ଅମ୍ବାଭୋନା,୨୮।୧୨(ଡି.ଏନ.ଏ): ବରଗଡ଼ ଜିଲା ଅମ୍ବାଭେନା ବ୍ଲକରେ ମଙ୍ଗଳବାର ବର୍ଷା ସାଙ୍ଗକୁ କୁଆପଥର ମାଡ଼ ହୋଇଛି । ଏଥିରେ ଚାଷୀଙ୍କ ଅମଳ ଧାନ ପ୍ରଭାବିତ ହୋଇଛି । କ୍ଷେତ, ଖଳାରେ ରହିଥିବା ଅମଳ ଧାନ ବର୍ଷା, କୁଆପଥର ମାଡ଼ ଯୋଗୁ ନଷ୍ଟ ହୋଇଛି । ସେହିପରି ଅଞ୍ଚଳର ପରିବା ଫସଲ ମଧ୍ୟ କ୍ଷତିଗ୍ରସ୍ତ ହୋଇଛି । ଏହାକୁ ନେଇ ଚାଷୀ ଚିନ୍ତିତ ହୋଇପଡ଼ିଛି ।
ବ୍ଲକର ବରା, ସାନସରେଇପାଲି, କଣ୍ଡପଲା, ଅମ୍ବାଭୋନା, କପାଶିରା, ଭୁକ୍ତା ଅଞ୍ଚରେ ଧାନ, ପରିବା ଚାଷ ଯଥେଷ୍ଟ ପ୍ରଭାବିତ ହୋଇଛି । ଧାନ ସଂଗ୍ରହ ପ୍ରକ୍ରିୟାକୁ ପ୍ରାୟ ମାସେ ବିତିଯାଇଛି। ମାତ୍ର ଚାଷୀଙ୍କ ବାରମ୍ବାର ଦାବି ସତ୍ତ୍ବେ ଧାନ ଉଠାଣ ଦିଗରେ ତ୍ୱରିତ୍ ପଦକ୍ଷେପ ନିଆଯାଇ ନ ଥିବା ଯୋଗୁ ଚାଷୀମାନେ ଏଥିରେ ଅଧିକ କ୍ଷତିଗ୍ରସ୍ତ ହୋଇଛନ୍ତି । ମଣ୍ଡିଗୁଡ଼ିକର ଖୋଲା ଆକାଶ ତଳେ ପଡ଼ିଥିବା ଲକ୍ଷାଧିକ ଧାନ ବସ୍ତା ବର୍ଷାରେ ଭିଜି କ୍ଷତିଗ୍ରସ୍ତ ହୋଇଥିବା ଚାଷୀମାନେ ଅଭିଯୋଗ କରିଛନ୍ତି । ଅନ୍ୟପଟେ ଏଭଳି ବୃଷ୍ଟିପାତ ଯୋଗୁ ମିଲର୍ସ ଧାନର ଆଦର୍ରତା ନେଇ ନାନା ଆଳ ଦେଖାଇ କଟନୀଛଟନୀ କରିବା ନେଇ ଚାଷୀମାନେ ଆଶଙ୍କା ପ୍ରକାଶ କରିଛନ୍ତି । ମାତ୍ର ଚାଷୀମାନେ ମଣ୍ଡିକୁ ବିକ୍ରି ପାଇଁ ଧାନ ଆଣି ଗଚ୍ଛିତ ରଖିଛନ୍ତି । ମଣ୍ଡିକୁ ପହଞ୍ଚିବା ପରେ ଧାନ ସୁରକ୍ଷିତ ରଖିବା ନିୟନ୍ତ୍ରିତ ବଜାର କମିଟିର ଦାୟିତ୍ୱ ହୋଇଥିବା ଯୋଗୁ କଟନୀଛଟନୀ ହେଲେ ବିରୋଧ କରାଯିବ ବୋଲି ଲାଲ ବାହାଦୂର ଶାସ୍ତ୍ରୀ କୃଷକ ସଂଗଠନ ପକ୍ଷରୁ ଚେତାବନୀ ଦେଇଛନ୍ତି ।
