ଲକ୍ଷ୍ନୌ,୨୩।୯: ୨୦୨୭ ଉତ୍ତରପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ଅଯୋଧ୍ୟା, କାଶୀ ଓ ମଥୁରାକୁ ନେଇ ରାଜନୈତିକ ବୟାନବାଜି ଜୋରଦାର ହୋଇଛି। ଅଯୋଧ୍ୟାରେ ରାସ୍ତା ପ୍ରଶସ୍ତୀକରଣକୁ ନେଇ ସମାଜବାଦୀ ପାର୍ଟି (ସପା) ମୁଖ୍ୟ ଅଖିଳେଶ ଯାଦବଙ୍କ ଆପତ୍ତି ପରେ ଉତ୍ତରପ୍ରଦେଶ ଉପମୁଖ୍ୟମନ୍ତ୍ରୀ ବ୍ରଜେଶ ପାଠକ ପ୍ରତିକ୍ରିୟା ଦେଇଛନ୍ତି।
ବ୍ରଜେଶ ପାଠକ ସପା ଉପରେ ‘ତୁଷ୍ଟୀକରଣ ରାଜନୀତି’ର ଅଭିଯୋଗ ଲଗାଇ ଅଯୋଧ୍ୟା ଓ କାଶୀର ବିକାଶକୁ ନେଇ ଅଖିଳେଶଙ୍କୁ ପ୍ରଶ୍ନ କରିଛନ୍ତି। ସେ ମଥୁରାକୁ ନେଇ ମଧ୍ୟ ସପା ଓ ଅଖିଳେଶଙ୍କ ଆଭିମୁଖ୍ୟ ସ୍ପଷ୍ଟ କରିବାକୁ କହିଛନ୍ତି । ବ୍ରଜେଶ ପାଠକ କହିଛନ୍ତି ଯେ ଅଖିଳେଶ ଯାଦବ ଅଯୋଧ୍ୟା ଓ କାଶୀରେ ହେଉଥିବା ବିକାଶ କାର୍ଯ୍ୟକୁ ନେଇ ପ୍ରଶ୍ନ ଉଠାଉଛନ୍ତି । କିନ୍ତୁ ସପା ସରକାର ସମୟରେ ଏହି ଧାର୍ମିକ ସହରଗୁଡ଼ିକର ବିକାଶ ପାଇଁ କେତେ ଖର୍ଚ୍ଚ ହୋଇଥିଲା, ତାହା ମଧ୍ୟ ଅଖିଳେଶ କହିବା ଦରକାର ବୋଲି ସେ କହିଛନ୍ତି।
ମଥୁରାକୁ ନେଇ ମଧ୍ୟ ଅଖିଳେଶଙ୍କ ମତ ସ୍ପଷ୍ଟ କରିବାକୁ ସେ କହିଛନ୍ତି । ଏହି ପ୍ରସଙ୍ଗରେ ପାଠକ କହିଛନ୍ତି, ‘ଯିଏ ରାମଙ୍କର ହେଲେନି, ସେ କୃଷ୍ଣଙ୍କର ହୋଇପାରିବନି । ଯିଏ କୃଷ୍ଣଙ୍କର ହୋଇପାରିବନି, ସେ କାହାର ହୋଇପାରିବନି।’ ଅଯୋଧ୍ୟାରେ ରାସ୍ତା ପ୍ରଶସ୍ତୀକରଣ ଓ ଅତିକ୍ରମଣ ହଟାଇବା ପଦକ୍ଷେପକୁ ନେଇ ଅଖିଳେଶ ଯାଦବ ରାଜ୍ୟ ସରକାରଙ୍କୁ ପ୍ରଶ୍ନ କରିଆସୁଛନ୍ତି । ଏହାର ଜବାବରେ ପାଠକ ଯୋଗୀ ସରକାରଙ୍କ ଅଯୋଧ୍ୟା ବିକାଶ ଯୋଜନାର ଉଦାହରଣ ଦେଇଛନ୍ତି। ସେ କହିଛନ୍ତି ଯେ ଅଯୋଧ୍ୟାକୁ ଆଧୁନିକ ଓ ବିକଶିତ ସହର ଭାବେ ପ୍ରସ୍ତୁତ କରାଯାଉଛି । ୧୪ କୋସି ପରିକ୍ରମା ମାର୍ଗର ପ୍ରଶସ୍ତୀକରଣ କଥା ମଧ୍ୟ ସେ ଉଲ୍ଲେଖ କରିଛନ୍ତି । ତାଙ୍କ ଦାବି ଅନୁସାରେ, ପୂର୍ବତନ ସପା ସରକାର ସମୟରେ ୧୪ କୋସି ପରିକ୍ରମା ମାର୍ଗ ଉପରେ ପ୍ରତିବନ୍ଧ ଲଗାଇବା ଭଳି ପରିସ୍ଥିତି ସୃଷ୍ଟି ହୋଇଥିଲା।
ବ୍ରଜେଶ ପାଠକ ଅଖିଳେଶ ଯାଦବଙ୍କ ଉପରେ ଧାର୍ମିକ ଓ ସାଂସ୍କୃତିକ ପ୍ରସଙ୍ଗରେ ମଧ୍ୟ ଆକ୍ରମଣ କରିଛନ୍ତି। ସେ ସପାର ରାଜନୀତିକୁ ତୁଷ୍ଟୀକରଣ ସହ ଯୋଡ଼ିବା ସହ ଦଳର ସନାତନ ସଂସ୍କୃତି ପ୍ରତି ଆଗ୍ରହ ନଥିବା ଅଭିଯୋଗ କରିଛନ୍ତି।
