ପାରାଦୀପ,୩୦ା୧୨(ସ୍ବ.ପ୍ର.): ଜଗତସିଂହପୁର ଓ କେନ୍ଦ୍ରାପଡା ଜିଲାର ୧୧୧ଟି ଗ୍ରାମ ସୀମାରେ ଓଡ଼ିଶା ଶିଳ୍ପ ଭିତ୍ତିଭୂମି ନିଗମ (ଇଡ୍କୋ) ୨୮୪.୧୫ ଲକ୍ଷ ବର୍ଗ ମିଟର ବା ୨୮,୪୧୪ ଏକର ଜମି ଅଧିଗ୍ରହଣ କରିବାକୁ ଯାଉଛି। ସେଥିପାଇଁ ବୁଧବାର ପାରାଦୀପ ମଧୁବନ ପୌର କଲ୍ୟାଣମଣ୍ଡପଠାରେ ଇଡ୍କୋର ଜମି ବ୍ୟାଙ୍କ ପାଇଁ ଜନଶୁଣାଣି ହୋଇଥିଲା। ଇଡ୍କୋ ଓ ଜଗତ୍ସିଂହପୁର ଜିଲା ପ୍ରଶାସନ ପକ୍ଷରୁ ଆୟୋଜିତ ଜନଶୁଣାଣିରେ ପ୍ରାୟ ଅର୍ଦ୍ଧାଧିକ ଲୋକ ପ୍ରକଳ୍ପକୁ ସମର୍ଥନ କରିଥିଲେ। ଏଥିରେ ଅତିରିକ୍ତ ଜିଲାପାଳ କାହ୍ନୁଚରଣ ଧୀର, ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଧିକାରୀ ଦିଲୀପ କୁମାର ଦାସ ଉପସ୍ଥିତ ରହି ଲୋକଙ୍କ ମତ ଶୁଣିଥିଲେ। ଇଡ୍କୋର ସିଜେଏମ୍ ଅଶୋକ ମିଶ୍ର ଓ ଆଞ୍ଚଳିକ ମୁଖ୍ୟ ଆର. କେ. ମହାପାତ୍ର ପ୍ରସ୍ତାବିତ ଜମି ଅଧିଗ୍ରହଣ ସମ୍ପର୍କରେ ସୂଚନା ଦେଇଥିଲେ। ଏହି ପ୍ରସ୍ତାବିତ ଓ ପେଟ୍ରୋଲିୟମ ରସାୟନ ଓ ପେଟ୍ରୋକେମିକାଲ୍ସ ପ୍ରକଳ୍ପ ପାଇଁ ୨୦୦୭ରୁ ରାଜ୍ୟ ସରକାର ପ୍ରସ୍ତାବ ରଖିଛନ୍ତି। ଜିଲାର ଏରସମା ବ୍ଲକରେ ୨୬ ଗ୍ରାମ, କୁଜଙ୍ଗର ୨୧ ଗ୍ରାମ, କେନ୍ଦ୍ରାପଡ଼ା ଜିଲା ମାର୍ଶାଘାଇ ବ୍ଲକର ୧୨ ଗ୍ରାମ ଓ ମହାକାଳପଡ଼ାର ୫୨ ଗ୍ରାମ ଅଞ୍ଚଳରେ ଜମି ଅଧିଗ୍ରହଣ ହେବ। ଏହା ଆସନ୍ତା ୨୦ ବର୍ଷ ମଧ୍ୟରେ କରାଯିବ। ଉକ୍ତ ଅଞ୍ଚଳରେ ଜମି ଅଧିଗ୍ରହଣ କରାଯାଇ ଇଡ୍କୋର ଜମି ବ୍ୟାଙ୍କରେ ରଖାଯିବ। ଏସବୁ ଜମିରେ ପେଟ୍ରୋକେମିକାଲସ ପ୍ରକଳ୍ପ କରାଯିବ। ଏଥିପାଇଁ କଞ୍ଚାମାଲ ପାରାଦୀପ ତୈଳ ବିଶୋଧନାଗାରରୁ ମିଳିବ। ପଣ୍ୟ କାରବାର ପାଇଁ ପାରାଦୀପ ବନ୍ଦର ରହିଛି। ଇଡ୍କୋ ଜମି ନେବା ପରେ ସେହି ଅଞ୍ଚଳର ଭିତ୍ତିଭୂମି (ରାସ୍ତା, ଟ୍ରେନ ଲାଇନ, ବିଦ୍ୟୁତ୍ ସଂଯୋଗ, ପାଣି ବ୍ୟବସ୍ଥା) ଆଦି କରିବ। ଯେଉଁମାନେ ଶିଳ୍ପ କରିବାକୁ ଆସିବେ ସେମାନଙ୍କ ପାଇଁ ଆଉ ଜମିର ଅସୁବିଧା ରହିବ ନାହିଁ। ଏସବୁ ଅଞ୍ଚଳରେ ୧୬,୪୮୨ କୋଟି ଟଙ୍କା ବିନିଯୋଗ ହେବ। ଏଥିରେ ପ୍ରତ୍ୟକ୍ଷ ଓ ପରୋକ୍ଷ ଭାବେ ୪ ଲକ୍ଷ ଲୋକ ନିଯୁକ୍ତି ସୁଯୋଗ ପାଇବେ। ଏହିସବୁ ଅଞ୍ଚଳରେ ପେଟ୍ରୋକେମିକାଲସ ପ୍ରକଳ୍ପ ପାଇଁ ହାଇଦ୍ରାବାଦର ଏନ୍ଭାରନମେଣ୍ଟ ପ୍ରୋଟେକସନ୍ ଟ୍ରେନିଂ ଆଣ୍ଡ ରିସର୍ଚ୍ଚ ଇନଷ୍ଟିଚ୍ୟୁଟ ପକ୍ଷରୁ ହୋଇଥିବା ରିପୋର୍ଟରେ ଦର୍ଶାଯାଇଛି ଯେ, ଏହା କୌଣସି ପରିବେଶୀୟ କ୍ଷତି ସାଧନ ହେବନାହିଁ। ଏଥିପାଇଁ କେବଳ ସରକାରୀ ଓ କେତେକ ଚାଷଜମି ନିଆଯିବ। ଘରବାଡି ପୂର୍ବବତ ରହିବ। ଶିଳ୍ପ ପ୍ରତିଷ୍ଠା ପୂର୍ବରୁ ଅଞ୍ଚଳର ବେକାରି ଯୁବତୀଯୁବକଙ୍କୁ ଦକ୍ଷତା ବିକାଶ ପାଇଁ ତାଲିମ ଦିଆଯିବ ବୋଲି କୁହାଯାଇଛି।
