ତାଳଚେର, ୨୫ା୨ (ନି.ପ୍ର.): ତାଳଚେରର ଅଧିଷ୍ଠାତ୍ରୀ ଦେବୀ ମା’ ହିଙ୍ଗୁଳାଙ୍କ ବାର୍ଷିକ ଯାତ୍ରା ଓ ୧୯ ତମ ଲୋକ ମହୋତ୍ସବ ନିମନ୍ତେ ଏକ ପ୍ରାକ୍ ପ୍ରସ୍ତୁତି ବୈଠକ ଗୁରୁବାର ଗୋପାଳପ୍ରସାଦସ୍ଥିତ ପୀଠ ପରିସର ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି। ତାଳଚେର ଉପଜିଲାପାଳ ତଥା ମା’ ହିଙ୍ଗୁଳା ଠାକୁରାଣୀ ଟ୍ରଷ୍ଟ ବୋର୍ଡର ମ୍ୟାନେଜିଂ ଟ୍ରଷ୍ଟି ବିଶ୍ୱରଞ୍ଜନ ରଥ ଏଥିରେ ଅଧ୍ୟକ୍ଷତା କରିବା ସହିତ ଆସନ୍ତା ଏପ୍ରିଲ ୫ଠାରୁ ଏହି ଯାତ୍ରା ଓ ଲୋକ ମହୋତ୍ସବ ଆରମ୍ଭ ହୋଇ ୧୩ ତାରିଖ ପର୍ଯ୍ୟନ୍ତ ଚାଲିବ ବୋଲି ସୂଚନା ଦେଇଥିଲେ।
ତାଳଚେର ତହସିଲଦାରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଉପଜିଲାପାଳଙ୍କ ସୁପାରିସ କ୍ରମେ ଷ୍ଟଲ ବଣ୍ଟନ କରାଯିବ ବୋଲି ବୈଠକରେ ନିଷ୍ପତ୍ତି ନିଆଯାଇଥିଲା। ଚଳିତବର୍ଷ ଷ୍ଟଲଗୁଡିକର ବିଭାଗୀକରଣ କରାଯାଇ ଆବଣ୍ଟନ କରାଯିବାକୁ ସଦସ୍ୟମାନେ ପ୍ରସ୍ତାବ ଦେଇଥିଲେ। ଏଥିସହିତ ଷ୍ଟଲ ସଂଖ୍ୟାରେ ଶହେ ବୃଦ୍ଧି କରିବା, ପାର୍କିଂ ସ୍ଥାନ ବଢ଼ାଇବା ପାଇଁ ସ୍ଥିର କରାଯାଇଥିଲା। ଷ୍ଟଲ ନିର୍ମାଣ ଓ ସିସି କ୍ୟାମେରା ବ୍ୟବସ୍ଥା କରିବାକୁ ଭରତପୁର କଲିୟରୀକୁ ଦାୟିତ୍ୱ ଦିଆଯାଇଥିଲା। ସେହିପରି ବିଭିନ୍ନ ସ୍ଥାନରେ କୁଲର ଓ ପଙ୍ଖାର ବ୍ୟବସ୍ଥା ପାଇଁ ଭୁବନେଶ୍ୱରୀ ଓସିପି, ଲୋକ ମହୋତ୍ସବରେ ଅସ୍ଥାୟୀ ମଞ୍ଚ ନିର୍ମାଣ ଓ ସାଉଣ୍ଡ ବ୍ୟବସ୍ଥା ପାଇଁ କଣିହାଁ ଖଣି, ଷ୍ଟ୍ରିଟ ଲାଇଟଗୁଡିକରେ ଏଲଇଡି ଲାଇଟ ଲଗାଇବାକୁ ହିଙ୍ଗୁଳା କ୍ଷେତ୍ରକୁ ଦାୟିତ୍ୱ ଦିଆଯାଇଥିଲା। ଉଭାସ୍ଥଳ ଓ ଅନ୍ୟାନ୍ୟ ବ୍ୟାରିକେଡ ବ୍ୟବସ୍ଥା କରିବାକୁ ନନ୍ଦିରା କୋଇଲା ଖଣି କର୍ତ୍ତୃପକ୍ଷଙ୍କୁ କୁହାଯାଇଥିଲା। ୯ ଦିନିଆ ଏହି ଲୋକ ମହୋତ୍ସବରେ ଅଂଶଗ୍ରହଣ କରିବାକୁ ଦେଶର ବିଭିନ୍ନ ଅଞ୍ଚଳରୁ ଲୋକନୃତ୍ୟ ଅନୁଷ୍ଠାନଗୁଡିକୁ ନିମନ୍ତ୍ରଣ କରାଯିବ ବୋଲି ସ୍ଥିର କରାଯାଇଥିଲା। ମା’ଙ୍କ ଯାତ୍ରା ନିମନ୍ତେ ଏକ ସଫେଇ ସବ୍ କମିଟି ଗଠନ ସହ ବିଡିଓଙ୍କ ତତ୍ତ୍ୱାବଧାନରେ ଏହା କାର୍ଯ୍ୟ କରିବ ବୋଲି ସ୍ଥିର କରାଯାଇଥିଲା। ଟ୍ରଷ୍ଟ ବୋର୍ଡର ମ୍ୟାନେଜିଂ ଟ୍ରଷ୍ଟି ବିଶ୍ୱରଞ୍ଜନ ରଥ ଧନ୍ୟବାଦ ଅର୍ପଣ କରିଥିଲେ।
