ନୂଆଦିଲ୍ଲୀ, ୨୯।୮ : ସରକାରୀ ବିଭାଗ ଦୁର୍ନୀତିଗ୍ରସ୍ତ ଅଧିକାରୀଙ୍କୁ ସୁରକ୍ଷା ଦେବାକୁ ଚେଷ୍ଟା କରୁଛି ବୋଲି ଏକ ସରକାରୀ ରିପୋର୍ଟରୁ ଜଣାପଡିଛି। ଏହି ବିଭାଗଗୁଡ଼ିକ ଦୁର୍ନୀତିଗ୍ରସ୍ତ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କେନ୍ଦ୍ରୀୟ ଭିଜିଲାନ୍ସ କମିଶନଙ୍କ ପରାମର୍ଶକୁ ଅନୁସରଣ କରିନାହାଁନ୍ତି। ରିପୋର୍ଟ ଅନୁଯାୟୀ ଭିଜିଲାନ୍ସ କମିଶନ ଏଭଳି ୫୫ ଟି ମାମଲା ରୁଜୁ କରିଛନ୍ତି। ସେଥିମଧ୍ୟରୁ ସର୍ବାଧିକ ୧୧ ଟି ମାମଲା ରେଲଓ୍ବେରେ ରହିଛି।
ସିଭିସିର ୨୦୨୧ ବାର୍ଷିକ ରିପୋର୍ଟରେ କୁହାଯାଇଛି ଯେ କ୍ଷୁଦ୍ର ଶିଳ୍ପ ବିକାଶ ବ୍ୟାଙ୍କ ଅଫ ଇଣ୍ଡିଆ (ସିଡ୍ବି), ବ୍ୟାଙ୍କ ଅଫ ଇଣ୍ଡିଆ ଏବଂ ଦିଲ୍ଲୀ ଜଳ ବୋର୍ଡରେ ପ୍ରତ୍ୟେକଟିରେ ଚାରୋଟି ଦୁର୍ନୀତି ମାମଲା ରହିଛି। ଏହା ବ୍ୟତୀତ ମହାନଦୀ କୋଇଲଫିଲ୍ଡ ଲିମିଟେଡ ବିରୋଧରେ ତିନୋଟି ମାମଲା ରୁଜୁ ହୋଇଥିଲା। ଏଥି ସହିତ ଇଣ୍ଡିଆନ ଓଭରସିଜ ବ୍ୟାଙ୍କ, ବ୍ୟାଙ୍କ ଅଫ ମହାରାଷ୍ଟ୍ର, ମାଡ୍ରାସ ଫର୍ଟିଲାଇଜର୍ସ ଲିମିଟେଡ, ଇନ୍ଦିରା ଗାନ୍ଧୀ ନ୍ୟାଶନାଲ ଓପନ ୟୁନିଭରସିଟି ଏବଂ ଉତ୍ତର ଦିଲ୍ଲୀ ମ୍ୟୁନିସିପାଲ କର୍ପୋରେଶନ ବିରୋଧ ଦୁଇଟି ମାମଲା ରହିଛି। ଆୟୋଗ କହିଛନ୍ତି ଯେ ଏହାର ପରାମର୍ଶକୁ ଗ୍ରହଣ ନକରିବା କିମ୍ବା ଆୟୋଗଙ୍କ ସହ ପରାମର୍ଶ ନକରିବା ଭିଜିଲାନ୍ସ ପ୍ରକ୍ରିୟାକୁ ପ୍ରଭାବିତ କରିଥାଏ । ଏହା ଭିଜିଲାନ୍ସ ପ୍ରଶାସନର ନିରପେକ୍ଷତାକୁ କ୍ଷୁର୍ଣ୍ଣ କରିଥାଏ।
ରିପୋର୍ଟରେ ଅନୁପଯୁକ୍ତ ସମ୍ପତ୍ତିର ଗୋଟିଏ ମାମଲା ରହିଛି। ସିଭିସି କହିଛି ଯେ ଗୋଟିଏ ମାମଲାରେ ତତ୍କାଳୀନ ମୁଖ୍ୟ ପର୍ସନାଲ ଅଫିସର ତାଙ୍କ ଆୟଠାରୁ ୧୩୮.୬୫ ପ୍ରତିଶତ ଅଧିକ ସମ୍ପତ୍ତି ହାସଲ କରିଛନ୍ତି। ରିପୋର୍ଟରେ କୁହାଯାଇଛି ଯେ ସମ୍ପତ୍ତି କ୍ରୟ ତଥା ପରିବାର କିମ୍ବା ତାଙ୍କ ପତ୍ନୀଙ୍କ ଦ୍ୱାରା ବିନିଯୋଗ ବ୍ୟତୀତ ପରିବାରର ସଦସ୍ୟଙ୍କ ଦ୍ୱାରା ଉପହାର ଗ୍ରହଣ ସମ୍ବନ୍ଧୀୟ ବିସ୍ତୃତ ନିୟମ ଅନୁଯାୟୀ ବିଭାଗର ଅନୁମତି ନ ନେଇ ଅଧିକାରୀ ଦାୟୀ ବୋଲି ଜଣାପଡିଛି। ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଆରମ୍ଭ କରିବାକୁ ଆୟୋଗ ୭ ମାର୍ଚ୍ଚ ୨୦୧୨ ରେ ପ୍ରଥମ ପରାମର୍ଶ ଦେଇଥିଲେ। ଏହା ପରେ ଦ୍ୱିତୀୟ ପଦକ୍ଷେପ ନେଇ ପରାମର୍ଶ ଦିଆଯାଇଥିଲା । ତେବେ ରେଳବାଇ ବୋର୍ଡ ଏହି ମାମଲା ବନ୍ଦ କରିବାକୁ ନିଷ୍ପତ୍ତି ନେଇ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ବନ୍ଦ କରିଦେଇଛି।
ଭିଜିଲାନ୍ସ କମିଶନଙ୍କ କହିବାନୁସାରେ, ଏପରି ଏକ ମାମଲା ସିଡ୍ବିର ଥିଲା, ଯେଉଁଥିରେ ବ୍ୟାପକ ଆର୍ଥିକ କ୍ଷତି ହୋଇଥିଲା। ଏହି ରିପୋର୍ଟରେ କୁହାଯାଇଛି ଯେ ଏହି ମାମଲାରେ ସମ୍ପୃକ୍ତ ଦୁଇ ଅଧିକାରୀଙ୍କ ଉପରେ କମିଶନ ଜରିମାନା ଆଦାୟ କରିବାକୁ ସୁପାରିଶ କରିଛନ୍ତି। ତେବେ ଆୟୋଗର ପରାମର୍ଶକୁ ଏଡ଼ାଇ ଉଭୟ ଅଧିକାରୀ ଏହି ଅଭିଯୋଗରୁ ନିର୍ଦ୍ଦୋଷରେ ଖଲାସ ହୋଇଥିଲେ।
