ବ୍ରହ୍ମପୁର ଅଫିସ,୩୦।୬: ରେଳ ଯାତ୍ରୀଙ୍କୁ ସହଜ ଓ ସୁବିଧାରେ ସମସ୍ତ ସେବା ଯୋଗାଇବା ପାଇଁ ସରକାର ପଦକ୍ଷେପ ଗ୍ରହଣ କରୁଛନ୍ତି। ଷ୍ଟେଶନର ଉନ୍ନତୀକରଣ ଠାରୁ ଆରମ୍ଭ କରି ଯାତ୍ରୀ ସୁରକ୍ଷାକୁ ଗୁରୁତ୍ୱ ଦିଆଯାଉଛି। ଲୋକେ ଘରେ ବସି ଟ୍ରେନ୍ ଟିକେଟ୍ ବୁକିଂ କରିବା ଲାଗି ସୁବିଧା କରାଯାଇଛି। ଏଥିପାଇଁ ଆଇଆରସିଟି ତରଫରୁ ସ୍ବତନ୍ତ୍ର ୱେବସାଇଟ୍ ରହିଛି। କିନ୍ତୁ କେତେଜଣ ଦଲାଲ୍ ଏହି ୱେବସାଇଟର ଅପବ୍ୟବହାର କରି ଅସାଧୁ ଉପାୟରେ ଟଙ୍କା ଉପାର୍ଜନ କରୁଛନ୍ତି। ଏଭଳି ଦଲାଲ୍ ଉପରେ ପ୍ରହାର କରିଛି ଆର୍ପିଏଫ। ଗତ ୨ ମାସ ମେ ଓ ଜୁନ ମଧ୍ୟରେ ବ୍ରହ୍ମପୁର ଆରପିଏଫ ଥାନା ଅଧିକାରୀଙ୍କ ନେତୃତ୍ୱରେ ବିଭିନ୍ନ ସ୍ଥାନରେ ଚଢ଼ାଉ କରି ବେଆଇନ ଟିକେଟ୍ କାରବାର କରୁଥିବା ୬ଟି ର଼୍ୟାକେଟ୍ ଠାବ କରାଯାଇଛି। ଏଥିସହିତ ଲକ୍ଷାଧିକ ଟଙ୍କାର ଟିକେଟ୍ ମଧ୍ୟ ଜବତ କରାଯାଇଛି। ବ୍ରହ୍ମପୁର ଆର୍ପିଏଫର ଟିମ୍ ଏଭଳି ବେଆଇନ କାରବାରରେ ଲିପ୍ତ ଦଲାଲ୍ଙ୍କୁ ପ୍ରଥମେ ଚିହ୍ନଟ କରିଥିଲା। ଏକ ତାଲିକା ପ୍ରସ୍ତୁତ କରି ପର୍ଯ୍ୟାୟ କ୍ରମେ ସେମାନଙ୍କ ଆଡ୍ଡ଼ାରେ ଚଢ଼ାଉ କରାଯାଇଥିଲା। ବିଭିନ୍ନ ଇଣ୍ଟରନେଟ୍ ଜୋନ୍ ଓ ଦୋକାନରେ ବ୍ୟକ୍ତିଗତ ୟୁଜର୍ ଆଇଡି ବ୍ୟବହାର କରି ଦଲାଲମାନେ ରେଳ ଟିକେଟ୍ ବୁକିଂ କରୁଥିଲେ। ପରେ ସେହି ଟିକେଟକୁ ଚଢ଼ା ଦରରେ ବିକ୍ରି କରୁଥିଲା। ଏଭଳି କାରବାର ରୋକିବା ପାଇଁ ବ୍ରହ୍ମପୁର ଆରପିଏଫ ଥାନା ଅଧିକାରୀଙ୍କ ନେତୃତ୍ୱରେ ଗଞ୍ଜାମ ଜିଲାର କେ.ନୂଆଗାଁ, ଦିଗପହଣ୍ଡି, କବିସୂର୍ଯ୍ୟନଗର, ବୁଗୁଡ଼ା ଓ ପୁରୁଷୋତ୍ତମପୁର ଥାନା ଇଲାକାର ବିଭିନ୍ନ ସ୍ଥାନରେ ଚଢ଼ଉ କରିଥିଲା। ଦଲାଲମାନେ ବିଭିନ୍ନ ସପ୍ଟୱେର୍ ବ୍ୟବହାର କରି ଏହି କାରବାର କରୁଥିବା ଜଣାପଡ଼ିଥିଲା। ତେଣୁ ଆର୍ପିଏଫ ତରଫରୁ କମ୍ପ୍ୟୁଟର ହାର୍ଡ଼ଡିସ୍କ ଓ ଇଣ୍ଟରନେଟ୍ ସଂଯୋଗରେ ବ୍ୟବହାର ହେଉଥିବା ମୋବାଇଲ୍ ଜବତ କରିଥିଲା। ଏହାସହିତ ୬ଟି ମାମଲାରେ ମୋଟ ୩ଲକ୍ଷ ୧୫ହଜାର ଟଙ୍କାର ପୁରୁଣା ଟିକେଟ୍ ଓ ୩୨ହଜାର ଟଙ୍କାର ଟିକେଟ୍(ଫ୍ୟୁଚର୍ ଟିକେଟ୍) ଜବତ କରାଯାଇଥିଲା। ଏ ସଂକ୍ରାନ୍ତରେ ମୋଟ ୭ ଜଣଙ୍କୁ ଗିରଫ କରାଯାଇଛି ବୋଲି ଆରପିଏଫ ତରଫରୁ ସୂଚନା ଦିଆଯାଇଛି।
