ଶ୍ରୀନଗର,୫ ।୬: ଜମ୍ମୁ-କଶ୍ମୀରରେ କିଛି ଦିନ ହେବ କିଛି ଆତଙ୍କବାଦୀ ସଙ୍ଗଠନ ସକ୍ରିୟ ହୋଇ ଯାଇଥିବା ଦେଖାଯାଇଛି । ଆଉ ଏହି ସଙ୍ଗଠନ କଶ୍ମୀରୀ ପଣ୍ଡିତଙ୍କ ସମେତ ସାଧାରଣ ଲୋକଙ୍କୁ ବି ଟାର୍ଗେଟ କରୁଛନ୍ତି । ଏହାକୁ ନଜରରେ ରଖି ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ଜମ୍ମୁ-କଶ୍ମୀର ପୋଲିସ ସହ ସୁରକ୍ଷାକର୍ମୀ ମିଳିତ ଭାବେ କିଛି ଅଞ୍ଚଳରୁ ଆତଙ୍କବାଦୀଙ୍କୁ ସଫା କରୁଛନ୍ତି ।
ସଦ୍ୟ ସୂଚନା ଅନୁଯାୟୀ, ଶନିବାର ଜମ୍ମୁ-କଶ୍ମୀର ପୋଲିସକୁ ବଡ ସଫଳତା ମିଳିଛି । ଅନନ୍ତନାଗ ଜିଲାରେ ପ୍ରତିବନ୍ଧିତ ଆତଙ୍କବାଦୀ ସଙ୍ଗଠନ ହିଜବୁଲ ମୁଜାହିଦ୍ଦିନର ଜଣେ କମାଣ୍ଡର ସୁରକ୍ଷାକର୍ମୀଙ୍କ ଦ୍ୱାରା ନିହତ ହୋଇଛନ୍ତି । ଏହାପରେ ପୋଲିସ ସୂଚନା ଦେଇଛି କି ଉକ୍ତ ଆତଙ୍କବାଦୀଙ୍କ ନିକଟରୁ ଏକେ ୪୭ ରାଇଫଲ ସମେତ ଅନ୍ୟ ଅସ୍ତ୍ରଶସ୍ତ୍ର ଓ ଗୋଳାବାରୁଦ ଜବତ କରାଯାଇଛି ।
ଜମ୍ମୁ-କଶ୍ମୀର ପୋଲିସର ମହାନିର୍ଦ୍ଦେଶକ ବିଜୟ କୁମାର କହିଛନ୍ତି, ସୁରକ୍ଷାକର୍ମଙ୍କ ସହ ମୁହାଁମୁହିଁ ହେବା ସମୟରେ ହିଜବୁଲ ମୁଜାହିଦ୍ଦିନ ଆତଙ୍କବାଦୀ ସଙ୍ଗଠନର କମାଣ୍ଡର ନିସାର ଖାଣ୍ଡେ ନିହତ ହୋଇଛନ୍ତି । ତାଙ୍କ ନିକଟରୁ ଏକେ ୪୭ ରାଇଫଲ ସମେତ ଅନ୍ୟ ଅସ୍ତ୍ରଶସ୍ତ୍ର ଓ ଗୋଳାବାରୁଦ ଜବତ କରାଯାଇଛି । ଏବେବି ସେଠାରେ ସର୍ଚ୍ଚ ଅପରେଶନ ଜାରି ରହିଛି ।
