ନୂଆଦିଲ୍ଲୀ, ୫ା୯(ପି.ଟି.)-ସିନିୟର ଅଫ୍ସ୍ପିନର ହରଭଜନ ସିଂ ବ୍ୟକ୍ତିଗତ କାରଣ ଦର୍ଶାଇ ଚଳିତ ବର୍ଷର ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରୁ ଓହରି ଯାଇଛନ୍ତି। ସେ ତାଙ୍କ ନିଷ୍ପତ୍ତି ସମ୍ପର୍କରେ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ଟିମ୍ ମ୍ୟାନେଜମେଣ୍ଟକୁ ଅବଗତ କରାଇଛନ୍ତି। ଏଥର ଆଇପିଏଲ୍ରୁ ଓହରିବାରେ ସେ ହେଉଛନ୍ତି ଦ୍ୱିତୀୟ ହାଇପ୍ରୋଫାଇଲ ଖେଳାଳି। ୪୦ବର୍ଷୀୟ ହରଭଜନ ଗତ ଦୁଇ ସିଜନ ଧରି ସିଏସ୍କେ ତରଫରୁ ଖେଳି ଆସୁଥିଲେ। ବର୍ତ୍ତମାନ ସେ ନିଜ ପରିବାର ସହ ପଞ୍ଜାବର ଜଳନ୍ଧରରେ ଅବସ୍ଥାନ କରୁଛନ୍ତି। କାରଣକୁ ସେ ଗୋପନ ରଖିବାକୁ ଚାହୁଁଥିବା କହିଛନ୍ତି। ନିଷ୍ପତ୍ତିରେ ସହଯୋଗ କରିବା ଲାଗି ସେ ଅନୁରୋଧ କରିଛନ୍ତି। କୋଭିଡ୍-୧୯ ମାହାମାରୀ ଯୋଗୁ ଏଥର ଆଇପିଏଲ୍ ୟୁଏଇରେ ଆୟୋଜନ କରାଯାଇଛି। ଚଳିତ ସିଜନ ପାଇଁ ଫ୍ରାଞ୍ଚାଇଜ୍ ତାଙ୍କୁ ୨ କୋଟି ଟଙ୍କା ବିନିମୟରେ କ୍ରୟ କରିଥିଲା। ପୂର୍ବରୁ ଅଲରାଉଣ୍ଡର ସୁରେଶ ରାଇନା ବ୍ୟକ୍ତିଗତ କାରଣ ଦର୍ଶାଇ ସିଏସ୍କେ ଦଳରୁ ଓହରିଯାଇଥିଲେ। ଆଇପିଏଲ୍ ଇତିହାସରେ ଅନ୍ୟତମ ସଫଳ ବୋଲର। ଲସିଥ ମାଲିଙ୍ଗା (୧୭୦) ଓ ଅମିତ ମିଶ୍ର(୧୫୭)ଙ୍କ ପରେ ସେ ତୃତୀୟ ସର୍ବାଧିକ ୧୫୦ ଉଇକେଟ ଅକ୍ତିଆର କରିଛନ୍ତି। ବର୍ତ୍ତମାନ ପରିସ୍ଥିତିରେ ନିଜ ପରିବାର ପ୍ରତି ଧ୍ୟାନ ଦେବା ସବୁଠାରୁ ଗୁରୁତ୍ୱପୂର୍ଣ୍ଣ ବୋଲି ହରଭଜନ କରିଛନ୍ତି। ଖେଳୁ ନ ଥିଲେ ମଧ୍ୟ ୟୁଏଇରେ ସିଏସ୍କେ ଦଳ ପ୍ରତି ତାଙ୍କର ଶୁଭକାମନା ରହିଥିବା ସେ କହିଛନ୍ତି। ତାଙ୍କ ଦଳଠାରୁ ଆଉ ଏକ ପ୍ରଭାବୀ ପ୍ରଦର୍ଶନ ଦେଖିବାକୁ ମିଳିବ ବୋଲି ସେ କହିଛନ୍ତି। ଦୁବାଇ ଅଭିମୁଖେ ଯାତ୍ରା ପୂର୍ବରୁ ଚେନ୍ନାଇରେ ପ୍ରାକ୍ ପ୍ରସ୍ତୁତି କ୍ୟାମ୍ପରେ ମଧ୍ୟ ହରଭଜନ ଯୋଗ ଦେଇ ନ ଥିଲେ। ସିଏସକେରେ ବର୍ତ୍ତମାନ ଆଉ ୩ଜଣ ଫ୍ରଣ୍ଟ ଲାଇନ୍ ସ୍ପିନର ରହିଲେ। ସେମାନେ ହେଲେ ଲେଗ୍ ସ୍ପିନର ଇମ୍ରାନ ତାହିର, ବାମହାତୀ ମିଚେଲ ସାଣ୍ଟନର ଏବଂ ଲେଗ୍ବ୍ରେକ୍ ବୋଲର ପୀୟୂଷ ଚାଓ୍ବଲା।
