ତୃଣମୂଳସ୍ତରରେ ଜଣେ ସରପଞ୍ଚ ଭାବେ ନିରୁ ଯାଦବ ବ୍ୟାପକ ପରିବର୍ତ୍ତନ ଆଣିବାରେ ସକ୍ଷମ ହୋଇଛନ୍ତି। ନିରୁ ରାଜସ୍ଥାନର ଲାମ୍ବି ଅହିର ଗ୍ରାମପଞ୍ଚାୟତର ପ୍ରଥମ ମହିଳା ସରପଞ୍ଚ। ସେ ୨୦୨୦ରେ ପ୍ରଥମେ ସରପଞ୍ଚ ଭାବେ ନିର୍ବାଚିତ ହେବା ପରେ ଅନେକ କିଛି ପରିବର୍ତ୍ତନ ଆଣିବାର ନିଷ୍ପତ୍ତି ନେଇଥିଲେ। ଏହିକ୍ରମରେ ସେ ପ୍ରଥମେ ଗାଁର ଝିଅମାନଙ୍କୁ ହକି ପ୍ରଶିକ୍ଷଣ ଦେବାର ବ୍ୟବସ୍ଥା କରିଥିଲେ। ଝିଅମାନଙ୍କୁ ଖେଳିବା କଟକଣା ଥିଲା, ହେଲେ ନିରୁ ଅଭିଭାବକଙ୍କୁ ବୁଝାଇ ସେମାନଙ୍କୁ ଖେଳ ପଡ଼ିଆକୁ ଆଣିପାରିଥିଲେ। ସେ ତାଙ୍କ ଦରମାରୁ ଖର୍ଚ୍ଚକରି କୋଚ୍ ଆଣି ପ୍ରଶିକ୍ଷଣ ଦେବା ବ୍ୟବସ୍ଥା କରିଥିଲେ। ଏବେ ଝିଅଙ୍କ ମଧ୍ୟରୁ ଅନେକ ଜିଲାସ୍ତରରେ ପ୍ରତିନିଧିତ୍ୱ କରିସାରିଲେଣି। ନିରୁ ମଧ୍ୟ ଝିଅମାନଙ୍କୁ ଭୋକେଶନାଲ ଓ କୌଶଳ ଶିକ୍ଷା ଦେବାର ବ୍ୟବସ୍ଥା କରିଛନ୍ତି। ସେ ମଧ୍ୟ ଫାର୍ମର ପ୍ରଡ୍ୟୁସର ଅର୍ଗାନାଇଜେଶନ (ଏଫ୍ପିଓ) ଗଠନ କରି କୃଷକମାନଙ୍କ ଆୟ ବୃଦ୍ଧିରେ ସହଯୋଗ କରୁଛନ୍ତି। ଏହା ବ୍ୟତୀତ ସେ ବିବାହରେ ଏକକ ବ୍ୟବହାର ଯୋଗ୍ୟ ପ୍ଲାଷ୍ଟିକ ବ୍ୟବହାର ବନ୍ଦ କରିବା ଲାଗି ୨୦୨୨ରେ ‘ବାସନ ବ୍ୟାଙ୍କ’ ଗଠନ କରିଛନ୍ତି। ଏଥିରେ ଏବେ ୮,୦୦୦ ବାସନ ରହିଛି। ଏହାକୁ ସେ ତାଙ୍କ ଦ୍ୱାରା ପ୍ରତିଷ୍ଠିତ ଅଦିତ୍ରୀ ଫାଉଣ୍ଡେଶନ ଦ୍ୱାରା ପରିଚାଳନା କରୁଛନ୍ତି। ଏବେ ଗ୍ରାମବାସୀ କମ୍ ମୂଲ୍ୟରେ ବାସନ ଭଡ଼ାରେ ନେଉଛନ୍ତି ଓ ପ୍ଲାଷ୍ଟିକ ବ୍ୟବହାର ବନ୍ଦ ହୋଇଯାଇଛି। ଏହାକୁ ଲକ୍ଷ୍ୟ କରି ରାଜସ୍ଥାନ ସରକାର ମଧ୍ୟ ସାରା ରାଜ୍ୟରେ ଗାଁଗୁଡ଼ିକରେ ବାସନ ବ୍ୟାଙ୍କ୍ ଗଠନ କରିଛନ୍ତି।
