ଥିରୁଭାନନ୍ତପୁରମ୍,୨।୨ : ମାଓବାଦୀଙ୍କୁ ଆତ୍ମସମର୍ପଣ କରିବାକୁ ଏବଂ ମୁଖ୍ୟ ସ୍ରୋତକୁ ଫେରାଇ ଆଣିବା ପାଇଁ କେରଳ ସରକାର ଏକ ବଡ ଘୋଷଣା କରିଛନ୍ତି। ମୁଖ୍ୟମନ୍ତ୍ରୀ ପିନାରାଇ ବିଜୟନ ସରକାରଙ୍କ ପକ୍ଷରୁ କୁହାଯାଇଛି ଯେ ଆତ୍ମସମର୍ପଣ କରିଥିବା ମାଓବାଦୀଙ୍କୁ ପୁନର୍ବାସ ପ୍ୟାକେଜର ଏକ ଅଂଶ ଭାବରେ ଘର ଯୋଗାଇ ଦିଆଯିବ।
ଏହି ଯୋଜନା ଅଧୀନରେ ସରକାର ମୁଖ୍ୟ ସ୍ରୋତକୁ ଫେରିଥିବା ଜଣେ ମାଓବାଦୀ ଲିଜେଶ ଓରଫ ରାମୁଙ୍କ ପାଇଁ ଏକ ଘର ନିର୍ମାଣ କରିବାକୁ ନିଷ୍ପତ୍ତି ନେଇଛନ୍ତି। ରାମୁଙ୍କ ଘର ପାଇଁ ଉପଯୁକ୍ତ ଜମି ଖୋଜିବାକୁ ସରକାର ଏର୍ନାକୁଲମ ଜିଲାର ଜିଲାପାଳ ତଥା ପୋଲିସ ମୁଖ୍ୟଙ୍କୁ ନିର୍ଦ୍ଦେଶ ଦେଇଛନ୍ତି।
ଗୃହ ନିର୍ମାଣକୁ ତ୍ୱରାନ୍ବିତ କରିବା ପାଇଁ ଜିଲାପାଳ, ପୋଲିସ ମୁଖ୍ୟ ତଥା ପଞ୍ଚାୟତ ଡେପୁଟି ଡାଇରେକ୍ଟରଙ୍କୁ ନେଇ ସରକାର ଏକ କମିଟି ଗଠନ କରିଛନ୍ତି। ଏହି କମିଟି ଗୃହ ନିର୍ମାଣ ଯାଞ୍ଚ କରିବେ। ସରକାର ଦେଇଥିବା ବିବୃତ୍ତିରେ କୁହାଯାଇଛି ଯେ ଜମି ଚିହ୍ନଟ କରିବା ଏବଂ ଘର ନିର୍ମାଣ ପାଇଁ ସର୍ବାଧିକ ୧୫ ଲକ୍ଷ ଟଙ୍କା ଆବଣ୍ଟନ କରାଯିବ। ୨୦୧୮ ରେ ଜାରି କରାଯାଇଥିବା ଆଦେଶ ଅନୁଯାୟୀ, ମାଓବାଦୀଙ୍କ ପାଇଁ ଆତ୍ମସମର୍ପଣ ପୁନର୍ବାସ ପ୍ୟାକେଜ କାର୍ଯ୍ୟକାରୀ କରିବାକୁ ରାଜ୍ୟ ସରକାର ଅନୁମତି ଦେଇଛନ୍ତି। ଆତ୍ମସମର୍ପଣ କରିବା ପରେ ମାଓବାଦୀଙ୍କୁ ଏହି ପ୍ୟାକେଜ ଅନ୍ତର୍ଗତ ସୁବିଧା ଯୋଗାଇ ଦିଆଯିବ।
