟର ପାଣି ସଂରକ୍ଷିତ ହୋଇ ରହିପାରୁଛି। ଏହାଯୋଗୁ ଏହି ଗାଁ ଏବେ ଶସ୍ୟଶାମଳା ହୋଇପାରିଛି ଓ ଗାଁକୁ ଆଉ ଟ୍ୟାଙ୍କର ଆସୁନାହିଁ। ଆଉ କେତେକ ଗାଁକୁ ଏହି ଉପାୟରେ ମରୁଡିମୁକ୍ତ କରିବା ଲାଗି ଯୋଜନା ପ୍ରସ୍ତୁତ କରିଛନ୍ତି ବୋଲି କହନ୍ତି ଅଶୋକ।
