ଭୁବନେଶ୍ୱର,୧୯।୨: ଓଡ଼ିଶା ବିଧାନସଭାର ଚଳିତ ବଜେଟ୍ ଅଧିବେଶନରେ ପୁଣିଥରେ ରାଜ୍ୟର ସୁନା ଖଣି ପ୍ରସଙ୍ଗ ଚର୍ଚ୍ଚାର ବିଷୟ ପାଲଟିଛି। ଗୁରୁବାର ଗୃହରେ ବଡମ୍ବା ବିଧାୟକ ବିଜୟ କୁମାର ଦଳବେହେରାଙ୍କ ଏକ ପ୍ରଶ୍ନର ଉତ୍ତର ରଖି ବାଣିଜ୍ୟ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା ରାଜ୍ୟର ବିଭିନ୍ନ ଜିଲାରେ ଥିବା ସୁନା ଗଚ୍ଛିତ ସମ୍ପର୍କରେ ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି।
ମନ୍ତ୍ରୀଙ୍କ ସୂଚନା ଅନୁଯାୟୀ, ଓଡ଼ିଶାର ଦେବଗଡ଼, କେନ୍ଦୁଝର ଏବଂ ମୟୂରଭଞ୍ଜ ଜିଲାରେ ସୁନା ଖଣି ଥିବା ସ୍ପଷ୍ଟ ହୋଇଛି। ଏହି ସ୍ଥାନଗୁଡ଼ିକରେ ବର୍ତ୍ତମାନ ସବିଶେଷ ଅନୁସନ୍ଧାନ କାର୍ଯ୍ୟ ଜାରି ରହିଛି। ଦେବଗଡ଼ର ଆଦାସ-ରାମପଲ୍ଲୀ ଅଞ୍ଚଳ, କେନ୍ଦୁଝରର ଗୋପୁର-ଜଳଡିହି ଅଞ୍ଚଳ ଏବଂ ମୟୂରଭଞ୍ଜର ମଦନଶାହୀ-କାଞ୍ଜିଆ ଅଞ୍ଚଳରେ ସୁନା ଖଣି ରହିଛି।
କେବଳ ଏହି ତିନୋଟି ଜିଲା ନୁହେଁ, ବରଂ ଓଡ଼ିଶା ଖଣି ନିଗମ (OMC) ର ପ୍ରାଥମିକ ସର୍ଭେ ଅନୁଯାୟୀ ରାଜ୍ୟର ପ୍ରାୟ ୯ଟି ଜିଲାରେ ସୁନା ମିଳିବାର ସମ୍ଭାବନା ରହିଛି। ସେଗୁଡ଼ିକ ହେଲା, କେନ୍ଦୁଝର ଜିଲାର ଗଜୀପୁର, ସାଲେଇକେନା ଓ ଦିମିରିମୁଣ୍ଡା। ମୟୂରଭଞ୍ଜର ଯଶୀପୁର, ସୁରିଆଗୋଡ଼ା, ରୁଆଁସି, ଇଦେଲକୁଚା, ମାରୁଡ଼ିହି, ସୁଲେଇପାଟ ଓ ବାଦାମପାହାଡ଼। ସୁନ୍ଦରଗଡ଼ର ଦିଗଝରଣ, ମାଲିଡିହି, ଘୋଘର ଓ ଗିରିଙ୍ଗକେଲା। କୋରାପୁଟର ରଙ୍ଗାପାଣି, ଗାରିଆ ଓ ଦଶମନ୍ତପୁର। ମାଲକାନଗିରିର ସୁନାପଦର, କିୟାଙ୍ଗ ଓ ଗୋବିନ୍ଦପାଲି। ଅନୁଗୋଳର ମାଙ୍କଡ଼ଚୁଆ, ଟିକିର ଓ ସାମକୋଇ। ବୌଦ୍ଧର କୁଦାଗାଁ, ଜହ୍ନପଙ୍କ ଓ ରାମଗଡ଼। ସମ୍ବଲପୁରର କେନ୍ଦୁଖୁଣ୍ଟି ଓ କୁଣ୍ଟରାବାହାଲ। ଦେବଗଡ଼ର ସୁନାକେଣି, ନିକ୍ତିମାଲ ଓ ଗାଇଲୋ ସାମିଲ ଅଛି।
ଓଡ଼ିଶାରେ ସୁନା ଖଣି ଥିବା ନେଇ ପ୍ରଥମେ ୨୦୨୩ ଫେବୃଆରୀ ୨୭ ରେ ରାଜ୍ୟ ସରକାର ବିଧାନସଭାରେ ସୂଚନା ଦେଇଥିଲେ। ସେବେଠାରୁ ପ୍ରତି ଅଧିବେଶନରେ ଏହି ପ୍ରସଙ୍ଗରେ ନୂଆ ନୂଆ ତଥ୍ୟ ସାମ୍ନାକୁ ଆସୁଛି। କେନ୍ଦୁଝର ଜିଲାରେ ୧୯୮୦ ଦଶକରୁ ଭାରତୀୟ ଭୂତାତ୍ତ୍ୱିକ ସର୍ବେକ୍ଷଣ ସଂସ୍ଥା (GSI) ସର୍ଭେ ଆରମ୍ଭ କରିଥିବା ବେଳେ ଏବେ ଆଧୁନିକ ଜ୍ଞାନକୌଶଳ ବ୍ୟବହାର କରି ଏହାର ବ୍ୟବସାୟିକ ଉପଯୋଗିତା ଉପରେ ଗୁରୁତ୍ୱ ଦିଆଯାଉଛି।
ରାଜ୍ୟର ଏହି ବିପୁଳ ଖଣିଜ ସମ୍ପଦ ଯଦି ବ୍ୟବସାୟିକ ଭାବେ ଲାଭଜନକ ପ୍ରମାଣିତ ହୁଏ, ତେବେ ଓଡ଼ିଶାର ଅର୍ଥନୀତିରେ ଏକ ବଡ଼ ପରିବର୍ତ୍ତନ ଆସିବ ବୋଲି ଆଶା କରାଯାଉଛି।
