ମୋହନା, ୨୩।୬( ମନ୍ମଥ ମିଶ୍ର ): ଦାଦନ ଖଟିବାକୁ ଯାଇଥିଲେ ଗୋଆ । ହେଲେ ୪ ମହଲା ଅଟ୍ଟାଳିକାରୁ ତଳକୁ ଖସି ପଡ଼ିବାରୁ ଦାଦନ ଶ୍ରମିକଙ୍କ ମୃତ୍ୟୁ ଘଟିଛି । ଏଭଳି ଅଭାବନୀୟ ଘଟଣା ଘଟିଛି ଗୋଆରେ। ପରିବାର ଲୋକଙ୍କ ସୂଚ଼ନା ପ୍ରକାରେ ମୋହନା ବ୍ଲକ ଅନ୍ତର୍ଗତ ବଡ଼ସିନ୍ଧବା ପଞ୍ଚାୟତ ଜାମଢ଼ଇ ଗ୍ରାମ କୋନାଳ ସାହିର ତରଙ୍ଗା ଦଳବେହେରାଙ୍କ ପୁଅ ଗଣେଶ ଦଳବେହେରା(୩୨) ତିନି ମାସ ପୂର୍ବେ ଦାଦନ ଖଟିବାକୁ ଗୋଆ ଯାଇଥିଲେ । ସେଠାରେ କୋଠା ନିର୍ମାଣ କାମରେ ଦାଦନ ଶ୍ରମିକ ଭାବେ କାମ କରୁଥିଲେ । ୪ ମହଲା ଅଟ୍ଟାଳିକାରେ ରାତ୍ର ଯାପନ କରିଥିବା ବେଳେ ଆଜି ରାତି ପ୍ରାୟ ତିନିଟାରେ ତାଙ୍କୁ ପରିସ୍ରା ଲାଗିବାରୁ ଶୌଚ଼ାଳୟକୁ ଯିବା ସମୟରେ ଅସାବଧାନତା ଯୋଗୁ ଗୋଡ଼ ଖସିଯିବାରୁ ୪ ମହଲା ଛାତରୁ ତଳକୁ ଖସି ପଡ଼ିଥିଲେ । ପାଖରେ ଥିବା ସାଙ୍ଗ ସାଥିମାନେ ସଙ୍ଗେ ସଙ୍ଗେ ଗଣେଶକୁ ନିକଟସ୍ଥ ସ୍ବାସ୍ଥ୍ୟ କେନ୍ଦ୍ରକୁ ନେଇଥିଲେ । ତାଙ୍କର ମୁଣ୍ଡକୁ ଗଭୀର ଆଘାତ ଲାଗିଥିବାରୁ ଡାକ୍ତର ମୃତ ଘୋଷଣା କରିଥିଲେ । ଖବରପାଇ ପରିବାର ଲୋକେ ଦୁଃଖରେ ଭାଙ୍ଗି ପଡ଼ିଥିବା ବେଳେ ଶବକୁ କିପରି ଗୋଆରୁ ଗ୍ରାମକୁ ଅଣାଯାଇପାରିବା ଚିନ୍ତାରେ ଅଛନ୍ତି । ପରିବାର ଲୋକେ ଗରୀବ ଶ୍ରେଣୀର ହୋଇଥିବାରୁ ଶବକୁ କିପରି ଗାଁକୁ ଅଣାଯିବ ସେ ସଂପର୍କରେ ଲିଖିତ ଭାବେ ଜିଲାପାଳ, ସାଂସଦ ଓ ପାରଳାଖେମୁଣ୍ଡି ବିଧାୟକ ଓ ତହସିଲଦାରଙ୍କୁ ଜଣାଇଛନ୍ତି।
