ପଦ୍ମପୁର,୨୯ା୬(ପ୍ରଦୀପ୍ତ ଦାଶ):ପଦ୍ମପୁର ଉପଖଣ୍ଡର ଏକମାତ୍ର ଭରସାଯୋଗ୍ୟ ସରକାରୀ ଉପଖଣ୍ଡ ଡାକ୍ତରଖାନାରେ ବିପର୍ଯ୍ୟସ୍ତ ସ୍ବାସ୍ଥ୍ୟସେବା ନେଇ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଦୁର୍ଘଟଣାଗ୍ରସ୍ତ କିମ୍ବା ଗୁରୁତର ରୋଗୀଙ୍କୁ ଏଠାରେ ଭର୍ତ୍ତି କଲେ ପ୍ରାଥମିକ ଚିକିତ୍ସା କରି ବରଗଡ଼ କିମ୍ବା ବୁର୍ଲାକୁ ପଠାଇଦିଆଯାଉଛି । ତେଣୁ ଭରସାଯୋଗ୍ୟ ଚିକିତ୍ସା ଅଭାବରୁ ଏହି ଉପଖଣ୍ଡ ଚିକିତ୍ସାଳୟ ଏବେ ରେଫେରାଲ ଡାକ୍ତରଖାନାରେ ପରିଣତ ହୋଇଛି। ସେହିପରି ବହିର୍ବିଭାଗ(ଓପିଡି)ରେ ଡାକ୍ତରଙ୍କ ଅନୁପସ୍ଥିତି ରୋଗୀମାନଙ୍କୁ ଅସୁବିଧାରେ ପକାଉଛି। ଦୂରଦୂରାନ୍ତରୁ ଆସୁଥିବା ରୋଗୀମାନେ ଦୀର୍ଘ ସମୟ ଧରି ଅପେକ୍ଷାରେ ରହୁଛନ୍ତି। ଆଉ ନର୍ସିଂହୋମ କିମ୍ବା ପ୍ରାଇଭେଟ ଚିକିତ୍ସା କରୁଥିବା ଡାକ୍ତର ପାଖକୁ ଯାଇ ଖର୍ଚ୍ଚାନ୍ତ ହେଉଛନ୍ତି। ଏହି ଡାକ୍ତରଖାନାରେ ମେଡିସିନ, ଅସ୍ଥିଶଲ୍ୟ ଭଲି ବିଭାଗ ଖାଲି ପଡ଼ିଥିବା ବେଳେ ସ୍ତ୍ରୀ ରୋଗ ଓ ପ୍ରସୂତିରେ ଜଣେ ମାତ୍ର ଡାକ୍ତର ଅଛନ୍ତି। ନିଶ୍ଚେତକ ବିଶେଷଜ୍ଞ ପଦବୀ ଖାଲିପଡ଼ିଥିବା ବେଳେ ଭେସଜରେ ୩ ଡାକ୍ତରରୁ ଜଣେ ମାତ୍ର ଅଛନ୍ତି। ସିନିୟର ମେଡିକାଲ ଅଫିସର ୨ପଦବୀ ଖାଲିପଡ଼ିଥିବା ବେଳେ ଏଲଟିଆର ଏମ୍ଓ ୧୦ପଦବୀ ଖାଲି ଅଛି। ବିଶେଷ କରି ୭୨ନର୍ସିଂ ପଦବୀ ଥିବାବେଳେ ମାତ୍ର ୧୭ ଜଣ ଥିବାରୁ କେମିତି ଇନ୍ ଡୋର ସେବା ଚାଲିଛି ତାହା ସହଜେ ଅନୁମେୟ। ସେହିପରି ରେଡିଓଗ୍ରାଫର, ଆଟେଣ୍ଡାଣ୍ଟ,ସୁଇପର ପଦବୀ ମଧ୍ୟ ଅଧାରୁ ଅଧିକ ଖାଲି ପଡିଛି ।
ମା’ ଓ ଶିଶୁ ବିଭାଗରେ ସରକାର ପାଞ୍ଚ ମହଲାର କୋଠା ନିର୍ମାଣ କରିଛନ୍ତି। ହେଲେ ଏଠାରେ କୌଣସି ଆନୁଷଙ୍ଗିକ ସୁବିଧା ନ ଥିବା ରୋଗୀ ସମ୍ପର୍କୀୟମାନେ ଅଭିଯୋଗ କରିଛନ୍ତି। ଏଠାରେ ରହିଥିବା ଗୋଟିଏ ଲିଫ୍ଟ ଦୀର୍ଘମାସ ହେବ ଅଚଳ ହୋଇପଡିଥିବା ବେଳେ ଗୋଟିଏ ଲିଫ୍ଟ ମଧ୍ୟ ଅଧିକାଂଶ ସମୟ ଅଚଳ ରହୁଛି । ସେଥିପାଇଁ ପ୍ରସୂତି ମହିଳା ଓ ଶିଶୁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏହା ସହିତ ଏହାର ୩ ଓ ୪ନମ୍ବର ଫ୍ଲୋରରେ ପାଣିର ଅଭାବ ପରିସ୍ଥିତିକୁ ଆହୁରି ଗମ୍ଭୀର କରିଛି ।
ଏମାନେ କୁହନ୍ତି
ସମସ୍ୟା ସମାଧାନ ନ ହେଲେ ଆନ୍ଦୋଳନ
ପଦ୍ମପୁର ଉପଖଣ୍ଡ ସମେତ ଅଞ୍ଚଳ ପାଇଁ ଏକ ଭରସାଯୋଗ୍ୟ ହେଉଛି ଏହି ଡାକ୍ତରଖାନା। ଏହାର ଆନୁଷଙ୍ଗିକ ଅଭାବ ପୂରଣ ପାଇଁ ବିଗତ ଦିନରେ ଅନେକ ଆନ୍ଦୋଳନ କରାଯାଇ କେବଳ ପ୍ରତିଶ୍ରୁତି ମିଳିଥିଲା। ବର୍ତ୍ତମାନ ଖୋଦ ସ୍ବାସ୍ଥ୍ୟମନ୍ତ୍ରୀଙ୍କ ପଦ୍ମପୁର ଗସ୍ତ, ଡାକ୍ତରଖାନା ପରିଦର୍ଶନ ସତ୍ତ୍ୱେ କୌଣସି ସୁଧାର ନ ଆସିବା ଦୁର୍ଭାଗ୍ୟଜନକ। ଏହାକୁ ନେଇ ଅଞ୍ଚଳବାସୀ ଆଗାମୀ ଦିନରେ ଏକ ଦୁର୍ବାର ଆନ୍ଦୋଳନ କରିବେ।
-ଅଜିତ କୁମାର ଶତପଥୀ
ସଂପାଦକ, ଆଶା ଓ ସତ୍କାର
ପ୍ରତିଶ୍ରୁତି ମିଳିଛି, ପ୍ରତିକାର ହେଉନି
ପଦ୍ମପୁର ଡାକ୍ତରଖାନାର ବିଭିନ୍ନ ସମସ୍ୟା ସମ୍ପର୍କରେ ନାଗରିକ କମିଟି ଓ ସାଧାରଣ ଜନତା ଅନେକ ଥର ବିଭାଗୀୟ ଅଧିକାରୀ ତଥା ସ୍ବାସ୍ଥ୍ୟ ବିଭାଗର ଉଚ୍ଚ ଅଧିକାରୀଙ୍କ ସହିତ ଆଲୋଚନା କରିଛନ୍ତି । କିନ୍ତୁ ଏ ପର୍ଯ୍ୟନ୍ତ କୌଣସି ପ୍ରତିକାର ହେଉନାହିଁ, କେବଳ ପ୍ରତିଶ୍ରୁତି ମିଳିଛି। ତେଣୁ ଆଗାମୀ ଦିନରେ ଆନ୍ଦୋଳନ ହିଁ ଏକମାତ୍ର ପନ୍ଥା।
-ରାମଚନ୍ଦ୍ର ତ୍ରିପାଠୀ
ଅବସରପ୍ରାପ୍ତ ଜିଲା ଜଜ୍ ତଥା ନାଗରିକ ସଂଘ ସଭାପତି
Dharitri – Odisha’s No.1 Odia Daily
