କୋରାପୁଟ/ନାରାୟଣପାଟଣା,୨ା୨(ସ୍ବ.ପ୍ର./ଡି.ଏନ୍.ଏ.): କୋରାପୁଟ ଜିଲା ନାରାୟଣପାଟଣା ଥାନା ଆଇଆଇସି ରଞ୍ଜିତ୍ ସାହୁଙ୍କୁ ବୁଧବାର ଡିଜିପି କାର୍ଯ୍ୟରୁ ନିଲମ୍ବନ କରିଛନ୍ତି। ଲକ୍ଷ୍ମୀପୁର ଷ୍ଟେଟ୍ବ୍ୟାଙ୍କ ଲକରରୁ ସୁନା ଚୋରି ଘଟଣାରେ ସୁନା କିଣିଥିବା ଲୋକଙ୍କୁ ଖସି ପଳାଇବାରେ ଆଇଆଇସି ସାହୁ ସହାୟତା କରିଥିବାରୁ ତାଙ୍କ ବିରୋଧରେ ଏହି କାର୍ଯ୍ୟାନୁଷ୍ଠାନ ନିଆଯାଇଛି। ଏଥିସହ ହୋମଗାର୍ଡ ଗୋପାଳ ରେଡ୍ଡିଙ୍କୁ ମଧ୍ୟ ନିଲମ୍ବିତ କରାଯାଇଥିବା ଏସ୍ପି ବରୁଣ ଗୁଣ୍ଟୁପାଲି ପ୍ରକାଶ କରିଛନ୍ତି।
ସୂଚନାଯୋଗ୍ୟ, ଗତ ନଭେମ୍ବର ୩୦ରେ ବ୍ୟାଙ୍କର ପୂର୍ବତନ ମେସେଞ୍ଜର ଶେଖର କୁଲଦିପିଆ ଲକ୍ଷ୍ମୀପୁରସ୍ଥିତ ଷ୍ଟେଟ ବ୍ୟାଙ୍କ ଶାଖା ଷ୍ଟ୍ରଙ୍ଗ୍ ରୁମ୍ରୁ ୧୬୧୦ ଗ୍ରାମ ସୁନା ଅଳଙ୍କାର ଚୋରି କରିଥିଲେ। ଜାନୁୟାରୀ ୧୪ରେ ଏହା ଜଣାପଡିବା ପରେ ଶାଖା ପରିଚାଳକ ସୁଧାଂଶୁ ଶେଖର ରାଉତ ସେହିଦିନ ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା(ନଂ. ୭/୨୨) ରୁଜୁ କରି ଏସ୍ଡିପିଓ ଅଶ୍ୱିନୀ ନାୟକଙ୍କ ତତ୍ତ୍ୱାବଧାନରେ ତଦନ୍ତ ଆରମ୍ଭ କରିଥିଲା। ଜାନୁୟାରୀ ୧୬ରେ ଶେଖରଙ୍କୁ ଗିରଫ କରାଯାଇଥିଲା। ତାଙ୍କ ନାରାୟଣପାଟଣା ବିକ୍ରମପୁରସ୍ଥିତ ଘର ଉପରେ ଚଢାଉ କରି ପୋଲିସ ୧୧୮୯ ଗ୍ରାମ ସୁନା ଜବତ କରିଥିଲା । ଏହି ଘଟଣାରେ ପୂର୍ବରୁ ବ୍ୟାଙ୍କ ପ୍ରଶାସନ ଶାଖା ପରିଚାଳକଙ୍କୁ ଚାକିରିରୁ ନିଲମ୍ବନ କରିବା ସହ ଅନ୍ୟ କର୍ମଚାରୀଙ୍କୁ ବଦଳି କରିଥିଲା।
